الجمعة، 24 يونيو 2011

رفقاً بالشعب يا نخبة

 

من سنييين لقبل 25 يناير كان في ناس بتناضل ضد نظام مبارك منهم سمعنا عنهم ومنهم منعرفهمش ولا عمرنا سمعنا عنهم

وكان في احزاب منهم كتيير بنسميهم احزاب كارتونية ومنهم مكنش ليهم تواجد في الشارع الا في بداية تأسيسهم وبعدين حصلو صحابهم

مؤتمرات وندوات وتنظير ملوش اول من اخر وكان المشهد مقسوم نصين ملهمش اي علاقة ببعض نظام مبارك مبرطع في اللبلد زي ما هو عايز مع نخبة من السياسين مشغولين في التنظير والخناق مع بعضهم احيانا والنفاق لبعضهم احيانا ... اما النص التاني فكان الشعب اللي مكنش عنده وقت من حسرته على عيشته انه يقرا او يتكلم او حتى يسمع عن السياسة

حتى الاخوان المسلميين تواجدهم مكنش سياسي على قد ما كان اجتماعي وخيري وطبعا اقصد في الشارع مع الناس

يمكن الحراك السياسي في الشارع شد حيله حبتين من حركة كفاية وحركة شباب من اجل التغيير مع ظهور حركة استقلال القضاة والاخوان المسلمين وفي 2008 حركة 6 ابريل وبعدها بسنتين حركة العدالة والحرية

وكان العامل المساعد الاعلام البديل مع شراهة النظام في الفساد والتزوير والبطالة والفقر وملف التعذيب مع ازدياد الاسعار بشكل جنوني ومشاكل ملهاش اول من اخر وكل ده ازداد جداا مع 2010 بمقتل خالد سعيد وظهور صفحة كلنا خالد سعيد ومظاهر الاحتجاج السلمية الحديثة وتزوير الانتخابات بالبجاحة اللي ظهرها شبكات الفيس بوك والتويتر واليوتيوب مع تفجير كنيسة القديسين وخروج الاقباط بمظاهرات شديدة جدااا وخروج المسلمين معاهم لاثبات الوحدة الوطنية وكانت المظاهرات في الوقت ده باالاشتباكات اللي حصلت لاول مرة من سنين بالحجم ده وقتها بين الشرطة والشعب واجهاضها كان عامل اساسي في كتمان الغليان للشعب المصري مع دور طبعا منظمات حقوق الانسان اللي كانت بتظهر اعلاميا كل اللي بيحصل

مع ظهور ثورة تونس ومتابعة الشعب المصري متابعة دقيقة للشعب التونسي بخوفه وتحمسه لحد فرحته بهروب بن علي

مع ظهور مصريين بادرو بحرق نفسهم امام مجلس االشعب والشورى على خليفة بو عزيزي التونسي يمكن حد يحس بيهم وثورة مصر تقوم

مع دعوة تحالف الحركات الشبابية ليوم 25 يناير وتصديق الشعب عليهم وكان اول مرة نلاقي ناس عادية بتطبع وتوزع بيانات لليوم

والناس كلها كانت بتحلم بالثورة في اليوم ده معادا السياسين كلهم كانو بيقولو دي مش ثورة دي بداية حراك شعبي

وفوجئنا كلنا ان تحرك الشعب كان اقوى مننا كلنا " والنون عايدة على كل العاملين بالعمل السياسي"

وكل السياسين انخرطو وسط الناس في محاولة لتنظيم الثورة بس كان بردو تنظيم الشعب لانفسهم كان اقوى مننا كلنا وكان اكثر ابتكارا حتى في الشعارات

وفؤجنا بالاعلام تحول من تمجيد النظام السابق الى تمجيد بعض شباب الثورة واظهارهم بمفجرين الثورة واختزال الثورة فيه

وكتيير مننا كنشطاء او سياسين صدقنا اننا اللي عملنا الثورة واننا اصحاب الفضل الاول على مصر ويمكن مننا من كتر خوفه على مصر والثورة كان بيحاول ينقذ ما يمكن انقاذه لكن تعامل المجلس العسكري مع بعض النشطاء من اصحاب النية الاولى او التانية خلانا

متصدرين المشهد بشكل مبالغ فيه قد يظن البعض انه خطأ وقد يظن البعض الاخر بانه كانت خطوة لابد منها

لكن المهم ان الناس حست انهم عملو ثورة ودفعو تمنها غالي اووي واكتشفو ان غيرهم بيمثلهم من غير اخذ رأيهم في اي حاجة

ومع ذلك سكتو وقالو دول مننا وعلينا

لكن شوية بشوية اكتشفو ان المجلس بيستخف بالكل من ناحية ومن ناحية تانية ان المتصدرين المشهد السياسي سواء من النخب الشبابية او من النخب السياسية الكبيرة بيتكلمو في وادي تاني خااااااااااااااالص عن اللي الناس عايزاه او كانت نزلت الشارع عشانه

كل المقدمة الطويلة العريضة دي عشان اقول ان النخبة معملتش ثورة الشعب هو اللي عمل الثورة

ممكن نقول ان في شباب وسياسين من النخبة تعبو شوية او كتيير في النضال ضد نظام مبارك لكن برغم التعب ده كان ليهم دور في الثورة لكن مش هما اللي صنعو الثورة ومفيش حد ليه فضل على حد

الشعب هو اللي ليه فضل على كل من اللي بيتكلم في السياسة

فلما نقول ان الشعب جاهل ومش فاهم واحنا اللي فاهمين واحنا اللي هنحدد ونقرر ونؤره يعمل اللي احنا عايزينه يبقى ايه الفرق بينا وبين مبارك؟؟؟

لما نقول الدستور اولا عشان الدمقراطية هتجيبلنا الحزب الوطني او الاخوان المسلميين عشان الشعب غير مؤهل للدمقراطية

يبقى زعلنا ليييييييييييه من عمر سليمان لما قال كده؟؟؟

ايه الفرق بينا وبين نظام مبارك؟ نفس سياسته بنفس اعلامه اللي كان بيطبقه احنا اللي بنطبقه دلوقتي

وبستغرب اوووي من مطلب منع الحزب الوطني من ممارسة السياسة لمدة 5 سنين؟!!!

ازاي نخااف ان الشعب ينتخب الحزب الوطني وهو الشعب اصلا اللي عمل ثورة عليه.؟؟؟؟؟ مش فاهمة

وبعدين لما نمنع رموز الحزب الوطني من السياسة هنقدر نمنع اعضائه ومخبرين امن الدولة اللي محدش يعرفهم؟؟

ولا ناخدها تلكيكة بقى ونعمل قايمة موحدة نفرض بيها شخصيات على الشعب عشان احنا شايفيين ان الشعب مش بيعرف يختار؟؟؟؟

اصل احنا لازم يعني بما اننا مش قادرين ننزل الشارع فنفرض نفسنا على الشعب عشان فاهمين اكتر منه؟؟؟

اللي مجنني ان نفس اللي كان بيحصل من النخبة قبل الثورة هو هو اللي بيحصل دلوقتي شوية تنظير واختلاق خناقات ملهاش لازمة

ولو سمعنا بعض اصلا ممكن نوصل لحلول ترضي الجميع بس ده لو احنا يهمنا مصلحة مصر اصلا لكن ده احنا حتى نسينا اصول المهنة وقاعدين نشتم ونخون ونستعمل اساليب غير شريفة بعض عشان البقاء للاقوى .. مش كده بردو؟؟؟؟

طيب ندخل في المهم بقى

دلوقتي بما اننا معملناش ثورة والشعب اللي عملها احتجاجا على كل اللي تم ذكره فاحنا معندناش رؤية

اتكلمنا عن ديمقراطية واكتشفنا اننا معندناش تعريف ليها ولو كان لينا تعريف كان زماننا رضينا بال77%

عمالين نعمل تحالفات عشان نبقى ضد الاخوان او الاسلاميين وعشان مين ياخد اكبر قدر ممكن من اللي الجاي

لكن ليه مفكرناش نعمل تحالفات لتكوين رؤية للفترة الانتقالية؟؟؟

ليه مفكرناش نعمل تحالفات وننزل للناس نسمع منهم ونتعلم منهم بدل ما بنتعالى عليهم؟؟

ليه مفكرناش نعمل تحالفات نشوف فيها مصيبة الاعلام اللي بيضيعنا كلنا ونشوف ازاي نخليه اعلام مهني قادر على قيادة المرحلة الانتقالية؟؟؟

ليه مفكرناش نعمل تحالفات مع جمعيات ومنظمات المجتمع المدني عشان نقدر نخدم الشعب باحسن وسيلة ممكنة؟؟

ليه مفكرناش نعمل تحالفات نفكر بيها ازاي نبني اقتصاد مصري قوي؟؟؟

ليه مفكرناش نعمل دورات تدريبية لكل الاحزاب لكيفية بناء برامج حزبية وتدريب كوادرها على االشغل الحقيقي في الشارع؟؟

ليه مفكرناش بدل ما بنتخانق على الدستور اولا ولا الانتخابات اولا ننزل للناس نسمع منهم عايزين ايه في الدستور وعايزين مين يكتبه؟

ليه مفكرناش نحلل مين ال77% بدل ما بنحطهم كلهم في خانة الجهلة والمنساقين ورا التيارات الدينية زي ما بتقولو؟؟

ولا اللي ضدنا يبقى جاهل ومنساق ورا القلة المندسة؟؟

ليه مفكرناش في التجارة السياسية اللي شغالة عمال على بطال في مصر دلوقتي وبيتصرف عليها ملايين وفي ناس بتموت من الجوع؟؟

ليه مبنفكرش نعمل تحالفات ضد المحاكمات العسكرية؟

ليه مبنفكرش نعمل تحالفات ضد اطالة الحكم العسكري في مصر؟

ليه مبنفكرش نعمل تحالفات لعلاج مصابيين الثورة وتكفيل افضل الرعايا ليهم؟

ليه مبنفكرش ازاي نحقق اهداف الثورة اللي الشعب نزل عشانها " عيش .. حرية .. كرامة ... إنسانية" ؟؟؟؟

معقولة احنا ورثنا نظام مبارك بكل سلبياته؟؟؟ معقولة لعنة مبارك بقت جوة كل واحد فينا؟؟؟

انا بسال وبشكك وبتهم ومش مستثنية نفسي من كل الاسئلة والشكوك دي

مفيش حد احسن من حد ومفيناش بطل طول محنا بنلعب بمشاعر الناس بالشكل ده وسايبيين الفساد بيزيد في البلد مش بيقل وسايبيين مجلس بيضحك علينا وعنده حق ما احنا مشغولين بالتقطيع في بعض

رفقا بالشعب يا نخبة .... رفقا بمصر يانخبة ..... فالصراحة مع النفس أولا قبل الدستور

هناك 12 تعليقًا:

  1. مشكلتك يا اسماء انك بتحاولي تكسبي كل الأطياف السياسية في مصر , مع ان في ناس كتير منهم زي الاخوان مثلا بيلعبو العاب قذرة ولم يلتفتو لمصلحة مصر علي قد مابيهمهم مصالحهم البرلمانية , وبتبصي لمصلحتك اولا مع انك ماكنتيش كدا زمان , تفكريك كله في مستقبلك انتي من ناحية المناصب , بس ماتنسيش ان الدنيا لما بترفع واحد مره واحده , بينزل مرة واحده علي جدور رقبته , راجعي نفسك تاني , وماتفرحيش بالسفريات واللقائات , كل ده ممنهج لتشتيتكم وعشان يبقي عندك ثقة في حكومة اساسا فاقدة للشرعية ولم نري منها اي انجازات , والدستور اولا عشان نضمن حقوقنا الي كلنا طالبنا بيها من اول يوم , وماتنسشي انك في يوم من الايام كنتي فرحانه اوي بعمرو موسي ومتصورة معاه انتي وبعض شباب 6 ابريل , وده خلي ناس كتير تشك فيكم وفي انتمائاتكم , ماتفتكريش انك لما قابلتي عمرو موسي يبقي انتي كدا خلاص عديتي , بالعكس دي وكسه

    ردحذف
  2. قال نبينا من لم يشكر الناس لم يشكر الله وأنا أشكرك جدا علي هذا المقال الرائع حقا ولست مجاملا ابدا بل هي عادتي الصراحة دائما وأريد أن أصف وربما اكون قاسيا علي تلك النخبة انهم ديكتاتوريين بهذه الاوصاف وليسوا ديمقراطيين نعم ديكتاتوريين وربنا يحفظ مصر من امثال هؤلاء

    ردحذف
  3. لا ودلوقتى اللى بيسموا نفسهم النخبة بيقولوا ع الاخوان الجماعة المحظورة ،،، يعنى حتى نفس مصطلحات نظام المخلوع استخدموها يارب ارحم الشعب من كل ولاد الكلب

    ردحذف
  4. اسما

    جزاك الله خيرا علي كلمه حق ترفعيها عاليه ليست في واجه سلطان ظالم كما في الماضي و لكن هذا المره ربما اكثر شجاعه لانه ضد رفاق الطريق الذي فقد منهم الكثير الزؤيه الواضحه و باتوا يترفعون علي شعب مصر مثل النظام السابق و اكثر لانهم وصلوا الي مواقفهم في اقل من اربع اشهر و اعتبروا انفسهم اوصياء علي الجيش الذي وقف خلفهم و الشعب الذي وثق بهم و خرج خلفهم ليهز جوانب العالم

    ادعوا لك بالتوفيق و كمال الهدايه

    وليد

    ردحذف
  5. بصى يا اسماء .. انا راجل حيادى 1000% .. أنا مع الثورة مليون% .. انا شرحت ليكى كثير و جهة نظرى .. بس انتى بتتجاهلى الشرح و ترجعى ترددى نفس الحجج و المغالطات .. و بتتهمى الناس و بتطلقى عليهم القاب .. و طلعتيهم برة الثورة .. و حطيتى نفسك جوه الثورة .. و انتى الشعب .. المقال بيقول كده .. مين من بتوع الدستور أوى قال ان الشعب غير مؤهل للديمقراطية ؟؟؟؟؟ الا اذا كنتى شققتى عن قلوبهم بقى .. و يعنى ايه مافيهاش حاجة ان الحزب الوطنى يرجع المجلس ؟؟؟؟ .. بصى بقى .. انا اتحداكى على رؤوس الأشهاد كلهم .. انك تثبتى ان الشعب المصرى لما راح صوت على الإستفتاء كان يريد تحديدا البرلمان قبل الدستور .. و انه تحديدا يرفض ان يكون الدستور قبل البرلمان.. اتحداكى و قدامك كل المستشارين فى الدولة روحى و اسأليهم و لو حد قالك نعن هذا تحديدا ما ارادة المصريون فسأصمت الى الأبد ....................... زمان كانوا بيبوسوا الأيادى علشان الناس تسيب الميدان و تعطيهم فرصة يشتغلوا .. و لو ما عجبهمشى اللى بيحصل .. يرجعوا الميدان .. دلوقتى الناس مش عاجبها اللى بيحصل .. و لما يطلعوا علشان يصلحوا اللى شايفينة غلط .. يطلع لهم من يسخر منهم و يسفه كلامهم و يطعن فى اغراضهم .. هى دى الثورة يا اسماء .. اننا نعض فى بعض .. كل مقول مش حعلق ثانى فى اى مكان للأسف ما بقدرشى اتحكم فى نفسى و بعلق ثانى .. الإستفتاء باطل الف فى المية و انتى سمعتى الفقهاء كلهم بيقولوا كده .. و انتى و غيرك عاملين ودن من طين وودن من عجين .. و برضة الإستفتاء و الإلتفاف على ارادة الناس و احنا بنعتبر الشعي غير مؤهل و زينا زى مبارك .. اسف جدا بس انتى فقدتى معالم الطريق و بضيعى الثورة و حاندمى بعدين اما تفلت من بين صوابعك زى الرمل الناعم ..

    عمرو

    ردحذف
  6. يا اسماء بعضمة لسانك قلتى انك كنتى موافقة على احمد شفيق و عايزة تبطلوا مظاهرات .. و بعدين اكتشفتى انك كنتى غلط .. اهوه الفيديو علشان تفتكرى

    http://www.youtube.com/watch?v=4wc-iMijnYY
    ليه اقالة حكومة شفيق .... أسماء محفوظ

    بس وقتها كان ممكن ترجعى فى كلامك .. لو سكتنا علشان حضرتك بتجرى فى ركاب الإخوان المسلمين .. حيبقى صعب قوى بعد الإستفتاء و البرلمان و الدساور و الرئيس و تكتشفى انم لبستى فى نظام مبارك خرفيا و لبستى البلد كلها فى هذا المأزق .. حتعملوا ايه فيه دم الشهداء ؟؟؟؟؟ حتقولى ايه لأهاليهم ؟؟؟؟ فوقى .. و لو ما فوقتيش يبقى انتى متعمدة مواقفك و عارفة انتى بتعملى ايه و قاصداه
    ع

    ردحذف
  7. أسماء مقالك منتهي الحقيقة والواقع ولكني لاتنسي الكثيرون لايصدقون الحقيقة خاصة إذا جاءت بعكس مصالحهم وحقيقة رفقا بالشعب يانخبة

    ردحذف
  8. هائله يااسماء كالعاده بس عندى استفسار بسيط الشعب لو نال مطالبه كلها ماعدا الوثيقه اللى اتضحك علينا فيها من المجلس (الدستور) هل الثوره هتنجح؟
    تحياتى

    ردحذف
  9. أجدنى لأول مرة مضطر للتدوينة مستقلة لماذا الدستور أولا !!!!

    ردحذف
  10. أولا مع أحترامى ليكى لكن انا سمحت لنفسى ان انقض مقالك فى 4 نقاط
    1: اقتباس من كلامك "حتى الاخوان المسلميين تواجدهم مكنش سياسي على قد ما كان اجتماعي وخيري وطبعا اقصد في الشارع مع الناس "
    وذكرتى مره آخرى " يمكن الحراك السياسي في الشارع شد حيله حبتين من حركة كفاية وحركة شباب من اجل التغيير مع ظهور حركة استقلال القضاة والاخوان المسلمين وفي 2008 حركة 6 ابريل وبعدها بسنتين حركة العدالة والحرية "
    حضرتك ذكرتى الأخوان بأنهم لم يكن لهم نشاط سياسى وعاودتى مرة آخرى وذكرتى بأن الحراك بدأ مع ظهور حركات متعددة ونهم الأخوان.!!!!!!

    2: اقتباس من كلامك " وبستغرب اوووي من مطلب منع الحزب الوطني من ممارسة السياسة لمدة 5 سنين؟!!!

    ازاي نخااف ان الشعب ينتخب الحزب الوطني وهو الشعب اصلا اللي عمل ثورة عليه.؟؟؟؟؟ مش فاهمة

    وبعدين لما نمنع رموز الحزب الوطني من السياسة هنقدر نمنع اعضائه ومخبرين امن الدولة اللي محدش يعرفهم؟؟"

    ماذا تريدين ان يُفعل مع حزب دمر مصر شعبا واقتصادا على مر ثلاث عقود, اى دولة محترمه ستفعل ذلك, ولو حضرتك مع مبدأ رآى الأغلبية فالأغلبية من الشعب المصرى لم تكن تريد حل الحزب الوطنى فقط بل كانت تريد سجن كل أعضاء الجزب فرد فرد.

    3: حضرتك بتجادلى فى موضع الدستور الجديد أولا , لو كنتى ديمقراطية لحترمتى رآى الأغلبية

    4: أنتى لستى فى دائرة المسؤلية ولا تعلمى كم الضغوط على المجلس العسكرى سواء ضغوط داخلية وخارجية, ومن أهم تلك الضغوط الضغوط العربية والدول العربية المستعده لطرد ملاين المصرين من أراضيها إذا تصرف المجلس العسكرى بطريقه حمقاء,
    ومن الواضح بأنكى لا تنظرين للمنطقة العربية المتفجرة بالأزمات والمتأججه بالصراعات, حرب ليبيا وانفصال السودان وثورة سوريا, وهنا وفى ذلك الجو الملأئم للمؤامرات بدات أمريكا والغرب فى محاولة نخر مصر وحاولة تقيضها سواء بأموال المسؤلين او غيره, فمصر الآن مخترقه والأحمق من لم يدرك ذلك.
    وأنتى وغيرك تريدين المجلس العسكرى بالتصرف تبع أهواء شباب ليسوا فى دائرة السياسة السوداء,

    يا ريت الا تعتبرى نقضى ليكى بأننى ضددك او ما شابه,
    اما بالنسبة لباقى المقال فهو رائع

    ردحذف
  11. أولاً : أحييك على عمقك البسيط ..
    ثانياً : لقد وجدت أغلب الناس ينظرون إلى مصلحة الوطن كلٌ من وجهة نظره الخاصة , ولكن كم هم الذين ينظرون إلى مصلحة الوطن من وجهة نظر الوطن ؟

    ردحذف
  12. موفقيييييييييين .... اختيار موفق :)

    Räumung
    Räumung Wien
    entsorgung wien

    ردحذف