الأحد، 20 ديسمبر 2009

سنة 2010 و2011 حاسميين جدااا في مستقبل مصر ولازم يكون ليك دور

السنتين الجايين هايكونوا حاسمين فى تاريخ مصر
ولازم يكون ليك دور


التغيير مش هيجي بمجرد الرئيس بس هو اللي يتغير
ومش هيجي بمجرد ان الدستوربس هو اللي يتغير
ومش هيجي لما واحد هو اللي يجيبلنا حقنا مرة او مرتين


           لا
 

التغيير هيجي لما اغلبية الشعب تتغير
كان صادق وواقعي لما المعلم الكبير غاندي قال كن التغيير الذي تريد ان    تصنعه
  التغيير هو ان تكون ايجابي بكل السبل وبكل الاشكال
  تعرف حقوقك ايه وتعرفها للي حواليك ولاكبر قدر من الناس تقدر عليه
  التغيير هو انك تتمسك بحقوقك وتستخدمها
  التغيير هو انك تعرف الغلط ايه وجاي منيين وتفكر في اساليب حله  وتتناقش  فيها مع الناس
  التغيير هو انك تكون مؤمن بالتغيير وبتعتمد على نفسك انك تصنعه مش   بتأمل ان غيرك يصنعه
وعشان تكلم الناس وتوعيهم باللي انت وصلته لازم تتكلم معاهم باللغة اللي يفهموها
فلازم نشتغل بكل الطرق والاساليب
اغاني بكلمات توصل المعنى اللي عايزينه
نصور الفساد في كل مكان ونعمله فيديوهات بمؤثرات وكلام يفهم الناس ميين المتسبب في كل ده
نطلع بطاقة انتخابية ونوعي الناس تيجي معانا ونتمسك بحقنا في الانتخابات  ونشجع الناس انها تروح تتنخب ولازم نفهمها
نعمل اغاني وبرومهات عن الانتخابات
ونعلم الناس اسس الاختيار ونخليها تفكر صح ازاي
السنة دي مهمين اوووووووووي في تاريخ مصر
نكون او لا نكون
شغل كتيير وكل واحد فينا يسعى انه يعمل اقصى ما في جهده عشان كل ما   هنتعب وكل ما هنفكر عشان نوصل لخطوات صح ونتعب في تنفيذها كل ما النتيجة هتكون اكبر واحلى
وساعتها هيكون فعلا شعب مصر صنع التغيير والتغيير ده عمره ما هيتنسى  وعمر ما حد هيقدر يقضي عليه
عشان ساعتها هيكون الشتعب اتعلم وخاض تجربة التغيير بنفسه
مش سياسي ولا اتنين هما اللي بيجروله على حقوقه
كل واحد فينا يفكر هو موهوب في ايه وبيقدر يعمل ايه ويستغل مقدرته دي  في انه يوعي الناس ويحمسهم ويشجعهم على الايجابية وينسيهم الخوف
لازم نفكر ونساعد بعض عشان نوصل لهدفنا في الاخر
هدف اننا نكون بني ادمين بجد
بناكل وبنشرب اكل نضيف ومية نضيفة
كل واحد بيشتغل الشغل اللي بيبدع فيه عشان نقدر نكبر بلدنا
المرتبات تعيشنا مش تقهرنا وتذلنا
نعيش في امان والشرطة في خدمة الشعب مش في خدمة النظام الحاكم
عايزين يبقى في عدل في كل حاجة
عايزين نبقى مصرييييين بجد

شباب 6 ابريل .. APRIL 6 YOUTH MOVEMENT

هناك 18 تعليقًا:

  1. والله انا نفسى ده يحصل وان شاء الله هيحصل بادينا

    ردحذف
  2. كلمة حق في زمن الباطل

    ردحذف
  3. أن شاء الله القادم أحلى يا اسماء..... مكملين لاننا اصحاب حق حا ننتصر
    وبكره احلى

    ردحذف
  4. عبدالعزيز جمال17 أكتوبر 2011 في 6:14 م

    اسماء محفوظ انتى انبل واشرف بنت فى مصر وانتى بمية راجل وربنا يكرمك ويوفقك فى حياتك وان شاء الله ثورتنا هتنتصر .

    ردحذف
  5. أنا قربت أفقد الأمل في أصلاح مصر من كتر اللي بشوفه من الأنتهازيين, لما طلعت ثورة 25 يناير لم أذهل لوحدي, ذهل العالم كله معي, منين جاء الفكر التقدمي والحضاري ده, كل شاب قبل أخلاء الميدان بعد نجاح الثورة قام يكنس الميدان وينضفه, لم يظهر تعدي واحد على ممتلكات أو جوامع أو كنائس, ولما ظهرت هذه الملاحظات عز على هؤلا المنتفعين ومنتهزي الفرص, ومخربي البلد ان هناك فرصة لتخريب البلد وتشويه الثورة والندم على يوم واحد من أيام مبارك, وبدأت عملية تشويه الثورة بتخريب البلد وفرض البلطجية والصوت العالي وليس العقل والعضلات وليس الفكر, والسلاح وليس التفاهم, هؤلاء جميعا من نراهم في الصورة في رأي عبارة عن أدوات, ولكن المحرك لا نراه وهو أو هم المستفيدون من وراء ذلك, من من مصلحته ان تظل البلد في فوضى؟ ولماذا؟ ولمتى؟, وكيف؟ أما عن من مصلحته, فأقول انهم الأخوان المسلمون, هذا الفصيل الغني المنظم بكوادره الهدامه, فله كادر عسكري مسلح وكلنا رأينا صوره بالجرائد حينما أراد تهديد السلطة أيامها ويبعث برسالة للمجتمع وللسلطة مفادها نحن هنا ونحن قوة لا يستهان بها, وله كوادر سياسية وصحفية بل وبلطجية, بعد أن سمح له السادات بالعمل في المجتمع كما يشاء على أن يترك للسادات حرية الحكم كما يشاء, وعندما تصالح مع أسؤائيل قتله, أما عن أجابة لماذا فأنا لا أبالغ لو قلت أن هذا التنظيم من الخطورة بمكان, لأنه تغلغل في المجتمع وكون مجتمع داخلي متكامل يعمل لفرض سيطرته على كامل المجتمع, وكل من يعمل في هذا التنظيم فهو طامع في مركز من الدولة أو المجتمع أو على الأقل على منفعة ومصلحة يعني بالعربي يقبض له قرشين, فهو تنظيم يفوق التظيمات العالمية الأخرى مثل تنظيم المافيا لأن تنظيم الأخوان عالمي وليس محلي وله فروع بجميع أنحاء العالم وهو الذي خرجت من تحت عباءته جميع الحركات مثل التوحيد والهجرة والقاعدة وغيرها من الجماعات الحربية التي تبرأت منها الأخوان في حينها وهو عمل تكتيكي ولكن الحقيقة هو توزيع أدوار كما نرى الأن النزاع بين الأخوان والسلفيين, مع أنهم الأثنين يضعان في تنظيم واحد وهدف واحد وغرض واحد ولكنه كما قلت توزيع أدوار, أما عن أجابة لمتى, فهو لحين تنفيذ كافة أهدافهم, فالهدف الأن الأستحواذ على البلد ومجلسها وهذا هدف قريب, أما الهدف البعيد فهو فرض الأسلام وقوانينه على كل بلاد العالم بالمختصر المفيد انهم يحكموا العالم تحت مسمى الدين, يعني أجابة إلى متى تكون لحين نرى العالم كله تحت أمرة المرشد العام وهو من يعين الرؤساء وعليهم دفع الخراج والجزية والزكاة للمرشد الذي يصرفها كما يحلو له, أما كيف يصل لهذا؟ ببساطة بأموال السعودية الوهابية التي بدأو التعاون معها من بداية تكوين التنظيم في الثلاثينات من القرن الماضي بمعرفة قائدهم حسن البنا وأيضا بقتل ونهب أفراد الشعب المسيحي والمتعاون معهم من المسلمين, ونهاية مقالي أتريدون مني التفاؤل؟؟؟؟ أعطوني مؤشر واحد ولنرى مجلس الشعب القادم

    ردحذف
  6. سياتي يوم تظهر فيه الحقائق وسيظهر من ضحي بنفسه من اجل بلده ومن باعها فلا تحزني من الهجوم عليك فهناك الكثير ون ممن يعرفون ما قدمتي من اجل مصر

    ردحذف
  7. أسماء أنت بمليون رجل ممن يهاجمونك لقد رايت الفيديو الذى سجلتيه قبل 25 يناير وتعجبت كيف تكون بنت فى مثل هذه الشجاعه . بارك الله فيكى وفى زملائك وزميلاتك الأحرار .

    ردحذف
  8. حبيبتي اسماء الشجره المثمره دائما ترمى بالحجاره فكوني كالشجره التي جذورها ثابته وفرعها في السماء ولا تنحني امام العواصف الترابيه السخيفه والتي لاتأتي الا بالاوبئه ونحن كلنا مللنا هذه الافتراءات على اناس مثلك كانوا رمزا لثوره نبيله افاقت الجميع من غيبتهم استمري اختي الغاليه ولكي مني كل التقدير والاحترام لمواقفك الجريئه والشجاعه التي نادرا ما نرى الان رجالا يتخذوها واريحي بالك فالكل الان لايملك سوى الانتقاد واعلمي (( لوطعنت من الخلف فاعلم انك عظيم))

    ردحذف
  9. ليس الحق فيما نقول فقط ولكنه في أن نفعل ما نقول ... وقد قلت وفعلت ... فلك الحق أن تعلمي أنك على حق ... والله يوفقك ويحميكي وهو حسبك ...
    دكتور شكرى حمد

    ردحذف
  10. بجد انتي انسانه هايله وربنا يبارك فيكي

    ردحذف
  11. دع الكلاب تنبح والقافله تسير
    بس أهم حاجه يا سموءه اننا نهدى شويه لما نشوف حاجه نسميها
    بعد كده لو ما عجبناش اللي حيحصل احنا مش سهلين خالص وانتي عارفه كده كويس
    الاراده والعزيمه موجودين ونقدر وحنقدر نعمل اللي احنا عايزينه من غير ما نبقى أوووفر we caaaaaaaaan

    ردحذف
  12. انا مقدر قدرك لدورك ومحاولنك لخلق اهداف نمشي عليها بس نا عايز اسالك سؤال مهم جدا هوه الكلام ال حضرتك بتقوليه واصل لكام واحد في مصر وكام واحد قادر يفهمه ؟؟؟ للأسف احنا شعب غلبته الأميه وقهرته الأمراضي وقلة الحيلة انا عشان أنجح وأوصل للأمال اللي الإنتي قولتيها مش هوصل من صندوق إنتخابات ولا هوصل بسياسة يا أستاذه اسماء انا هوصل بالعلم
    هوصل لما اخلي ابناء مصر كلهم متعلمين هوصل لما يطلع علماء اسمح بيهم جهل في السياسية وجهل ف الأمراض وجهل المياه الملوثة وهيبطلوا الهمجية على الأقل نوصل من ا ب ت مش صندوق إنتخابات اساسا معرفش مكتبو عليه ايه او هيؤدي إلى أيه صدقيني لازم نبدأ بتغيير المناهج دي ونتعلم بجد ونبتدي من الاول مش سياسة وحاجات مش بتفيد غير اصحابها

    ردحذف
  13. مصري بيحب بلده18 أكتوبر 2011 في 4:16 م

    يظهر يااسماء انتي كاتبه المدونه دي من بدري ومع ذلك كل التعليقات جديده غريبه كل حاجه فيكي وبتعمليها غريبه ارجو النشر والحدق يفهم

    ردحذف
  14. ربنا يحميكى يا اسماء

    ردحذف
  15. أعوذ بالله منك ومن شرورك وتفكيرك

    ردحذف
  16. هههههههههه-اسماء الحقي استخبي لحسن يطبق عليكي قانون الغدر زي الناس اللي طالبوا بيه في بدايته

    ردحذف
  17. انتى ملعوب بدماغط انتى بتمشى عكس التيار البلد كدا اجمل اتركيها تستقر ولا تتهورى ولا تنظرى الى من ينفخون فيك من الخارج والداخل ويمجدون فى انجاذاتك فوقى لنفسك والا كدا هانشك انك فعلا خاينه وقابضه

    ردحذف
  18. ايوه اخوانى كل حاجه اسماء دى عملاها من بدرى وكل شىء مخطط له بعنايه شوفوا فيديوهاتها فى اول الثوره وهى بتقول للناس بس انذلوا ونتكلم مش عا يذين مبايك يمشى احنا بس عيذين يغييي وبتدفع الناس للنذول وبعد كدا محمد عادل ورفاقع من الجناح العسكرى ها يقودوا مهمد تحفيذ الناس على عمل عنيف وما اكثرهم فى بلدنا وشوفوا فيديوهتها فى ايام الثوره كانت بتقول لاذم يرحل وبينت الغرض وكشرة عن انيابها وشوفوا فيديوها تها وهى بتتكلم عن المجلس العسكرى نفس الخطوات تقول للناس انذلوا احنا مش عيذين المشيي يمشى وبعد النذول تعمل فيديو يقول الجيش مش المجيس واخيرا السيا رات التى دهسة الا قباط كما فعلوا مع المتظاهرين ايام الاثوره يبقى كل شىء مترتب يا اسماء ودى حكومه كامله متكامله رئسها البرادعى وهم لن يقبلوا رئيسا غيره هو او ايمن نور او من على شا كلتهم والا البل تخرب فتن وان قسا مات فوقوا بقى

    ردحذف