الخميس، 23 يونيو 2011

حسن راتب وموقعة الجمل

وم الاتنين 31 يناير 2011

كان في لقاء على قناة المحور قبل اول مليونية في ميدان التحرير

وكانو بيحاولو يوجهو الحوار لمنع المليونية دي بأي شكل .. اقترحت ان تنزل شخصية من الجيش للميدان ويتكلمو مع الناس وينفذو مطالبهم انهاردة قبل بكرة عشان متحصلش كارثة وكان ساعتها كل الناس مرعوبة في الوقت ده

كان الرد من سيد وهناء اننا نجيب مسئول من الجيش على الهوا ونجيب عشرة من الميدان وتحصل مناقشة ما بينهم على الهوا قدام كل الناس

قلتلهم انزلو اسالو الناس في الميدان انا ماليش حق القرار وقلتلهم انا هخلص البرنامج وانزل على الميدان واسال الناس

بعد ما الحلقة خلصت لقيت حسن راتب بيقولي استنيني عايزة اتكلم معاكي بس هطلع اقول كلمة وارجعلك وجيت اشوف الكلمة لقيت المنتج بتاع القناة قالي تعالي اتكلم معاكي شوية ولهاني اني اشوف حسن راتب بيقول ايه

عرفت بعد كده انه قال انه اتفق معايا ان بكرة هيجيبو عشرة شباب وانا اللي هخترهم عشان يتفاوضو على الهوا وده محصلش

طلع لي حسن راتب بيقولي انا عندي معلومات سرية ولازم تعرفيها

قلتله خير؟

قالي حزب الله وايران جايين بكرة الميدان هيدبحو في الناس ويولعو في البلد

اللهم اني بلغت اللهم فاشهد

ساعتها عرفت ان الحزب الوطني كالعادة بيطبخ مصيبة وهيلبسوها لحزب الله وايران

عربية القناة نزلتني قبل التحرير وكان معايا ابن عمي معايا

ومشينا لحد ماسبيرو ولقينا كان في مظاهرة ورايحين يحتكو بالجيش ولقينا الدبابات بتتحرك وابتدت تضرب نار على الهوا

نزلنا تحت العربيات وندينا على ظباط الجيش قلنالهم احنا عايزين ندخل الميدان

فسابونا ندخل وجرينا على الميدان ولما رحت سمعت كلام غريب ان ناس ابتدت تلف على الميدان بميكرفون وتقول أسماء محفوظ لا تمثلنا هي باعتنا للحكومة وتفاوضت معاهم

ولما دخلت الميدان لقيتهم مش قابلين مني اي كلام خالص وكانو بيعتبروني خلاص عميلة حاولت اقولهم كلام حسن راتب قالولي انتي مش هتخوفينا انتي خلاص بعتينا

وناس ابتدت تشتم وواحد قال لابن عمي خدها وامشي بدل ما تتضرب

مشيت ومكناش اصلا عارفين هنروح ازاي في الوقت ده وكنت منهارة ومش عارفة اصدق اللي بيحصل

وكان كل الناس حتى صحابي بيتصلو بيا يشتموني ويقولولي انتي بعتينا يا بنت كذا ويا بنت كذا

ده غير تهديدات بتوع امن الدولة وشتايمهم

فضيلنا ماشيين لحد ما بين رمسيس وما بين غمرة ولقينا تاكسي واترجيناه يوافق يوصلنا وكان خايف البنزين ساعتها يخلص منه ومفيش بنزينة فاتحة بس كان ناقص نبوس ايده عشان يوافق يودينا اي حتة

مش مهم اصلا الحكاية دي كلها ولا اللي بعد كده

المهم من القصة اللي حصل مع حسن راتب وانه كان عارف اللي هيحصل يوم موقعة الجمل

وافتكرت الكلام ده لما شفت المحور دلوقتي وسالت نفسي ازاي القناة دي لسة شغالة وسالت حسن راتب فين من القضايا

زهلت انه لسة برة ومحدش حتى وجهله اي تساؤل

هناك 9 تعليقات:

  1. فكرتيني باليوم ده..يومها سمعنا ان اسماء محفوظ بتقول ان عمر سليمان وافق على كل حاجة و اننا لازم بقى نطلع..وواحد قاللي هي البنت دي ايه لازمتها اصلا في القصة دي علشان تتكلم باسمنا..الكلام ده كان يوم 31 بليل لما كنا مستنيين المليونية تبدأ..بس مع الوقت و مرور اليوم بسلام و كتر الاتصالات الغريبة اللي وصلت لينا يومها من اشخاص مانعرفهمش و الناس اللي كانت بتوقفنا في الشارع تقولنا ارجعوا عن اللي في راسكم ده الراجل خلاص عين نائب عاوزين ايه تاني..ادركت ان كل الكلام ده كلام فارغ و ان حرب الاشاعات بدأت و كنت معايا حق

    ردحذف
  2. انتى مفروض تبلغى - دى شهادتك وحدك المفروض تبلغى النائب العام

    ردحذف
  3. أنا شفت بعينى ناس بتقف عند المداخل البعيدة للميدان زى عند دار القضاء العالى و يقولوا للناس اللى رايحين الميدان إنهم شافوا ناس كتير فى الميدان من حزب الله و حماس و أجانب و عرب و إن أحسن لهم ما يدخلوش الميدان لإن النظام لو هيمشى هيطربقها على الناس اللى جوه الأول - فيخوفوا الناس و كان شكلهم منظمين

    ردحذف
  4. وحضرتك معرفتيش لية الكلام دة من 6 شهور فاتت

    لية مفتكرتيش الكلام دة قبل ما زميلتك انجى حمدى من قيادة 6 ابريل تشتغل معاهم

    لية وانتى بتفتكرى الكلام دة وتستغربى القناة لسة شغالة ان القناة خصصت برنامج صوت التحرير علي قناه المحور لحركة 6 ابريل تقدمة زميلتك

    طب اذا كانت القناة مش محترمة ولها اهداف بعيدة عن الوطنية والثورة لماذا اهتمت القناة بالترويج ل 6 ابريل إلا اذا كانت القناة متأكدة ان 6 ابريل لها نفس الاهداف الغير وطنية وحركة مش محترمة يقودها عيال تأخذ تعليمات من امن الدولة وشو وطنى وإلا لم تخصص لشوية عيال برنامج

    ردحذف
  5. يا ناس لازم تثقوا بأسماء وكفاية تساؤلات زي هيك

    ردحذف
  6. كلام مهم

    ردحذف
  7. تقصدى ايه بسنة 1977

    ردحذف
  8. حماكي الله وراعاكي انا فخور ان مصر بها بنات مثلك وكنت اتمني ان بنتي تكون مثلك لكنها ليس لها في السياسه ومتفرغه فقط لعملها كطبيبه ..... تقبلي تحياتي وتحيات شعب السويس بأكمله
    فأنا لي الفخر اني من السويس الحرة

    ردحذف
  9. موفقيييييييييين .... اختيار موفق :)

    Räumung
    Räumung Wien
    entsorgung wien

    ردحذف