الثلاثاء، 25 أغسطس 2009

اهالي عين شمس اخدوا حقهم بايدهم

التجمع كان امام حي عين شمس الساعة 10 صباحا
مكنش في عدد كبيير من اهالي حي عين شمس
بس كان في عدد حوالي 15 واحد من بيوت متفرقة
وكانوا جايين ومتخوفيين وعندهم تساؤلات
ياترى هنروح هنلاقي حد معانا؟
طب حد هيسمعلنا؟
طب ولو سمعو حد هيعملنا حاجة؟
اتكلمت معاهم الاول قلتلهم احنا ندخل تقابل رئيس الحي ونوضحله المشكلة ومنمشيش الا لما يحصل تصرف
طبعا كلهم اجمعوا انه مش هيقابلنا . فاتفقت معاهم قلتلهم احنا عددنا مش قليل احنا هنقف هنا ومش ماشيين الا لما يقابلنا او نصطاده وهو خارج
فدخلنا نسأل على رئيس الحي وقلنالهم بخصوص الزبالة ... والموظف اللي على الباب واحد طول بعرض كده قالنا لفو من الباب اللي
ورا قدموا شكوى في الشباك وهنبعتاله ان شاء الله
فعلينا صوتنا وقلنا مش ماشيين الا لما نقابله
فاتصل بسكرتيرة رئيس الحي ورجعلنا قالنا واحد بس منكوا هو اللي يطلعله
قلناله مش هنتحرك من هنا الا لما كلنا نطلع
وفي غيرنا كتيير ممكن نتصل بيهم يجوا كمان
وصممنا على موقفنا لحد ما طلعنا الدور الاول اللي فيه المكتب بتاع رئيس الحي
طلعلنا موظف واقف على مكتب السكرتيرة قالنا عايزين ايه والموضوع بخصوص ايه قلناله الزبالة الي في شارع احمد عصمت
قالنا مش هينفع تقابلوه الرئيس مش بيقابل حد
سألناه طيب يعني نعمل ايه؟
قالنا اكتبوا شكوى وهبقى اديهاله
قلتله لأ احنا بقى مش متحركين من هنا الا لما نقابله وادينا قاعدين
حاولو يتفاوضوا مع الاهالي ويهدوهم عشان يمشوا
قمت قلتلهم لو مش هتدخلوله يبقى مش هتعملوا حاجة
لازم نتكلم معاه
قالنا طيب دقايق وراجعلكوا
ساعتها قمت بعت لكل الصحفيين رسالة بتقول ان رئيس الحي رافض يقابلنا ونزل بيان باسم شباب 6 ابريل بنقول فيه ان رئيس الحي
تقاعس فيه عن واجبه ورافض مقابلة الناس
سمعنا السكرتيرة بتكلم حد وبتقوله " هي صغيرة مش كبيرة في العشرينات كده ... بس بتتكلم كويس وهي اللي بتقود الاهالي ... طيب
حاضر تمام ساعتك حاضر مع السلامة"
وبعتتلنا الموظف وقال عايز واحدة بس تدخل فقلتله انا هدخل بس مش هدخل لوحدي هدخل على الاقل اتنين معايا كمان من الاهالي
ووافقوا
دخلنا قابلنا رئيس الحي ومعاه حد كده معرفناش بنفسه ولابس بدلة بيضا متشيك اووي وشكله مش مريحني كده
المهم
السلام عليكم وعليكم السلام
اتفضلوا ايه مشكلتكوا
ابتديت الكلام وقلتله احنا مش لوحدنا في برة 15 واحد كل واحد بينوب عن العمارة اللي ساكن فيها ولسة في ناس تانية المشكلة اللي
هقول لحضرتك عليها دي مشكلة الحي بحاله اللي حضرتك رئيس ليه
وهي مشكلة الزبالة
لقيته قالي انا شخصيا قرفان وانا مش مقصر في حاجة دي اصلا مش مشكلتي بس هي في وشي في الاول وفي الاخر
قلتله طب دي مشكلة مين؟
قالي دي مشكلة هيئة النظافة وشركة النظافة
قلتله طيب هم مش بيعملوا حاجة وحضرتك رئيس الحي واي تقصير من اي هيئة في الحي حضرتك اللي بتصعد الموضوع للمحافظ
قالي انا قدمت بدل الشكوى 1000 للمحافظ وقلتله عايز معدات وانا اخلي عين شمس دي اضف حي في مصر وهو معملش حاجة
وطالبت ان الصفقة بتاعة شركة الزبالة مع المحافظة تتلغي ومتلغتش
قلتله متلغتش ليه
قالي اكيد انتي فاهمة بلاش نفتح في مواضيع تانية
راح الاتنين من اللي الاهالي اللي كانوا معايا قالوله حضرتك انقل الصندوق بتاع الزبالة واحنا هنجيب بلطجية على حسابنا نمنع اي حد
يجي يرمي زبالة هنا بس تعالوا نضفوها
قال طيب هنشيل الصندوق
قلتله طب ما المشكلة مازالت قائمة هتنقل الصندوق من مكان هتوديه في مكان تاني علمنا احنا ايه
قالي انتي مشكلتك قدام بيتك؟ ههحلهالك
قلتله لا انا يهمني ان الحي كله يبقى نضيف
قالي انتي اتكمتي كتيير انا عايز اسمع راي الناس التانية
فقالوله حضرتك نضف قدام بيوتنا بس عشان البنزينة ومش عايزين كارثة تحصل لو حاجة ولعت لا قدر الله
راح بصلي وابتسم قالي كده تمام هشيل الزبالة واشيل الصندوق واعلمكوا رصيف ونجمل المكان
قلتله حضرتك بقالك سنة في الحي لما المحافظ مش بيستجيب ليه مصعدتش الموضوع ده؟؟
قالي متتكلميش معايا بالاسلوب ده انا لواء مخابرات سابق
ولقيت بلطجي واحد زي بتوع امن الدولة اللي بنشوفهم ولابس نضارة شمس وجه وقف ورايا بالظبط
بصيت ورايا لقيت ركب بني ادم
قلتله انا مواطنة مصرية ومن حقي اعيش في مكان نضيف وحضرتك رئيس الحي ومسئول مسئولية كاملة عن الحي
قالي يابنتي متناهديش انا والله تعبت بس دي سلوكيات شعب
قلتله لااااااااااااا من فضلك
نفس الشعب دول كانوا موجودين زماان والمكان كان نضيف عملتوا صفقة عربيات الزبالة البلد كلها بقت زبالة
يبقى العيب مش في الشعب
قالي احنا بنشيل الزبالة والعربجية بيجوا يحطو زبالة تاني
قلتله ودي بقى مسئولية مين؟
قالي واحنا مالنا بقى
قلتله طيب هخلي العربجية دول يروحو عند بيت الريس ونشوف مشكلة مين؟
قالي الريس مش هيعرف يعمل حاجة
قلتله نعم؟؟؟؟؟؟؟؟؟
قالي يابنتي ده تقصير من الكل
من هيئة النظافة للمحافظة للبوليس اللي مش بيمسك العربجية دول
قلتله خلاص اشتكيهم
قالي وانتي فاكرة اني مشتكتهمش
انا عملت كل الليي عملته والله العظيم واقسم بالله اقسم بالله انا مش مقصر
بس محدش بيعمل حاجة
وقالي عموما مشكلة اهالي الشارع اللي جم انا هحلها وهنضف الشارع كله
وجابلنا مهندسة الحي واتفق معاها على تجميل الشارع
واتصل بمساعد رئيس الحي قاله تنزل تشرف بنفسك علىنظافة الشارع دلوقتي عايزهم يروحو بيتهم يلاقوا الشارع نضيف
وقالي انتي اسمك ايه؟
قلتله اسماء محفوظ
قالي يا اسماء يابنتي متفتكريش اني مقصر والله انا بعمل اللي عليا
قلتله على العموم انا اسفة لو كت انفعلت عليك ولما نشوف اللي هيحصل ايه
روحنا لقينا فعلا بلدوزر وعربيات جاية مش من الشركة دي جاية من المحافظة نفسها
وبينضفوا
والاهالي فرحوا اوووي انهم علموا حاجة
لقيت مساعد رئيس الحي بيدور عليا وبيديني موبايله وبيقولي رئيس الحي عاوزك
كلمته قالي شفتي نفذت وعدي اهو
قلتله لا ده نص الوعد بس لما نشوف هيكمل ازاي
قالي هنكلمه باذن الله
وانا بكرر اسفي لو كنتي زعلتي مني وخي موبايلي وفي اي وقت مكتبي مفتحولك
وانا والله نفسي انضف مصر كلها
قلتله طب ايدي في ايدك اقدر اساعدك في حاجة
قالي اعملي اللي انتي عايزاه بس م غير ما تسيئي لحد
انتي فاهمة وانا فاهم
صح
ودي كان المرحلة التالتة من واسطتك مصريتك

الاثنين، 17 أغسطس 2009

توزيع ورق يشجع الناس تروح تشتكي في الحي في حملة واسطتك مصريتك

نزلنا انهاردة عشان نتكلم تاني مع الناس ونقولهم اننا لازم كلنا نتحرك ونكون ايد واحدة عشان نجيب حقنا من الحي
وكتبنا ورقة توعي الناس ونقولهم على عنوان الحي والميعاد اللي هنتجمع فيه
وزعنا الورق على الناس ووعيناهم والناس اخدت مننا الورق وابتدوا هما كمان يوزعوا ولزقنا في مداخل العماير وحطينا الورق تحت المساحات بتاعة العربيات
الناس نفسها تعمل حاجة بجد بس فعلا محتاجة اللي يزقها ويشجعها
المصريين مش وحشين بس هما مظلومين وضحايا التعليم والاعلام البايظ ده
بس كان يوم حلو وخصوصا ان في ناس قابلتها كنت اتكلمت معاهم قبل كده
لقيتهم قالولي احنا صورنا فيديو الزبالة وصورنا مع الناس نبعتلك الحاجات دي فين
بجد في ناس تعاونت معانا جامد
دي بقى نسخة من اللي تم توزيعه انهاردة حملة واسطتك مصريتك
شارك معانا وخليك ايجابي
بقالك قد ايه بتشتكي من الزبالة اللي في الشارع قدام بيتك وفي الشارع اللي ساكن وتقريبا في كل شوارع عين شمس؟؟؟
انت عارف ان في ناس كتيير اوووي في عين شمس جاتلهم امراض بسبب الزبالة دي؟
انت عارف ان في احياء تانية كانت الزبالة عندهم كده وسكتوا عليها لحد ما جاتلهم امراض كتيير والحكومة ولا سألة فيهم
طيب انت عارف البنزينة في شارع احمد عصمت مثلا اللي قدامها مقلب زبالة لو اي واحد وقعت منه سجارة فيها وولعت والنار جت
جمب البنزينة ايه اللي ممكن يحصل؟؟ دي هتبقى كارثة اسمها كارثة عين شمس والحي ولا هو هنا
انت ممكن تكون اشتكيت مرة والحي مستجابش وممكن يكون غيرك كمان اشتكى والحي مستجابش بس مينفعش نزهق ونستسلم للزبالة
اتخنقت كام مرة انت وجارك اللي في العمارة اللي جمبك عشان هو جاب الزبالة اللي قدام بيته وحطها قدامك وانت عملت نفس الشيء؟
اكيد طبعا الخناقة وصلت للضرب مش كده؟
طيب انت ذنبك ايه وهو ذنبه ايه؟؟
دي مسئولية الحي اللي معملش اللي عليه وشال الزبالة دي
ولو بيشلها مرة الصبح والعربجية بيجوا يرموا مخلفات البناء تاني .. دي مش مشكلة العربجي دي مشكلة ان الحي مش عايز يراقب
ويحط عمال نضافة في الحي تواظب على تنضيف الحي
مش لازم يكون لينا واسطة في الحي عشان يشيلوا الزبالة من قدام بيتك او المحل بتاعك
انت انسان ومواطن مصري من حقك تعيش في حي نضيف زي بقيت الاحياء اللي بيسموها راقية ... يعني هما بني ادمين من حقهم في
حي راقي واحنا خنازير نعيش في الزبالة؟؟
دي مسئولية الحي من ضمن مسئوليات كتيير مش بيعملها
خليك ايجابي وتعالى كلنا في وقت واحد وفي يوم واحد نقدم شكوى جماعية من اهالي عين شمس عشان نطالب بحقنا بحي نضيف خالي
من الامراض ولما نكون كلنا في وقت واحد رايحين هيكون صوتنا اقوى وشكوتنا اكبر
ولو رئيس الحي معملش حاجة هنصعد الموضوع للنائب العام وللاعلام
هنتجمع كلنا الساعة يوم الاربعاء 12 اغسطس الساعة 10 صباحا امام حي عين شمس
العنوان : ناصية شارع عبد الحليم محمود مع شارع حسونه من شارع 6 أكتوبر
http://shabab6april.wordpress.com
shabab6april.mov@gmail.com

تحيا اهالي عين شمس تحيا المصريين

ونزلنا عين شمس تاني
اللي هي منطقتي وانجي وخليل واحمد وشيرين نزلنا مع بعض
الاول عملنا حملة استقصاء عن اكبر مشكلة بتواجه المنطقة
ولقينا ان المطقة وده واضح انها تحولت لمقلب زبالة
وصورنا وعملنا حوارات مع الناس
كتبنا شكوى بقى انهاردة ونزلنا نمضي الناس عليها ونوعيهم بحملة واسطتك مصريتك
في انواع كتيير جداا من الناس
وكل المستويات
كل واحد فينا اتنشر في مكان عشان نمضي اكبر عدد ممكن
المهم
الناس اللي قابلتهم بقى
كل واحد فيهم بيسال انتي محامية طب انتي مين
فقلتلهم على اسمي وشاورتلهم على العمارة اللي ساكنة فيها فاطمنوا انهم يتكلموا
قلتلهم بقى احنا شباب 6 ابريل واحنا مش شباب فاضي انا بشتغل 11 ساعة في اليوم وبدرس كمان بس انا مش قادرة اسكت على ظلم الحكومة لينا
وكلمتهم على الضرائب اللي بيدفعوها ومش بيستفيدوا بيها
فالناس تواجبت جداا والكلام ابتدى يتفتح بقى ورئيس الحي اللي مش بنشوف وشه الا لما يجي يعمل اشغال طريق فياخد فلوس ويمشي
والشرطة اللي بتيجي تبلطج على الناس وتاخد فلوس وتمشي
وكلام بقى ايه وكانوا شافوا الكائنات الفضائية اللي بيسمعوا عنهم في الجرايد بيعتقلوا كل يوم ناس زيهم عاديين
الحلو بقى سمعت تعليق حلو اوووي
جمعت صحاب كام محل كده جمب بعض وقعدت اتكلمت معاهم وصوتي طبعا كان عالي فناس تانية جت تشوف في ايه
صوتي مش عالي بزعق بس التون كانت عالية
فواحد بيقولي انا خايف يتقبض عليا انا مالي ومال الحكومة
واحد قاله مش عيب عليك تشوف بنت زي دي صغيرة ونازلة بنفسها تتكلم مع الناس ومش خايفة
وانت ياراجل ياالي بشنبات خايف
قالي لا انا مش خايف انا بس كفاية مشاكلي
قلتله بزمتك اتخنقتوا كام مرة مع بعض عشان الزبالة كل واحد يرميها قصدا المحل التاني
قالي كتيير كل يومين نتخانق ونتصالح
ووصلت للضرب كمان
قلتله مش عيب طيب لما تضرب اخوك وحبيبك وانتوا الاتنين اصلا ملكومش ذنب
وسايبيين في اللي سارقينكوا
انت عارف انك هتتحاسب على حقوقك الضايعة دنيا واخرة
الرجال وزن الكلام وقالي طيب انا همضي وهشوف ايه اللي خيحصل
وسيبيني افكر شوية
لقيت اللي معاه اخدوا الورق ومضوا باسمهم وكتبوا اسامي اخواتهم اللي ساكنين معاهم
واسامي مراتتهم
وكانوا فرحانين اووي
قالولي ربنا يباركلك وبتاع وايه بقى شباب 6 ابريل دي
احنا بنسمع عنها في الجرايد
فضلت احكيلهم بقى هدفنا ومشوارنا فرحوا بينا اوووي
اما البنات بقى ياعيني على البنات
ادولي ارقامهم وعايزين ينزلوا معايا المرة الجاية
وواحدة متجوزة قالتلي ده اسم جوزي وشغلته اهي
حاولي تخلوه معاكو بدل ما هو مكبر من الدنيا كده
وقابلت واحدة وجوزها اتخنقت مع جوزها وقالتلوا انا همضي انا انسانة وليا حقوق
وهو عمال يشدها ويقولها خلينا في حالنا قالتوا ياراجل بطل سلبيتك دي هنجوز بنتنا ازاي بالزبالة دي
وحاجات كتييير اوووي بس بجد تعبانة ومش قادرة احكي دلوقتي
هنام بقى وبكرة لما افتكر الباقي هحكيلكوا عليه
بس حقيقي
تحيا اهلي عين شمس
وتحيا المصرييين
ووجودي في وسط الناس دي احسن مييت مرة مع التعامل مع السياسين
الناس المصرية بجد جميلة
كده عين شمس والخصوص
هاا ميين هينزل تاني منطقته يشوف اكبر مشكلة ويجمع الناس عليها عشان تحلها؟؟؟