Wolf-Inside

خلطبيطة!!!

2011-10-08T14:17:00.001+02:00

اغلبنا كان مستني الانتخابات بفارغ الصبر عشان نمارس اول خطوة في طريق الديمقراطية اللي بنحلم بيها

وكان اقصى تخوف البعض ان الاسلاميين هما اللي يسيطرو على الانتخابات لانهم الاكثر تنظيما .. وانشغل البعض في محاربة الاسلاميين وتم تقسيمنا انقسامات عديدة واشهرهم معركة " نعم و لا " اللي نتيجتها كانت اعلان دستوري ملوش علاقة ولا بنعم ولا بلا

وفضلنا في معارك جانبية وسيبنا حكومة انصار نظام مبارك يشكلو لجنة عليا لشئون الانتخابات مكونة من خبراء في تزوير الانتخابات من 2005 ... وشكلو اسوأ نظام انتخابي ممكن ان يكون بأسوأ تقسيمة دوائر مع قتل حق المصريين في الخارج في التصويت

في ظل غياب أمن متعمد ... واعلام مضلل موجه لقتل اهداف الثورة ولقتل معنويات الشعب المصري

في ظل وجود وجوه جديدة لاعضاء الحزب الوطني بفلوسهم وحيلهم وبلطجتهم

ودلوقتي بنقول يلا نستعد للانتخابات !!!!

لما اغلبية الشعب ميعرفوش هما تابعين لاي دائرة انتخابية ولما اغلبية الشعب مش عارفين هما هينتخبو ازاي اصلا

ولما اغلبية الناس اللي بتتكلم عن العمال واقصد بالعمال كل القطاعات .. بيتكلمو عن ان مطالب العمال مطالب انانية واستغلالية

وللاسف العمال دول مفيش ممكن يمثلهم في الانتخابات واللي هيمثلهم بقانون ال50% كلنا عارفين هيكونو جايين منين

وبنتكلم عن انتخاابات؟؟؟ اللي هي اول طريق للديمقراطية؟؟؟

ااااه انا قلت قبل كده ان الدستور مش قرأن وممكن يتغير .. لكن كنت اقصد لما الدستور يتم بديمقراطية حقيقية مش سرقة ونهب علني!!!!

ااه انا قلت الانتخابات أولا ... لكن انتخابات نزيهة فعلا تكون تكملة للثورة العظيمة اللي بدأناها!!!!

اااه انا قلت انا عايزة اترشح في الانتخابات ... لكن مقلتش اني عايزة اشارك في فيلم هندي بايخ!!!!

ازاي نفكر في انتخابات اللي بيحط قوانينها بيبلطج علينا عشان يحمي نفسه ويحمي النظام السابق

ازاي نثق في العملية الانتخابية واللي بيديرها بيغير كلامه في كل بيان!!!!

انا مش متشائمة ... لكن بحاول افكر معاكم بصوت عالي .. ونحاول نشوف الصورة واضحة وناخد قرار

هل نحن نريد انتخابات نزيهة بجد تعبر عن العملية الديمقراطية .. ام نريد ان نريح ضمائرنا بالمشاركة في تمثيلية هزلية؟

هل نحن استكملنا المرحلة الواجب استكمالها من الثورة لنكون مستعدين لخوض اول انتخابات ثورية؟؟

ام نحن امام واقع يستوجب علينا ان نستكمل اولا الثورة ثم الانتخابات؟؟؟

ثورة استرداد الثورة

2011-09-29T00:42:00.001+02:00

أثبتنا لأنفسنا جميعا اننا قادرين على فعل المستحيل .. وان كل ما يتطلبه الامر هو الاتحاد على قرار واحد والعمل المشترك عليه

فاكتشفنا مشكلتنا الاساسية قبل الثورة كانت تكمن في اضعاف ثقتنا في انفسنا من قبل اعلام النظام ان الشعب المصري لا يثور ان الشعب المصري غير قادر على العمل الجماعي ان الشعب المصري همجي وغير متحضر وغيرها الكثير من الاتهامات اللي صدقناها كلها

وجئنا يوم 25 يناير اعدنا اكتشاف انفسنا من جديد ووجدنا ان الشعب المصري قادر على كل شيء .. والان يلعب النظام نفس اللعبة

والغريب ان بعض الناس صدقت من جديد اننا لسنا قادرين على استكمال الثورة وهذا ليس صحيحا

فالامر يتطلب فقط ان نتذكر ما فعلناه يوم الخامس والعشرين ونتذكر أيضا اننا مازلنا في ثورة وان القرار قرارنا ليس قرار حاكم من العهد القديم

فنحن من نجحنا في صنع اعظم ثورة في التاريخ وفشل المجلس العسكري في ادارتها

وهذا ليس سباً ولا قذفاً احاسب عليه .. فانا من أريد ان احاسب اعضاء المجلس العسكري على محاولتهم لانتكاسة الثورة

اما بسوء النية وهذه مصيبة واما بحسن النية وهذه مصبتين

فبعد 8 شهور من الثورة :

1- لا يوجد أمن وهذا بتخاذل الداخلية وعدم اتخاذ اي قرار حازم تجاه هذا من المجلس العسكري

2-اقتصاد مصر ينهار بحجة ان المظاهرات توقف عجلة الانتاج .. وهذا خطأ جسيم فاموال مصر تنهب الى هذه اللحظة بجانب سوء الادارة الشديد لموارد الدولة وهذا متوقع فلم يتم تطهير الوزارات المسئولة الا الان

3-لا يوجد خطة واضحة لادارة البلاد اللي تتم باسلوب غاية في الديكتاتورية

4- لا يوجد شفافية ولا وضوح في اتخاذ القرارات

5-استخفاف شديد في وضع قانون الانتخابات لمجلس الشعب

6-سيطرة قمعية على وسائل الاعلام

7-تقاعس شديد وهزلي في التعامل في قضية اموال مصر المنهوبة وقضايا الفساد

8-تجاهل تام لملف العدالة الاجتماعية والاضرابات العمالية

وغيرها من الحقائق التي ليست من مصلحتنا جميعا ان نسكت عليها اكثر من ذلك ولن ألوم القوة السياسية الي ساعدت على اعطاء الشرعية للمجلس العسكري لحكمه البلاد بالمطالبة والتنديد والصريخ ... فكلنا نعلم ان شرعية المجلس تكمن في حمايته للدولة وليس حكمها

ولكي لا اكون مطيلة الحديث فانا اطلب من الجميع التفكير جديا في استعادة مسار الثورة عن طريق تقديم خطة توافقية وطنية زمنية واضحة للمرحلة الانتقالية حتى انتهاء الانتخابات ويتم ادارتها بمجلس ادارة توافقية من جميع التيارات المختلفة مكونة من شخصيات وطنية قادرة على الادارة بجانب 5 لجان :

1- لجنة لتطهير واستقلال القضاء

2- لجنة لتطهير واعادة هيكلة وزارة الداخلية ومراقبة ادارتها

3-لجنة مستقلة لتطهير وادارة الاعلام

4-لجنة لاستعادة اموال مصر المنهوبة ومتابعة سير المحاكمات لقضايا الفساد

5-لجنة لادارة شئون الانتخابات ( لوضع قانون انتخابات وادارة العملية الانتخابية )

وعلى حد علمنا جميعا ان بالفعل يوجد مجموعات تعمل على ما سبق وقدمت مشاريع منطقية بلا استجابة من المجلس العسكري بدون اسباب

فهل يمكن ان نتوافق جميعا على ادارة مدنية توافقية لادارة البلاد لحين انتهاء الانتخابات؟؟؟

هل يمكن ان نتفق جميعا ان نقول للمجلس العسكري عفواً انتم حاميين للدولة ولستم حكاما لنا فانتم عسكر ونحن مواطنون مدنيون؟

هل يمكن ان نقف عن لهجة " اصل المجلس مش هيوافق؟ " ونتذكر جميعا الشرعية الثورية التي اقر المجلس العسكري بها من قبل؟؟

هل يمكن ان ننسى جميع خلافتنا وايدولوجيتنا ونتذكر مصر أولا التي كلما مر يوما كلما تغرق مصر اكثر واكثر ؟؟

جميعنا يعلم جيدا ان لن يأتي الاستقرار ولن تدور عجلة الانتاج الا في ظل حكومة مدنية تدير البلد ادارة جيدة ديمقراطية

احنا مستنين ايه؟؟

فنحن من يجب وضع القوانين والمجلس العسكري لابد من ان يحميها

لا بديل عن التحرك بتجاه ثورة استرداد الثورة

6th of April & Dream come true

2011-09-28T09:39:00.001+02:00

When I heard about the nomination of April 6 for the Nobel Prize I remembered 4 years ago when we were sitting with a group of April 6 movements after we finished an protest preparation meeting. We were joking about after the revolution who of us may be president and who will be vice president. We were laughing and motivating ourselves that we were capable of achieving the revolution dream while those around us including our families was saying that we were mad to dream of overthrowing Mubarak.

We were convinced that we were on the right path and we were determined to follow our dream to the end.

I remember when they arrested and detained Ahmed Maher the movement’s general coordinator. They brutally tortured him to obtain the password for the group and they offered him many bribes to become an informer. He refused despite the torture.

I remember his laughter as he told us what happened. This laughter masked the enormous pain, sadness and feeling of oppression he obviously felt. He was laughing to give himself strengthen himself and to strengthen us.

When we agreed to set up the movement in June 2008 we had a dream and determination to realize it. We used to have 50 individuals chanting at the top of our voice chanting DOWN DOWN Hosni Mubarak , we would be surrounded by Mubarak's thugs and Adly's state security officers. We weren't afraid.

The more they increased in their injustice and oppression the more we became determined and the more we were strengthened. Every time they detained one of us we would bring a 100 and sit in outside the attorney General’s office until he came out.

We would deliver pamphlets in all districts advertising our activities. We used to go out in the middle of the night to spray the bridges and walls with down with Mubarak.

We were on the streets in solidarity with the demands of the unions, the workers linking their problems with Mubarak's Regime.

We were participating in campaigns, in crowded neighborhoods to raise awareness about the importance of ending Mubarak's regime.

We were going out knowing that at any moment many of us we would be beaten detained and arrested.

We used to organize a surprising protests in poor working class neighborhoods, to encourage people to join our protests.

We did succeed in a lot of activities ,despite being hit and being arrested , detained and being tortured while doing a fully peaceful protests ....but we succeeded.

I do remember, on the 25th of January ,when I saw the enormous crowd protesters .I cried and cried .

It was my first time to realize what does happiness tears mean .

OH GOD, we were absolutely right , I realized how our well is really stronger than the Mubaraks' regime .

Now, we believe we have the power to keep moving forward against any dictator who believes he is stronger than Mubarak (SCAF) .

Moving forward, despite any unpatriotic accusations from the remnants of the regime , SCAF and some people .

Moving forward until we see our dream in building a free civil, democratic country where Egyptians is being treated in a humanitarian way .

Proud of all Aprilians. , proud of every member.

All my respect to all 6th of April members.

Asmaa Mahfouz .

+20169909849

@Asmaamahfouz

ثورة ولكن …!!!!!!!

2011-09-17T23:39:00.001+02:00

اخطأنا جميعاً عندما سلمنا أرواحنا ومستقبلنا في كف المجلس العسكري الذي يمكن ان نختلف على نواياه .. لكن لا نختلف ابدا على فشله في ادارة المرحلة الانتقالية

فمنذ الاحتفال بسقوط مبارك وظننا اننا نجحنا أخيرا في إسقاط النظام ولم نكن نعرف ان مبارك هو مجرد وجه قبيح للنظام وليس النظام كله .. فلم تكن لدينا خطة بديلة ولم يكن لدينا الاجابة على السؤال " ماذا بعد؟؟ "

فلا الشعب ولا حتى القوى السياسية كانو يتخيلون أن ما حدث سيحدث ... وعلى ذلك فقد فوجئنا بمجلس بوجه مبتسماً في البداية وهو يبارك على الثورة وعلى ثوارها ووجه غاضباً في النهاية وهو ينحال على الثورة ظنا منه انها ثورته ويلعن الثوار الذين يقفون امام وجهم

لن اتطرق الان الى التفاصيل واتكلم عن فشل المجلس او مؤامرته في ادارة الاعلام او الأمن او تطهير المؤسسات او حتى المضي في خطى واضحة لتسليم السلطة مدنياً .. ولن اتحدث أيضأ عن سوء ادارته للتعامل مع شعب هذا البلد

ولكن أريد أن نعيد التفكير والعمل جديا للمضى على الطريق الصحيح والعمل الجاد على تصحيح المسار

فنتفق جميعا على اننا نمر بأخطر مرحلة في تاريخ مصر العظيمة ... فهذه المرحلة لبناء الاساس الذي سيؤدي لنظام بلد لطالما حلمنا به

طبعا لا أحلم كثيرا بنظام الجنة الخالدة .. فالحقيقة ان في الدنيا لا يوجد عدل مطلق ولا مثالية مطلقة

ولكن نريد أن نتفق على النظام الذي يحقق النسبة الأعلى من العدالة الاجتماعية والدمقراطية والكرامة والانسانية والامن والتقدم

والنسبة الاكبر من كل هذا وذاك لن يأتي بالتمني فقط ولن يأتي كتلة واحدة

لكن سيأتي بالعمل الجاد للوصول لتلك المرحلة ... وجميعنا نتفق على ضئالة فرصة النجاح بالعمل الجاد فقط دون التخطيط الجيد والادارة الجيدة

وآتي هنا بلومي على القوى السياسية وآتي اللوم أيضاُ على نفسي ... فنحن نخطيء يومياً بالتطرق الى قضايا فرعية لا تخص أبدا المرحلة الانتقالية ولا تناسبها

ونخطيء يوميا بفرقتنا وعدم اتحادنا على خارطة طريق موحدة تأتي بالنقاش الجاد لايجادها والعمل الجاد على ادارتها والضغط لتنفيذها

فقد نجحو من نجحو في تفريقنا على عدة مواضيع ليست في موضعها المناسب كالاستفتاء والمباديء فوق الدستورية والانتخابات اولا ام الدستور اولا والسفارة في العمارة

ووقعنا في الفخ عندما تفرغنا للحرب بين التيارات المختلفة وتناسينا عدونا الذي يدبر ويخطط لعودة النظام كما كان عليه

وأخطأنا أيضا عندما انشغلنا عن الشارع المصري وتركناه لذوي الخبرة في السيطرة على أفكاره

لكن نعلم جميعا ان لا جدوى من الندم والحسرة وان لابد ان ندرك الواقع ونعترف به حتى نستطيع التعامل معه

نحن الأن بصدد انتخابات برلمانية غير واضحة المعالم ويستفرد بوضع قوانين لعبتها المجلس العسكري وحده ولكن أيضاً المشكلة الاكبر

ان تلك القوانين او تشكيل النظام الانتخابي مسألة في غاية التعقيد .. فلا القوى السياسية على دراية كافية بشئونها ولا القائمين على ادارة شئونها أنفسهم على دراية كافية بكيفية وضع تلك الأنظمة

ويدرك ذلك جيدا من درس هذه الأنظمة وهذا النوع من الادارة عندما يقرأ تصريحات القائمين على هذه اللجنة

فسوء تشكيل تلك الأنظمة بالاضافة الى قلة وعي الناخبين والمرشحين قد يؤدي الى كارثة خصوصاً ان مجلس الشعب القادم هو من سيحدد مصير البلد من خلال الدستور.

وبالرغم من اني متشككة في اقامة الانتخابات في موعدها بافتراض سيناريو سوء النية .. وحتى لو بحسن نية فالواقع الاليم الذي نعيشه لن يستحمل انتخابات في ظل غياب الامن الرهيب الغير مبرر سواء تم استغلاله ام لا

فيمكن بمنتهى البساطة بحسن او بسوء نية وقف العملية الانتخابية بعد اول جولة بلطجة تحدث

خلاصة الموضوع كي لا أطيل عليكم نحن بحاجة الى اتحاد مجموعات وطنية يعول عليها مسئولية النقاش للاتفاق على خارطة طريق لادارة المرحلة الانتقالية وقلب الواقع لمنطق ان المجلس العسكري فقط حـــــــــامي للثورة وحامي لهذه الخارطة وان من يحكم هم لجـــــــان نابعة من المجموعات الوطنية الموثوق بها لادارة البلاد في تلك المرحلة

نحن ( الشعب ) من يجب أن نتحكم في زمام الامور ونتحول من رد فعل الى فعل

نحن ( القوى السياسية المختلفة ) من يجب ان نتحمل مسئوليتنا كامة اتجاه هذا الوطن وننسى خلافتنا الايدولوجية

نحن ( السياسين والشعب أجمع ) من يجب أن نعيد التفكير في مسار الطريق الذي يجب أن نسلكه

أخطأنا من قبل عندما حكمنا على الشعب المصري بأنه لا يعول عليه .. فالثورة المصرية أثبتت للجميع أننا شعب نمتلك قوة خارقة لتحقيق ما نحلم به ... فقط اذا قررنا ذلك

فالان كل ما نريده أن نثق في قدراتنا وان نحدد احتياجتنا وعلى رأسهم المعرفة .. وان نضع خطة واحدة للعمل من أجلها

برغم كل ما يحول بداخلي من قلق وآالم تجاه ما نعيشه من فترة قاسية .. ولكن عندي يقين شديد بعد الله في هذا الشعب العظيم

نحن بحاجة الى الاتحاد لتصحيح المسار .. ولن تأتي بمجرد مليونية بالمطالبة به لكن بالعمل على ايجاده

تحية من قلب إنسانة تعيش في هذا الوطن

أسماء محفوظ

17-9-2011

معملناش ثورة عشان…….

2011-08-08T17:27:00.001+02:00

معملناش ثورة عشان تغيير وجه نظام ديكتاتوري!!!

معملناش ثورة عشان نستولى على حرية شعب شبيهة بحرية عصر الجاهلية او بمعنى اصح بحرية الغابة " البقاء للأقوى "

معملناش ثورة عشان ناخد مناصب او نحتل مجلس الوزراء ونتفشخر باللقاءات مع مجلسي العسكري والوزراء

معملناش ثورة عشان نتفرج على رموز مدمرين مصر في القفص

معملناش ثورة عشان ينتهي بينا الحال زي ما انتهى في 1952 و1977 !!!

معملناش ثورة عشان نتكلم في كل حتة في الجرائد والفضائيات على روايات وسيناريوهات جرائم وفضائح مبارك ونسمي ده النصر المبين

معملناش ثورة عشان ندمر بيها انفسنا واحنا بنتصارع على من هو مالك الثورة المصرية

معملناش ثورة عشان نتفرج على الانحدار الاخلاقي للنشطاء وهما بيسبو ويلعنو في بعض بأبذأ الالفاظ

معملناش ثورة عشان نتفشخر بانجاز في كل دول العالم ونبىقى عاملين زي اطفال الشوارع لما يجيلهم طقم جديد للعيد

عظمة الشيء بتظهر مع نتيجة الثورة مع مرور الوقت وعظمة الثورة بتظهر مع نتيجة نهايتها

فياترى احنا قادرين نتخيل نتيجتها؟؟؟؟ ياترى باللي بنعمله في نفسنا وبنعمله في البلد ده هيوصلنا للنتيجة اللي نزلنا عشانها؟؟

اعظم شيء في الثورة المصرية انها حدثت بشكل تلقائي وخلاق وابتكاري في كل حدث فيها

لكن لما الحالة دي تنتهي والشعب يعود لثكناته بفقد روح التحرير ويحصل انتهاك غير طبيعي وغير مبرر من المسيطرين على المشهد

يبقى لابد لنا من وقفة

وقفة نوقف فيها المشهد ونتفرج عليه من فووووووووووووق من فوق اوي عشان نجيب كل حاجة في المشهد ونسأل نفسنا هو احنا رايحين على فين؟؟؟؟؟؟؟

السؤال اللي كل واحد في الشعب الطيب اللي شارك في الثورة وضحى بشيء من حياته وفجأة لقى ان اللي بيسيطر واحد تاني خالص

نسأل نفسنا هو احنا ليه ماسكين في حتة صغيرة اووووي من المشهد وبنتخانق فيها وسايبين الدنيا بتولع في باقي المشهد؟؟

كل الناس عارفة كويس اووي ان المشكلة في مصر هي مشكلة في المنظومة باكملها ومشكلة في اسلوب نهج شعب بأكلمه

وكل الناس عارفين كل أمراض المنظومة وعارفين كمان امراضنا كشعب

طيب ليه مش شايفة السياسين او الكتاب او الاعلام او حتى الحكام بيقدمولنا خريطة الخروج من المستنقع

ليه بننضف السطح وسايبين القاع مليان بلاوي كلنا عارفينها؟؟؟

ليه رجعنا تاني لسياسة رد الفعل؟؟ ونسينا سياسة الفعل؟؟

ليه النخبة اللي حاربت الفساد سابو نفسهم يكونو نظام مبارك تحت الناشئين؟؟؟ وماشين على نفس النهج اللي كانت بدايته من 30 سنة ؟؟؟

ليه محدش بيخطط وبيقولنا ده الطريق اللي انا شايفه؟ ونبتدي نتناقش فيه بدل ما احنا بنتناقش قصدي بنتصارع على نقطة في سطر

ارجووكم ارجوكم عشان مستقبل مصر لازم نعرف احنا رايحين على فين منمشيش مغمضين وبنتكعبل في بعض

لازم الاجيال اللي الجاية يتكلمو علينا بشرف وهما فعلا رافعين راسهم لفوق ... ميتكلموش علينا وهما مكسوفين مننا

مستقبل مصر اكبر بكتيير من صراعات الايدولوجيات وصراع السلطة اللي بيلاعبنا بيه اللي بيتحكم فينا واحنا مش داريانين

8 أغسطس 2011

الثورة بين المدنية والاسلامية

2011-07-29T21:26:00.001+02:00

اللي حصل في ميليونية جمعة 20 يوليو محتاج لوقفة مننا كلنا ونتفحص المشهد بمنتهى الحيادية والصراحة مع النفس عشان نقدر نعرف ايه اللي بيحصل واحنا ماشيين ازاي

من بداية الثورة وفي حالة اقصاء تامة للتيارات الاسلامية ومكنش هو ده المتخيل ولا المتوقع انه يحصل عشان ببساطة كان الكل عارف ان فزاعة التيارات الاسلامية كانت من صنع مبارك والامريكان

لكن لما سمعنا كلنا شيوخ السلفية قبل الثورة ان الخروج على الحاكم حرام وان يوم 25 يناير هيعمل فتنة وحرام النزول ولقينا في تصريحات لقيادات الاخوان عدم مشاركتهم في اليوم ساعتها كل الناس علمت عليهم مع ان التيارات الاسلامية كانت من اكثر الناس متضررة من نظام مبارك وكان امن دولة مبارك بيستخدمو اعنف واشرس الاساليب معاهم وكان النظام واضح وصريح انه ضد الدين تماما.

لكن كلنا لاحظنا ان عدد كبير خالف قرارات التيارات الاسلامية وشاركو من يوم 25 يناير وكمان محدش ينكر ابدا ان الاخوان تصدو بصدورهم لمعركة الجمل وشاركو بشكل رائع في تأمين الميدان خلال فترة الثورة بشبابهم وفتياتهم.

وكان كل حاجة جميلة وشبه مثالية وكان جميع التيارات فعلا ايد واحد لحد تنحي مبارك وابتدى كلام بسيط على الخلاف على المادة التانية من الدستور لحد ما ابتدى الكلام على الاستفتاء

وابتدى المشهد السياسي يتغير بصورة كبيرة ... فمن اللحظة دي وابتدت الحرب تاخد مجرى تاني خالص

فبعد الخديعة الكبرى ان النظام قد سقط وان الجيش هو من حمو الثورة .. ابتدى اول طعم يترملينا للوقوع في فخ الوقيعة

وابتدى تكتيك فرق تسد باستخدام نقاط ضعف النخبة السياسية ... بالتفرقة بين نعم ولا

وبدل الدخول في جدال ليه نعم وليه لا وبدل من انتهاز الفرصة لتوعية الشعب بالدستور والمواد والاعلان و و و و

دخلنا في معركة تقسيم النخبة لاسلامية وغير الاسلامية " ليبرالية وعلمانية ومسيحية كمان "

وكان استخدام الفزاعة الجديدة " المادة التانية في خطر " هي المتصدرة المشهد السياسي

فبقى الاعلانات في كل حتة في مصر .... قول لأ عشان دم الشهداء ... قول نعم عشان دم الشهداء

قول لأ عشان مصر ... قول نعم عشان الاستقرار

قول لأ لمستقبل اولادك ... قول نعم واحمي دينك

قول لأ عشان متبقاش اسلامية " في بعض الكنائس " .... قول نعم عشان تحمي دينك " في بعض الجوامع "

وبدل ما كنا ايد واحد ضد النظام .. بقينا فريقين ضد بعض وحرب التخوين الاعلامية كانت شغالة من نار

ملحوظة صغيرة: مع ان الكلام في الوقت ده كان على عجلة الانتاج واقتصاد مصر وانهيار البورصة كان كمية فلوس اتصرفت على حرب نعم ولا بشكل غير طبيعي

وبعد النتيجة الساحقة ال77% ... وبعد الاعلان الدستوري البعيد كل البعد عن نتيجة الاستفتاء

ابتدت موجة اخرى من الاتهامات المتبادلة :

انصار " لأ " : نرفض استخدام الدين في السياسة ونرفض استخدام جهل الناس وانسياقهم وراء الشيوخ .. ونرفض استغلال الاعلان الدستوري المزيف لصالح التيارات الاسلامية ونرفض ان يحكم الشعب الاغلبية الجاهلة المناسقين وراء دكتاتورية الاقلية!!!

أنصار " نعم" :: نياهاهاها ضحكة ساخرة .. موتو بغيظكم فقد اثبتنا ان الشارع لنا وال77% قالو نعم للاسلام ونعم لنصرة الاسلام ونرفض الخروج عن ارادة الشعب المصري

المجلس العسكري: لقد اثبتت نتيجة الاستفتاء ان الشعب المصري يثق في الجيش ويقول نعم للمجلس العسكري

ومن ساعتها والحرب مشتعلة بين انصار لأ وانصار نعم والمجلس العسكري بيلعب بالطرفين وبيطقشهم في بعض زي البيض والاعلام بقى لما بيصدق يظيط ويشعلل

وبدل ما كانت النخبة تلتفت لغلطتها وتحاول تصنع رؤية وخطة واضحة لشكل الدولة المتوافق عليها من الجميع والمحاولة من تقديم مقترح لقواعد اللعبة ... دخلو في سكة الدستور أولا مع انهم معترضوش على مبدأ الاستفتاء قبلها

وحصلت المعركة التانية الدستور اولا لانصار " لا " والانتخابات أولا لانصار " نعم "

وبعد الخسارة الثانية والشارع المصري رفض الدستور اولا ... ابتدى يظهر شعار الفقراء اولا والثورة اولا والقصاص اولا و و و و و

وفي خلال الاوقات دي ايقن النخبة ان عدوهم الان هم التيارات الاسلامية وخصوصا الاخوان المسلمين ... فبدأو هما نفسهم يستخدمو نفس فزاعة مبارك وشن حرب غير مبررة على الاسلاميين في الاعلام من ناحية وفي التحرير من ناحية

ومحاولة تحالف التيارات انصار " لأ " لتكوين جباهات لمواجهة التيارات الاسلامية

ملحوظة صغيرة مع ان انصار " نعم" مش كتلة واحد ومش كلهم تابعين للتيارات الاسلامية .. ركزو انصار " لأ" لمواجهة التيارات الاسلامية بدل مواجهة نظام مبارك ونظام طنطاوي اللي بيلعب بينا

وبعد اختراع جديد "مجلس رئاسي مدني " لانصار لأ في محاولة منهم للتخلص من المجلس العسكري وعمل دستور اولا وبعدين انتخابات عشان يتفادو سيطرة التيارات الاسلامية .... ابتدت معركة جديدة ورد عليها التيارات الدينية " لا لمجلس رئاسي مدني" و " الشعب والجيش ايد واحد " ورفض التيارات الاسلامية الهتاف بسقوط المشير خوفا منهم بسيطرة مجلس رئاسي بقيادة انصار " لأ "

وعندما انضم الاخوان لمليونية 8 يوليو ... وتم محاولة اقصائهم من المنصات ومحاولة منعهم من انشاء منصتهم والهتاف ضدهم

وبدئت حرب غريبة ضد الاخوان من التخوين والعمالة وتريقة و و و و

وبعد فشل المعركة الثالثة في الشارع بمساعدة طبعا اعلام المجلس العسكري وفزاعة الوقيعة بين الشعب والجيش

ظهرت حرب رابعة وهي :المباديء فوق الدستورية ليست قابلة للتعديل او الالغاء

وكانت من اكبر الخلافات اللي ظهرت في المباديء دي هي اللعب على المادة التانية من الدستور وهو ما اثار غضب التيارات الاسلامية ونسبة كبيرة من الشعب المصري.

وقرر وقتها التيارات الاسلامية باالدعوة الى مليونية 29 يوليو لعدة مطالب توافقية ولكن على رأسهم مطلبين خاصين :

1- التأكيد على هوية الدولة 2- رفض المباديء فوق الدستورية

وساعتها ابتدت حرب لرفض المليونية واقصاء ميدان التحرير على مطالب الثورة فقط مع العلم ان تم رفع قبل كده في التحرير الدستور اولا والمباديء فوق الدستورية والشعب يريد اسقاط المشير وده اللي اعتبره الجميع تساؤل غريب::

ليه بتقصو الاسلامين من رفع مطالبهم بحجة انها ليست توافقية .. وترفعون مطالبكم وهي ايضا ليست توافقية

ساعتها ابتدت فزاعة في كل قنوات الاعلام وحتى الاعلام البديل ان التيارات الاسلامية يدعون لمليونية تطهير الميدان من الخونة والكفرة

وفي نفس الوقت المجلس العسكري كان بيأكد ان من في الميدان هم بلطجية وممولين من الخارج وعملا واستخدم كبش فداء " 6 ابريل "

وطبعا لجنة الفلول الالكترونية اشتغلت من نار تشويه 6 ابريل وضم كل النشطاء المعروفين بالليبرالين والعلمانين لخانة 6 ابريل العملا والخونة

ويوم بعد يوم كان مليونية 29 يوليو تحدي للجميع .... النخبة انصار " لأ " مصممين على البقاء في الميدان والاستعداد لمليونية 29 يوليو لاثبات عدم خوفهم من الاسلامين وانهم مستعدين لحماية الميدان

والتيارات الاسلامية تتحدى ان تحشد لأكبر مليونية في التحرير لاثبات انهم الاكبر والاقوى

وحقنا للدماء فقد حاول الجميع التحاور والاتفاق على جمعة الوحدة الشعبية وعدم رفع اي مطالب غير توافقية

وابتدى مسلسل حشد في جميع الجوامع وفي جميع شوارع مصر " انصر دينك وشارك في جمعة تطبيق الشريعة "

ولما جه يوم الجمعة وشوفنا استعداد الاخوان باقوى فريق لتأمين الميدان وشوفنا الشعاارات الاسلامية لنصرة الاسلام ولتطبيق الشريعة الاسلامية وهتافات الجيش والشعب ايد واحدة وكان اكبر عدد شاهدتها مصر في الميدان من كل محافظات الجمهورية

وكانت جميع هذه الشعارات خالفت ما تم الاتفاق عليه في اجتماعات التحالف واعبرتها جميع القوى السياسية خيانة

وبعد حدوث عمليات تخوين من انصار "لا" للتيارات الاسلامية ... وعمليات تكفير من التيارات الاسلامية لانصار "لا"

ايقنا جميعا ان تم استخدامنا واستدراجنا لمعارك ليست بماكنها وليست بوقتها

فزي ما انصار لا اقصو مسبقا التيارات الاسلامية والتريقة عليهم بشكل واضح .... التيارات الاسلامية اقصت انصار لا والتريقة عليهم

والمجلس دلوقتي بيستخدم الاعلام بشكل غير مباشر ليخير الناس كلهم .... عايزين الخونة والعملا؟؟؟ ولا عايزنها دولة اسلامية " الدقون على حد قول البعض" ولا تخلو المجلس العسكري يحميكو؟؟؟؟؟؟؟؟؟؟؟؟؟؟؟

وعلى الناحية الدولية فقد نجح طنطاوي ان يرسل للعالم اجمع ان وجوده الان يحميهم من الاسلاميين

ولابد ان يعي التيارات الاسلامية اننا لسنا في غزوة احد ... فلم يمس احد الدين الاسلامي ولا من حق اي حد تكفير اي انسان مهما كان .. مش من حقكم ان تخلقو فزاعة جديدة بانفسكم وكانكم بتقولو للجميع " احنا اهو واذا كان عاجبكم واللي مش معانا يبقى ضد الاسلام"

طبعا الثورة المصرية مكنتش تقصد كل اللي بيحصل ده ... فكلنا خرجنا لمطالب متوافق عليها من جميع الاديان ومن جميع اطياف البشرية ... عيش حرية عدالة اجتماعية وكرامة وانسانية

اعتقد دلوقتي جه الوقت لوقف المعارك الغير مجدية ... ونقف كلنا نتفرج على نفسنا ونسال هو ده اللي احنا عايزينه؟؟

ويحاول الجميع عرض افكارهم وكلنا نسمع بعض .. ايه هي الدولة المدنية المقصودة من انصار " لأ " وايه هي الدولة الاسلامية المقصودة من التيارات الاسلامية

وهل يمكن الاتحاد في شكل دولة يرضينا جميعا؟؟؟ هل الدولة المدنية ذات المرجعية الاسلامية التي تكفل الحرية للجميع وتكفل الديمقراطية للجميع يرضينا جميعا؟؟؟؟؟

هل من الممكن الاتحاد جميعا في رؤية وهدف واضح ونقف به امام النظام الفاسد الذي لا يزال موجودا؟؟؟

هل يمكن وقف معركة التخوين والتكفير المتبادل؟؟؟؟

هل يمكن ان نقول لنفسنا اننا نريد ديمقراطية فلازم ان نتقبلها كما هي ونلعب سياسة حسب قواعد لعبة الدمقراطية واولها الاحترام لرأي الجميع؟؟؟

هل يمكن من النخبة السياسية كلها ان تعيد النظر في اساليبها والياتهم و يفتكرو انهم ضيعو وقت طوووويل من غير النزول للشارع المصري ونسيو ان مصر اكبر بكتييير من ميدان التحرير؟؟

هل من الممكن الاتفاق على انها حرب ضد الفساد وانها حرب للحصول على مباديء الانسانية ... ونبعد عن الحرب الدينية اللي انجرفنا ليها بدون داعي؟؟؟

ارجوكم مصر وشعبها غالية اوووووووي ومش محتاجين اكتر من اننا نسمع بعض ونحترم بعض عشان نقدر نتحد ونرجع تاني لقوة 25 يناير وقوة ال18 يوم اللي هزينا فيها العالم كله وسمع صوتنا

ارجوكم مصر لا تستحمل الانقسام .... ولو سمعنا بعض بهدوء هنعرف ان كل اللي بينتكلم فيه متوافق عليه

فالديمقراطية والقصاص والعدل والمساواة والعدالة الاجتماعية وكل مباديء الثورة ... موجود في الاسلام

فمفيش مصري من انصار لا اتكلم عن شيء يتنافى مع مباديء الاسلام

ومفيش اسلامي اتكلم عن شيء يتنافى مع مباديء الثورة

تحيا مصر وتحيا الثورة .... ولشهداء ثورة مصر لا تحزنو فهي وعكة صحية وهنتعافى منها وكل ما حلمتم بيه وضحيتو بدمكو عشانه هيتحقق ان شاء الله

تحيــــــــا مصر ويحيا شعبها

خائفة من البيان رقم 100 من المجلس العسكري .. " جــــــــيم أوفر "

2011-07-25T04:41:00.001+02:00

خسرنا كثيرا عندما فقدنا تواجد الشعب معنا بل فقدنا تعاطفه ايضاُ ... بل الاكثر خطورة بل فقدنا ايمانه بالثورة من الاساس وتختلف

الاسباب ولكن النتيجة واحدة

فعندما دعينا ليوم 25 يناير فكان الهدف واضح .. عيش حرية كرامة انسانية والشعب يريد اسقاط النظام

وكان وجه النظام قد سقط للجميع بعد عمل تراكمي استمر سنين طويلة بعمل شاق وتضحيات كثيرة وقد نجحت في اثبات فساد هذا النظام بأكمله الذي ساعد بغباءه السياسي وغروره في كشف وجه القبيح امام الجميع

حتى بعد وعد مبارك في خطابه الثاني اثناء الثورة بالاصلاح والتغيير الوزاري والبقاء في السلطة لسبتمبر ثم اجراء انتخابات رفض الثوار لمعرفتهم الجيدة بوعود مبارك.

وعندما سقط مبارك ووجوه نظامه .. ظن الجميع ان الثورة انتهت بنجاح

ولكن لا أحد رأى ما يحدث وراء الكواليس .. ومن فرحتنا بخبر تنحي مبارك لم ننتبه لمن يخلفه

فلم ننتبه أن من قال خبر تنحيه هو عمر سليمان رئيس المخابرات العامة في نظام مبارك لأكثر من 18 سنة بتكليف من مبارك نفسه.

لم ننتبه ان من ادعى انه ضغط على مبارك للتنحي هو المجلس الأعلى للقوات المسلحة الذي عينه مبارك من اكثر من 10 سنين

في خدمته وولائه له:

المشير محمد حسين طنطاوي: الذي كلفه مبارك بتولي مسؤولية القيادة العامة للقوات المسلحة المصرية. ومن قبلها قائد الجيش الثاني الميداني (1987)، ثم قائد قوات حرس الجمهوري (1988)، ثم قائدا عاما للقوات المسلحة ووزيرا للدفاع في 1991 برتبة فريق ثم بعدها بشهر أصدرمبارك قرارًا بترقيته إلى رتبة الفريق أول. وفي سنة 1993 أصدر مبارك قرارا جمهوريا آخر بترقيته إلى رتبة المشير ووزيرا للدفاع والإنتاج الحربي.

اللواء سامي حافظ عنان: أصدر مبارك قراراً بتعيينه رئيساً للأركان في العام 2005.

اللواء حسن الرويني: هو قائد المنطقة المركزية العسكرية ، و هو من قام ـ بصفته قائداً للمنطقة المركزية العسكرية ـ بالتوقيع على أحكام المحاكمة العسكرية التاسعة للإخوان المسلمين في 2006، وفي يوم 25 يناير 2011، بمناسبة عيد الشرطة، المصادف ليوم الغضب المصري، أنابه وزير الدفاع طنطاوي بوضع إكليل من الزهور على النصب التذكاري لشهداء الشرطة. وفي 5 فبراير 2011، طالب اللواء حسن الرويني المتظاهرين بالانسحاب من اعتصامهم بميدان التحرير "للحفاظ على ما تبقى من مصر" على حد تعبيره.

والجميع يعلم أن مبارك لم يكن يعين او يحتفظ بمناصب احد الا بعد فروض الولاء له.

ولكننا تغاضينا عن كل هذا وقلنا لفترة مؤقتة بل وتغاضينا أيضا ان من سمح لبلطجية موقعة الجمل ان يعبرو لقتل الثوار كان ظباط الشرطة العسكرية ولكننا اسقبلنا ما رأيناه بــ" الجيش والشعب ايد واحدة" .

وكان السيناريو المتوقع من الثوار ان يستلم الحكم مجلس رئاسي مدني ولكن فؤجنا برفض طنطاوي القاطع لهذا المطلب.

وقلنا لا يهم الان لا يجب ان نختلف وهذا جيشنا وسوف يحافظ على الثورة والشرعية الثورية

مع مرور الوقت فؤجنا ان نفس سيناريو مبارك هو نفسه السيناريو المفعل ولم يكن فقط السيناريو فقد وجدنا نفس اساليب مبارك بنفس صياغة خطابته بنفس الاعيبه

وفؤجنا أيضا باعلام ينتقل من عبادة مبارك الى عبادة المجلس العسكري وعلى رأسهم طنطاوي بنفس الأساليب بنفس بتزييف الحقائق بنفس نشر الأخبار الكاذبة

وفؤجنا أيضاً باستقرار نظام وزارة الداخلية وتحول اساليب أمن الدولة الى المحاكمات العسكرية بأبشع منها في المحاكمات العسكرية للمدنيين وتعذيبهم

وفؤجنا بحماية الشرطة العسكرية لأمن المركزي أثناء قمعه للمعتصميين.

فؤجنا بعد 6 أشهر من الوعود الكاذبة بأن لا توجد محاكمات لرموز النظام ولا نعرف حقيقة تواجد مبارك بعد.

ولم تبدأ محاكمة جمال وعلاء حتى الان.

بل فؤجنا ببراءة متهمين كثيرين

ولم يحاكم واحدا في قضية قتل الثوار

بل فؤجنا بقتل الثوار يوم 8 ابريل وفؤجنا بممارسات حتى لم تحدث في عهد مبارك وحدثت في عهد طنطاوي أبشعها كشف العذرية على المتظاهرات .... وكل هذا يبرر اعلاميا بان هؤلاء بلطجية !!!!!!

فؤجنا أن من يعترض المجلس العسكري هو بلطجي وانه ليسو من ثوار 25 يناير!!!

وعندما تحدثنا عن المحاكمات العسكرية للمدنيين قالو أيضاً ... " معندناش مدنيين دول بلطجية "

لا استطيع أن افهم كيف جميع من في التحرير بلطجية ومن في السجون الحربية من النشطاء بلطجية ... وأن من يحذفوننا بالمولوتوف والطوب والبنادق هم الأهالي الذي يحميهم الجيش؟؟؟؟؟

فؤجنا ان الثورة ترجع الى خلف .. نعم ترجع الى الخلف

فالتغييرات الوزارية تأتي من هم كانو بنفس النظام

وفؤجنا بدكتاتورية من المجلس الذي تعيينه على يد مبارك

أحسسنا جميعا بأن هناك صفقة ما تمت بين المجلس العسكري وبين مبارك .. " تنحي انت يا ريس ومتقلقش ده انت ريسنا "

فكيف أن يحاكم مبارك ويفضح الجميع ؟؟؟ فكيف ان يحاكم اي حد من رموزه ويفضح مبارك؟

هناك اراء ان نسكت عن كل هذا وننتظر الانتخابات ... نحن انتظرنا 6 شهور ماذا حدث؟؟؟

النظام يعود ثانياُ في ثوبه الجديد ... هل هذا ما ننتظره؟؟

هل تتوقعون انتخابات نزيهة بعد ما شاهدناه في موقعة العباسية؟؟ كيف نتوقع حماية من نظام طنطاوي وهو من يحمي البلطجية؟؟؟

كيف تتوقعون انتخابات في موعودها من الاساس ولا يوجد خطوة واحدة اتخذت لتجهيز العملية الانتخابية؟؟؟

كيف تتوقعون انتخابات نزيهة ومازال اعلامنا المصري هو نفسه اعلام مبارك بكل فساده وكذبه؟

كيف تتوقعون انتخابات نزيهة ويأتي رئيس ليس من جماعة العسكر؟؟؟؟

ولكن للأسف مع كل ما يحدث ولكن نجح اعلام النظام السابق والحالي ان يخدع نسبة كبيرة من الشعب وأن يثبت له ان الثورة قد نجحت وأن الثوار هما عملاء لأمريكا " التي كانت تحمي مبارك لولائه لها والتي يسافر لها سامي عنان كل شهر ولا نعلم لماذا " وان الثوار يريدون الاحاطة بجيش مصر العظيم ولابد من شعب مصر الشرفاء التصدي لهؤلاء الخونة على حد قول صباع الفنجري

وللأسف أيضا انشغلت النخبة بمحاربة بعضها لفترة وللدفاع عن نفسها امام الاعلام لفترة اخرى

وللأسف نجح ان يحول المجلس العسكري التحرير من ساحة الثورة الى ساحة الهايد بارك بإهماله لها والتعامل الاعلامي لها على طريقة " سيبوهم يتسلو لحد ما يزهقو" وللأسف أيضا وقع الثوار في هذا الفخ.

ولقد كانت غلطتنا أن ركزنا كل اهتمامنا في إدارة هذا النظام باضعف سبلنا ونسينا الشارع المصري

الذي نجح اعلام طنطاوي ان يقنعهم بان من يوقف حالهم ومن يرفع الاسعار ومن يوقف الطرق ومن يسعى للفوضى ومن يريد ان يقف عجلة انتاج مصر هم من يعتصمون في ميدان التحرير

وكانت غلطتنا أيضا اننا تحولنا من مقاومة النظام الفاسد الى مجرد احتجاج على قراراته الفاسدة

وكانت الغلطة الكبرى اننا ركزنا على تفاصيل الدستور أولا ام الانتخابات أولا .. وأهملنا بناء رؤية موحدة وطنية يلتف حولها الشعب

فالشعب لا يرى اجابة على سؤال " مصر رايحة على فين؟؟ "

فانعدام الرؤية تجعل الشعب يفقد ايمانه بالثورة ويفقد ايمانه بالثوار

وانعدام الرؤية يخلق الفوضى وانعدام الرؤية يزيد من خلافات القوى السياسية

فكيف نستطيع أن نبني مبنى بدون أن نرسم ونخطط له؟؟؟

كيف يمكن للمهندس ان يقول للعمال " يلا ابنو العمارة " بدون اطلاعهم كيف تبدو هذا البناية؟؟

ادعو جميع القوى السياسية للتفكير في رؤية واحدة وطنية يمكن ان نلتف حولها ... والرجوع للشارع المصري ولا اقصد للميادين

بل أقصد في كل حارة وفي كل شارع وفي وسط الأحياء الشعبية

لابد ان نقول لهم لماذا نحن مستمرون ولماذا نحن بحاجة لهم ولماذا لم تنتهي الثورة بعد

ارجو من الجميع إيقان لعبة طنطاوي " فرق تسد " ويستخدم جميع نقاط ضعفنا البشرية

قوتنا في اتحادنا ... أرجوكم " حـــي على الاتــــحاد " ... فأمامنا الان قوة اشرس من مبارك والفرقة لن تنجينا

خائفة من البيان رقم 100 من المجلس العسكري .... " جــــــــيم أوفر "

رسالة للمجلس العسكري: لو ناسي منصحكش ان الشعب يفكرك

2011-07-18T03:54:00.001+02:00

عايشين بقالنا 30 سنة في نظام فاسد من ساسه لراسه وحضراتكم ساكتين ولا حس ولا خبر

بتاكلو وبتشربو وبتحتفلو مع مبارك وعادي

شايفين مصر بتغرق والشعب بيموت ولا عملتو حاجة

كنت من نظام مبارك الي بتقولو عليه دلوقتي فاسد

ولما حصلت الثورة ولقيتو شعب واقف وقفة سوبرمان وايقنتو ان دبابات الدنيا كلها مش هتقدر تعمل معاه حاجة

قلتو احنا مع الثورة والثوار واتفقتو مع مبارك انه يقول انه يتنحى ووصلتوه شرم الشيخ معزز مكرم كانه عمر المختار

وقلتو ساعتها ان الجيش هو اللي حمى الثورة مع انكو سيبتونا نموت في موقعة الجمل بالاتفاق معاكو برضو وده كان واضح للجميع

حتى لو سكتنا وقلنا معلش لازم تفضل صورة رجالتنا لفوق

وعدى 6 شهور بتسمعونا نفس الكلام مع تصاعد حدة اللهجة وبنشوف نفس تصرفات مبارك بنفس خطابته

حكومة من فلول الى فلول ويا قلبي لا تحزن

امن الدولة سلم سلطات اعتقالاته وتعذيبه الى الشرطة العسكرية وبصراحة بصراحة يعني بتقومو بشغلكو تااااااالت ومتلت

طلعتو عنينا عشان تقبضو على الوزراء ورموز الحزب الوطني .. وبعد ما فرحنا كل يوم تطلعو واحد براءة وتقولو يعيش قضائنا النزيه

لغيتو وزارة الاعلام وقلنا هيييييييييييييه رجعتوها تاني ومسكتوها لواحد منكم ( عسكري من صحاب مبارك ) وبينفذ نفس التعليمات

بتضربو فينا وتمرمطونا وقلتو علينا علينا مندسين وبلطجية ورفعتولنا الصباع مرة من ظابط شرطة بيضرب في ثوار التحرير ومرة من

الفنجري بلهجة تحذيرية لثوار مصر

عملتو اعلان دستوري ملوش اي علاقة بالاستفتاء واديتو لنفسكو مطلق الصلاحيات اعلان ميقلش اننا في ثورة وكل يوم تطلعو قرار وتلغو قرار

غليتو الاسعار وطلعتو عين الشعب وعملتو موازنة جديدة لغيتو فيها زيادة المعاشات وتجاهلتو مطلب الحد الادنى والاعلى للاجور

تجاهلتو صوت اقالة النائب العام اللي ظل مخلصا لمبارك طول فترة خدمته

وتجاهلتو صوت بكاء وحسرة اهل الشهداء على دم ولادهم اللي بيضيع قدام عينيهم

سؤال بسيط ابسط من اسئلة الثانوية العامة : هل معنى " نحن نحمي الثورة" حماية مبارك؟ ام حماية انفسكم؟ ام الاثنان معاً؟

الشعب اللي فرح بيكم واستقبلكم استقبالا حارا مع انه مكنش اختركم من الاساس هو هو نفس الشعب اللي ثار وقام باعظم ثورة في التاريخ ليطيح بنظام فاسد ... فصبره عليكم مش من ضعفه ولكن من سماحة قلبه

فمع مرور الوقت محدش يقدر يتوقع هو يقدر يعمل ايه

مع اصدار قرارت اقل ما يوصف عنها انها ماسخة ومع تعيين وزراء منعرفش حاجة عن معايير اختيارهم وكمان بنلاقيهم من الحزب

الوطني

مع عدم وجود خطة واضحة لادارة المرحلة الانتقالية مع التعامل بالاسفاف تجاه الشعب المصري

محدش يقدر يتوقع رد فعله ايه

الشعب المصري مش غبي ومش ضعيف

الشعب المصري مش عبيد

الشعب المصري مش بيشحت حقه

الشعب المصري مش عبيط

رسالة للمجلس العسكري: انت حامي لاهداف الثورة ولست حاكما للثورة

لو ناسي منصحكش ان الشعب يفكرك

رفقاً بالشعب يا نخبة

2011-06-24T01:17:00.001+02:00

من سنييين لقبل 25 يناير كان في ناس بتناضل ضد نظام مبارك منهم سمعنا عنهم ومنهم منعرفهمش ولا عمرنا سمعنا عنهم

وكان في احزاب منهم كتيير بنسميهم احزاب كارتونية ومنهم مكنش ليهم تواجد في الشارع الا في بداية تأسيسهم وبعدين حصلو صحابهم

مؤتمرات وندوات وتنظير ملوش اول من اخر وكان المشهد مقسوم نصين ملهمش اي علاقة ببعض نظام مبارك مبرطع في اللبلد زي ما هو عايز مع نخبة من السياسين مشغولين في التنظير والخناق مع بعضهم احيانا والنفاق لبعضهم احيانا ... اما النص التاني فكان الشعب اللي مكنش عنده وقت من حسرته على عيشته انه يقرا او يتكلم او حتى يسمع عن السياسة

حتى الاخوان المسلميين تواجدهم مكنش سياسي على قد ما كان اجتماعي وخيري وطبعا اقصد في الشارع مع الناس

يمكن الحراك السياسي في الشارع شد حيله حبتين من حركة كفاية وحركة شباب من اجل التغيير مع ظهور حركة استقلال القضاة والاخوان المسلمين وفي 2008 حركة 6 ابريل وبعدها بسنتين حركة العدالة والحرية

وكان العامل المساعد الاعلام البديل مع شراهة النظام في الفساد والتزوير والبطالة والفقر وملف التعذيب مع ازدياد الاسعار بشكل جنوني ومشاكل ملهاش اول من اخر وكل ده ازداد جداا مع 2010 بمقتل خالد سعيد وظهور صفحة كلنا خالد سعيد ومظاهر الاحتجاج السلمية الحديثة وتزوير الانتخابات بالبجاحة اللي ظهرها شبكات الفيس بوك والتويتر واليوتيوب مع تفجير كنيسة القديسين وخروج الاقباط بمظاهرات شديدة جدااا وخروج المسلمين معاهم لاثبات الوحدة الوطنية وكانت المظاهرات في الوقت ده باالاشتباكات اللي حصلت لاول مرة من سنين بالحجم ده وقتها بين الشرطة والشعب واجهاضها كان عامل اساسي في كتمان الغليان للشعب المصري مع دور طبعا منظمات حقوق الانسان اللي كانت بتظهر اعلاميا كل اللي بيحصل

مع ظهور ثورة تونس ومتابعة الشعب المصري متابعة دقيقة للشعب التونسي بخوفه وتحمسه لحد فرحته بهروب بن علي

مع ظهور مصريين بادرو بحرق نفسهم امام مجلس االشعب والشورى على خليفة بو عزيزي التونسي يمكن حد يحس بيهم وثورة مصر تقوم

مع دعوة تحالف الحركات الشبابية ليوم 25 يناير وتصديق الشعب عليهم وكان اول مرة نلاقي ناس عادية بتطبع وتوزع بيانات لليوم

والناس كلها كانت بتحلم بالثورة في اليوم ده معادا السياسين كلهم كانو بيقولو دي مش ثورة دي بداية حراك شعبي

وفوجئنا كلنا ان تحرك الشعب كان اقوى مننا كلنا " والنون عايدة على كل العاملين بالعمل السياسي"

وكل السياسين انخرطو وسط الناس في محاولة لتنظيم الثورة بس كان بردو تنظيم الشعب لانفسهم كان اقوى مننا كلنا وكان اكثر ابتكارا حتى في الشعارات

وفؤجنا بالاعلام تحول من تمجيد النظام السابق الى تمجيد بعض شباب الثورة واظهارهم بمفجرين الثورة واختزال الثورة فيه

وكتيير مننا كنشطاء او سياسين صدقنا اننا اللي عملنا الثورة واننا اصحاب الفضل الاول على مصر ويمكن مننا من كتر خوفه على مصر والثورة كان بيحاول ينقذ ما يمكن انقاذه لكن تعامل المجلس العسكري مع بعض النشطاء من اصحاب النية الاولى او التانية خلانا

متصدرين المشهد بشكل مبالغ فيه قد يظن البعض انه خطأ وقد يظن البعض الاخر بانه كانت خطوة لابد منها

لكن المهم ان الناس حست انهم عملو ثورة ودفعو تمنها غالي اووي واكتشفو ان غيرهم بيمثلهم من غير اخذ رأيهم في اي حاجة

ومع ذلك سكتو وقالو دول مننا وعلينا

لكن شوية بشوية اكتشفو ان المجلس بيستخف بالكل من ناحية ومن ناحية تانية ان المتصدرين المشهد السياسي سواء من النخب الشبابية او من النخب السياسية الكبيرة بيتكلمو في وادي تاني خااااااااااااااالص عن اللي الناس عايزاه او كانت نزلت الشارع عشانه

كل المقدمة الطويلة العريضة دي عشان اقول ان النخبة معملتش ثورة الشعب هو اللي عمل الثورة

ممكن نقول ان في شباب وسياسين من النخبة تعبو شوية او كتيير في النضال ضد نظام مبارك لكن برغم التعب ده كان ليهم دور في الثورة لكن مش هما اللي صنعو الثورة ومفيش حد ليه فضل على حد

الشعب هو اللي ليه فضل على كل من اللي بيتكلم في السياسة

فلما نقول ان الشعب جاهل ومش فاهم واحنا اللي فاهمين واحنا اللي هنحدد ونقرر ونؤره يعمل اللي احنا عايزينه يبقى ايه الفرق بينا وبين مبارك؟؟؟

لما نقول الدستور اولا عشان الدمقراطية هتجيبلنا الحزب الوطني او الاخوان المسلميين عشان الشعب غير مؤهل للدمقراطية

يبقى زعلنا ليييييييييييه من عمر سليمان لما قال كده؟؟؟

ايه الفرق بينا وبين نظام مبارك؟ نفس سياسته بنفس اعلامه اللي كان بيطبقه احنا اللي بنطبقه دلوقتي

وبستغرب اوووي من مطلب منع الحزب الوطني من ممارسة السياسة لمدة 5 سنين؟!!!

ازاي نخااف ان الشعب ينتخب الحزب الوطني وهو الشعب اصلا اللي عمل ثورة عليه.؟؟؟؟؟ مش فاهمة

وبعدين لما نمنع رموز الحزب الوطني من السياسة هنقدر نمنع اعضائه ومخبرين امن الدولة اللي محدش يعرفهم؟؟

ولا ناخدها تلكيكة بقى ونعمل قايمة موحدة نفرض بيها شخصيات على الشعب عشان احنا شايفيين ان الشعب مش بيعرف يختار؟؟؟؟

اصل احنا لازم يعني بما اننا مش قادرين ننزل الشارع فنفرض نفسنا على الشعب عشان فاهمين اكتر منه؟؟؟

اللي مجنني ان نفس اللي كان بيحصل من النخبة قبل الثورة هو هو اللي بيحصل دلوقتي شوية تنظير واختلاق خناقات ملهاش لازمة

ولو سمعنا بعض اصلا ممكن نوصل لحلول ترضي الجميع بس ده لو احنا يهمنا مصلحة مصر اصلا لكن ده احنا حتى نسينا اصول المهنة وقاعدين نشتم ونخون ونستعمل اساليب غير شريفة بعض عشان البقاء للاقوى .. مش كده بردو؟؟؟؟

طيب ندخل في المهم بقى

دلوقتي بما اننا معملناش ثورة والشعب اللي عملها احتجاجا على كل اللي تم ذكره فاحنا معندناش رؤية

اتكلمنا عن ديمقراطية واكتشفنا اننا معندناش تعريف ليها ولو كان لينا تعريف كان زماننا رضينا بال77%

عمالين نعمل تحالفات عشان نبقى ضد الاخوان او الاسلاميين وعشان مين ياخد اكبر قدر ممكن من اللي الجاي

لكن ليه مفكرناش نعمل تحالفات لتكوين رؤية للفترة الانتقالية؟؟؟

ليه مفكرناش نعمل تحالفات وننزل للناس نسمع منهم ونتعلم منهم بدل ما بنتعالى عليهم؟؟

ليه مفكرناش نعمل تحالفات نشوف فيها مصيبة الاعلام اللي بيضيعنا كلنا ونشوف ازاي نخليه اعلام مهني قادر على قيادة المرحلة الانتقالية؟؟؟

ليه مفكرناش نعمل تحالفات مع جمعيات ومنظمات المجتمع المدني عشان نقدر نخدم الشعب باحسن وسيلة ممكنة؟؟

ليه مفكرناش نعمل تحالفات نفكر بيها ازاي نبني اقتصاد مصري قوي؟؟؟

ليه مفكرناش نعمل دورات تدريبية لكل الاحزاب لكيفية بناء برامج حزبية وتدريب كوادرها على االشغل الحقيقي في الشارع؟؟

ليه مفكرناش بدل ما بنتخانق على الدستور اولا ولا الانتخابات اولا ننزل للناس نسمع منهم عايزين ايه في الدستور وعايزين مين يكتبه؟

ليه مفكرناش نحلل مين ال77% بدل ما بنحطهم كلهم في خانة الجهلة والمنساقين ورا التيارات الدينية زي ما بتقولو؟؟

ولا اللي ضدنا يبقى جاهل ومنساق ورا القلة المندسة؟؟

ليه مفكرناش في التجارة السياسية اللي شغالة عمال على بطال في مصر دلوقتي وبيتصرف عليها ملايين وفي ناس بتموت من الجوع؟؟

ليه مبنفكرش نعمل تحالفات ضد المحاكمات العسكرية؟

ليه مبنفكرش نعمل تحالفات ضد اطالة الحكم العسكري في مصر؟

ليه مبنفكرش نعمل تحالفات لعلاج مصابيين الثورة وتكفيل افضل الرعايا ليهم؟

ليه مبنفكرش ازاي نحقق اهداف الثورة اللي الشعب نزل عشانها " عيش .. حرية .. كرامة ... إنسانية" ؟؟؟؟

معقولة احنا ورثنا نظام مبارك بكل سلبياته؟؟؟ معقولة لعنة مبارك بقت جوة كل واحد فينا؟؟؟

انا بسال وبشكك وبتهم ومش مستثنية نفسي من كل الاسئلة والشكوك دي

مفيش حد احسن من حد ومفيناش بطل طول محنا بنلعب بمشاعر الناس بالشكل ده وسايبيين الفساد بيزيد في البلد مش بيقل وسايبيين مجلس بيضحك علينا وعنده حق ما احنا مشغولين بالتقطيع في بعض

رفقا بالشعب يا نخبة .... رفقا بمصر يانخبة ..... فالصراحة مع النفس أولا قبل الدستور

طنطاوي بيعمل ايه؟؟؟

2011-06-23T14:28:00.001+02:00

قبل 25 يناير كنا عايشين في ذل وتزوير وفساد وعملنا الثورة عشان نتخلص من كل ده

والثورة نجحت عشان كلنا اتحدنا على هدف واحد .. الشعب يريد اسقاط النظام

واسقطناه او تخيلنا اننا اسقطناه وفرحنا وحسينا اننا استعدنا بلدنا وراسنا بقت مرفوعة لفووووق قدام كل العالم

بس عايزين نسأل سؤال؟ هو احنا حقيقي اسقطنا النظام؟؟ هو احنا حقيقي استردينا البلد

حقيقي الثورة نجحت في تحقيق اهدافها؟؟؟

عملنا استفتاء وللاسف انقسمنا لأ و أه ومكنش انقسام صحي عشان كان في تخوين وشتايم وتخويف

واي كانت مسميات الانقسام ده .. بس خلاص اتفرقنا

وبعد نتيجة الاستفتاء بنعم .. المجلس العسكري طلع اعلان دستوري بحاجة تالتة خالص غير نعم ولا

ومن ساعتها وفي حاجات بتحصل في البلد غريبة

وفي ايد عارفة كويس ازاي تفرقنا وعارفة ايه اللي بيفرقنا

مش هقول ان كل حاجة بتحصل من فلول النظام لكن في حاجات فينا احنا وعشان احنا اتفرقنا وبعدنا عن الهدف او

بمعنى اصح تهنا عن الهدف

فبقى من السهل جداا تفريقنا وضربنا ببعض

وطبعا بعد ما الانفلات الامني اللي حصل وبيحصل الداخلية نزلت بشكل صوري في البلد وبتقولك اصل احنا هيبتنا

ضاعت وكرامتنا مش عارفة راحت فين

عشان لما نتعب ونزهق نقول احنا اسفين يا صلاح فين ايامك يا عادلي

ياريت الامن يضرب بيد من حديد البلطجية

والامن لسة بيتقل وبيربينا فالمجلس ينزل قرار انه صبره نفذ على البلطجية

طب سؤال : ايه هو تعريف البلطجية؟؟

وايه هو القانون اللي هيستخدموه ضدهم؟

ولا اي حد مش عاجبهم يبقى بلطجي؟ زي مثلا لو ناس بتتظاهر ضد المجلس ؟ او ناس بتطالب بالافراج عن ظباط

الجيش اللي المجلس اعتقلهم

عشان وقفو جمب الشعب؟

ولا ممكن البلطجي اللي هو بينتقد في طنطاوي .. او بيطالب بمحاكمته مثلا

او ممكن الاسلاميين هما البلطجية زي ما مبارك كان بيقول وكان اي حد بيتكلم في الاسلام ومربي دقنه كان بيتاخد

امن دولة

ودلوقتي عشان يقولو ان مبارك كان صح يستخدمو بعض المتطرفين ومعاهم شوية بلطجية ويقولك اصل السلفييين

هما اللي مضيعيين البلد

وبعد موت بن لادن بقى بما انه الارهابي الي بسببه دمرو افغنستان يقولك اصل في مصر في ارهابيين وبما ان في

ناس بتستقوى بامريكا وعايزين

حماية دولية فده يبقى سبب ادعى ان يبقى في تحكم في شئون مصر بعد ما مبارك خلاص راح

طب بلاش البلطجية

هو ليه يحي الجمل طالع بيقول انه هيشكل لجنة لتشكيل دستور جديد؟؟

طب بلاش دي

هو ميين اللي هيقرر شكل الدولة الجاي هيبقى عامل ازاي؟

وميين اللي هيقرر النظام الانتخابي هيبقى عامل ازاي؟ يا ترى هيبقى بالقايمة النسبية؟ ولا نظام فردي ؟ ولا نظام مختلط؟؟

ميين اللي يقرر مين يتحاكم مدني ومين يتحاكم عسكري؟

ميين اللي يقرر ان مبارك وسوزان يترحلو على السجن ولا يفضلوو في المستشفى؟

ميين اللي يقرر الانتخابات تبقى بعد قد ايه؟

ميين اللي يقرر ايه اللي في صالح الشعب؟

ميين اللي يعرف يسائل ويحاسب المسئولين؟

ميين الي يقدر يحاسب الشرطة العسكرية؟؟

الانتهاكات اللي حصلت من الشرطة العسكرية وكلنا تغاضينا عنها عشان الاستقرار مين اللي يحاسب عليها؟

الاعتقالات والتهديدات لكل اللي بيتكلم على المجلس او الشرطة العسكرية ازاي وفين نحاسب عليها؟؟

كل الاسئلة دي واكتر موجودة ومحدش بيواجب والسياسين مشغولين بانشاء الاحزاب والتسويق ليها

واحنا اصلا لسة مش عارفين قانون مباشرة الحقوق السياسية هينص على ايه

وناس كتييير بتسترزق دلوقتي من قفا الثورة اللي لسة محققتش اهدافها

الثورة بتتجه لاتجاه تاني خاااااااااااااالص واحنا عمالين نتخانق ونقول مين بطل الثورة ومين بيكلم مين ومين بيعمل ايه

بدل ما نتوحد كلنا على هدف واحد ويبقى لينا راي واحد نضغط بيه على المجلس العسكري

سايبنه يعمل اللي هو عايزه واللي بيرأس اصلا المجلس المشير طنطاوي اللي متربي اصلا على ايد مبارك

وعايزني اكسبها؟؟؟

طب ازاي؟

لازم نتوحد ونفكر ونستنى شوية على مكتسبات الثورة الشخصية لكل واحد ونفكر في مصر يا جماعة

مصر اللي دخلت الحرب العالمية الباردة

اللي العالم كله مش مصدق انه اتفقع ظمبة بسقوط عميله الاكبر في المنطقة العربية

حرب باردة بيدورو فيها على عملائهم الجداد او يمكن بيمكنو فيها القدام اللي مكنوش من رموز النظام

ياريت كلنا نفوق ونتوحد على رؤية وهدف واحد نقوم بيه بلدنا

ياريت كلنا ننزل الشارع تاني اللي معظمنا نسيه

ياريت نعرف ان اللي عارف متحمل ذنب اللي ميعرفش

وكل واحد عارف ياريت يوعي اللي ميعرفش

المسئولية مش في ايد تيار لوحده ولا في ايد قوى لوحدها

المسئولية علينا كلننننننننننننننا

وهقولها للمرة المليون .. كلنا عايزين استقررار بس ياريت نعرف معنى الاستقرار

استقرار الفساد؟؟؟ ولا استقرار العدل والحرية؟؟

by Asmaa Mahfouz on Saturday, May 14, 2011 at 11:10pm

ردا على مقالة سعد الدين ابراهيم عني

2011-06-23T14:18:00.001+02:00

يوم الجمعة اللي فاتت 27 مايو كنت راجعة من بروكسل عشان كنت من ضمن 4 ناشطات مصريات في زيارة الى البرلمان الاوروبي للتحدث عن الاوضاع في مصر وتبادل الخبرات والبحث في العلاقة المصرية الاوروبية من بعد الثورة

كانت الدعوة في الاساس كانت فكرة نائبة في البرلمان من حزب الخضر انها تدعو مصريين ويكونو من العنصر النسائي تحديدا من ناحية نلبي الهدف الاساسي ومن ناحية اخرى عشان قضية حقوق المراة بالاخص سياسيا وانهم يدعو نساء من مصر يشوفو النساء في البرلمان والمجتمع المدني وحياتهم وكده .. فاتفقت مع الحزب بتاعها ومنظمة اخرى لدعم التكاليف وطبعا مش عشان سواد عيونا بس عشان دي مصلحتهم اقتصاديا وسياسيا

المهم سافرت انا وناشطة من الاخوان و ناشطة من حزب التحالف الشعبي وناشطة يسارية مستقلة

4 ناشطات من 4 اتجاهات مختلفة ولكن كنا متفقين على مباديء واحدة تقريبا

لما وصلنا بروكسل وقابلنا مسئولين هناك كانو شغوفين جداا يعرفو عن الاوضاع في مصر عن قرب وكانو متخوفين جداا من اللي بيحصل في الوطن العربي ومتخوفين ان ده يقصر علىيهم " طبعا مش بيقولو كده صراحة يعني" وكمان متخوفين جداا من الاسلاميين خصوصا الاخوان وعندهم افكار غلط تماما وواضح ان الاعلام وبعض الناس مأثرة عليهم

ده غير انهم كانو دايما يشكرو في سوزان مبارك وبيقولو عليها عملت انجازات كتيييييييييييير

وكانو بيناقشو فكرة زيادة حجم المعونة لمصر وعايزين يعرفو يحطوها فين وعايزين يجو يراقبو الانتخابات

كان ردنا عليهم في الاربعة نقط دول بمنتهى الاختصار:

1- انتو اللي صنعتو دكتاتورية حكام العرب ودعمتوهم ومسمعتوش ابدا لاي صوت حر واحنا اللي عملنا الثورة من غير مساعدة حد واثبتنا ان القوة للشعوب وان مفيش اي قوة تقدر تتحكم فينا تاني .. وانكو اتعلمتو درس ان مش من مصلحتكو تتدعمو

2- مش عايزين معونة من حد احنا مش دولة فقيرة ولا ضعيفة احنا دولة قوية ولينا موارد كتيير ولكنها كانت منهوبة .. احنا مصلحتنا

واحدة فعايزين استثمار مشترك وعايزين تسهيل ابواب التجارة المشتركة

3- لو بتتكلمو عن حقوق الانسان فالوقت ده فالاولى تتكلمو عن سوريا وليبيا وباقي البلاد العربية اللي في كل دقيقة بيتقتل اطفال ونساء وده شأننا ايضا عشان مصر بتمثل الوطن العربي

4- بالنسبة لتخوفهم من الاسلاميين فاحنا معندناش اسلاميين بتعض دي فزاعة كان بيسخدمها نظام مبارك اللي اتعلمه من امريكا ودلوقتي بيستخدمها نظام طنطاوي وان الاسلام عمره ما كان بيحس على العنف وتطبيق الحد في الاسلام مش سلطة لاي حد يطبقها وان مفيش حاجة اسمها دولة اسلامية .. لكن في دعوة للمرجعية الاسلامية عشان الاسلام ادانا اطار عام واسس نمشي عليها مدناش دستور دولة .. فالاسلامين في مصر بيدعو للدولة المدنية ذات المرجعية الاسلامية وان الفتنة اللي في مصر مش كلها حقيقية بدليل اننا كنا كلنا بما فينا التيارات السلفية والاخوانية كنا في التحرير ومكنش في فتنة ومفيش كنيسة واحدة حد قرب منها ... وان اللي بيحصل دلوقتي استخدام بعض العناصر لتسخين النفوس المريضة لدى الطرفين + تضخيم اعلامي + ان في حوادث حصلت اتكتبت في الاعلام بشكل مغلوط تماما

5- كانت معانا عضوة بالاخوان المسلمين وكانت مثقفة جداا وواعية جداا ومحترمة جداا وازهلتهم هناك بردودها وكلامها عن الاخوان المسلمين وكمان كانو مذهولين اصلا من فكرة ان في نساء اخوان بالعقلية دي وكمان ليها نشاط سياسي خصوصا انها مشاركة في تأسيس حزب الحرية والعدالة

6- احنا معملناش ثورة عشان دلوة تانية تيجي تراقب على الانتخابات احنا قادرين اننا نراقبها ونتاكد من نزاهتها .. لو عايزين تساعدو يبقى بالخبراء لمساعدة المراقبين المصريين لكن من غير تدخل.

تقريبا ده كان ابرز النقط بمنتهى التلخيص

نيجي بقى للموضوع:

وانا راجعة من بركسل في المطار قابلت سعدالدين ابراهيم وكانت اول مرة بشوفه واللي خلاني اسلم عليه اني صدقت الاقي واحد بيتكلم عربي وخصوصا اني راجعة لوحدي

فروحت اتاكد ان هو قالي ايوة انا سعد الدين فسلمت عليه وقلتله انا اسمي اسماء محفوظ ناشطة سياسية ولقيته يعرفني ولما جيت امشي لقيته شايل شنطة وكان تعبان جداا خصوصا انه كبير في السن فساعدته انه يوصل للطيارة خصوصا اننا في طيارة واحدة وفي خلال انتظارنا للطيارة حبيت اعرف رايه ايه في الوضع الحالي ولقيته هو كمان عنده افكار مغلوطة عن التيارات الاسلامية ولقيته بيسالني انتي هنا ليه ولما قلتله وحكتيله اتخض ولقيته هاجمني بشكل غاضب .. انتي باي حق تقولي مش عايزين معونة من حد؟؟

- قلتله احنا مش جايين نشحت واحنا مش محتاجين اصلا احنا محتاجين استثمارات وتكون كمان مشتركة لكن يمنو علينا ليه؟؟؟ قالي استثمارات ايه؟؟ هو احنا حيلتنا ايه ولا عندنا ايه عشان نصدرلهم استثمارات؟؟؟ وبعدين يعني ايه " من" ده حتى ملهاش مرادفات في اللغة العربية

حاولت اشرحله وجهت نظري لكن بدون جودى خصوصا انه كان بيحاول يقنعني برايه بحجة اني عيلة ومش فاهمة وان لازم نخلص من فزاعة الغرب انهم عايزين يتحكمو فينا وانهم مش كلهم كتلة واحدة وملهمش هدف واحد

وغضب اكتر لما عرف اننا رفضنا المراقبة على الانتخابات وقال يعني انتي بتبوظي كل حاجة بجهلك ده

-وجه الكلام عن الاسلامين والسلفيين والاخوان .. ولقيته بيتكلم زيه زي الغرب بالظبط قلتله حضرتك بقالك فترة برة مصر لكن انا عارفة الناس دي وعارفة المتطرف منهم لكن نحمي نفسنا من التطرف الديني بالقانون لكن مش باننا نسوء سمعة الاسلام والتيارات الاسلامية ونخلق فزاعات ملهاش لازمة

كان كلامه اني مش فاهمة حاجة وحاول يكرهني في الاخوان والسلفيين وساعتها جه الكلام عن حادثة اطفيح

وقلتله ان الشباب راحو وعرفو القصة من البداية وكانت ملهاش علاقة بالدين لكن تجاهلها وعدم تنفيذ القانون وعدم وجود امن وصل الامر للي حصل ... لكن مفيش قصة ان السلفيين بيقفشو في المسيحين وبيقتلوهم وبيحاصرو الكنايس وكلام الاعلام والهجايص ده

طبعا مكنش موافقني وكان في مهاجمة حادة منه وكان نفسه يعرف مين اللي ماثر على دماغي

وكان ردي عليه ده راي حضرتك ومن فضلك متفرضوش عليا

جينا لقضية فلسطين وبيقولي وايه خطتك بقى؟؟ قلتله ان شاء الله لما مصر تبقى بلد قوية هنحرر فلسطين ونعلن انها دولة فلسطينية

قالي والاسرائيلين يروحو فين؟ قلتله ما يغورو في داهية واحنا مالنا دي ارضنا

قالي وانتي ايش عرفك؟؟؟ ارض فلسطين ولا اسرائيل؟؟؟ هو انتي كنت مولودة يوم ما اتخلقت الارض؟؟

مفيش حاجة اسمها نرجع ارضنا والكلام ده مفيش حاجة من دي هتحصل

حسيت ساعتها ان مينفعش اكمل كلامي تاني معاه وسيته ودخلت الطيارة والحمدلله هو كان في البيزنس وانا في الاكونومي عشان كان مصمم يحاول يزرع في دماغي افكار التطبيع وقلتله شكرا لحضرتك كل واحد فينا ليه فكره

سعد الدين ابراهيم كاتب مقالة عن حديثنا ده وبيوهم الناس اني بدافع عن التيارات الاسلامية بالكذب وده محصلش

بس الحمدلله لقيت الردود من الناس اللي متعرفنيش انه مألف قصة من نسيج خياله واعتقد ان الردود دي تعلم سعدالدين ابراهيم ان عيب اووي تحوير كلام الناس وان عمره ما هيعرف يدس افكار التطبيع في مصر سواء مع قراءه او من اي حد بيقابله او بيتكلم معاه

http://www.almasry-alyoum.com/article2.aspx?ArticleID=299116&IssueID=2156#CommentFormAnchor

Asmaa Mahfouz

Saturday, June 4, 2011 at 9:13pm

حسن راتب وموقعة الجمل

2011-06-23T09:56:00.001+02:00

وم الاتنين 31 يناير 2011

كان في لقاء على قناة المحور قبل اول مليونية في ميدان التحرير

وكانو بيحاولو يوجهو الحوار لمنع المليونية دي بأي شكل .. اقترحت ان تنزل شخصية من الجيش للميدان ويتكلمو مع الناس وينفذو مطالبهم انهاردة قبل بكرة عشان متحصلش كارثة وكان ساعتها كل الناس مرعوبة في الوقت ده

كان الرد من سيد وهناء اننا نجيب مسئول من الجيش على الهوا ونجيب عشرة من الميدان وتحصل مناقشة ما بينهم على الهوا قدام كل الناس

قلتلهم انزلو اسالو الناس في الميدان انا ماليش حق القرار وقلتلهم انا هخلص البرنامج وانزل على الميدان واسال الناس

بعد ما الحلقة خلصت لقيت حسن راتب بيقولي استنيني عايزة اتكلم معاكي بس هطلع اقول كلمة وارجعلك وجيت اشوف الكلمة لقيت المنتج بتاع القناة قالي تعالي اتكلم معاكي شوية ولهاني اني اشوف حسن راتب بيقول ايه

عرفت بعد كده انه قال انه اتفق معايا ان بكرة هيجيبو عشرة شباب وانا اللي هخترهم عشان يتفاوضو على الهوا وده محصلش

طلع لي حسن راتب بيقولي انا عندي معلومات سرية ولازم تعرفيها

قلتله خير؟

قالي حزب الله وايران جايين بكرة الميدان هيدبحو في الناس ويولعو في البلد

اللهم اني بلغت اللهم فاشهد

ساعتها عرفت ان الحزب الوطني كالعادة بيطبخ مصيبة وهيلبسوها لحزب الله وايران

عربية القناة نزلتني قبل التحرير وكان معايا ابن عمي معايا

ومشينا لحد ماسبيرو ولقينا كان في مظاهرة ورايحين يحتكو بالجيش ولقينا الدبابات بتتحرك وابتدت تضرب نار على الهوا

نزلنا تحت العربيات وندينا على ظباط الجيش قلنالهم احنا عايزين ندخل الميدان

فسابونا ندخل وجرينا على الميدان ولما رحت سمعت كلام غريب ان ناس ابتدت تلف على الميدان بميكرفون وتقول أسماء محفوظ لا تمثلنا هي باعتنا للحكومة وتفاوضت معاهم

ولما دخلت الميدان لقيتهم مش قابلين مني اي كلام خالص وكانو بيعتبروني خلاص عميلة حاولت اقولهم كلام حسن راتب قالولي انتي مش هتخوفينا انتي خلاص بعتينا

وناس ابتدت تشتم وواحد قال لابن عمي خدها وامشي بدل ما تتضرب

مشيت ومكناش اصلا عارفين هنروح ازاي في الوقت ده وكنت منهارة ومش عارفة اصدق اللي بيحصل

وكان كل الناس حتى صحابي بيتصلو بيا يشتموني ويقولولي انتي بعتينا يا بنت كذا ويا بنت كذا

ده غير تهديدات بتوع امن الدولة وشتايمهم

فضيلنا ماشيين لحد ما بين رمسيس وما بين غمرة ولقينا تاكسي واترجيناه يوافق يوصلنا وكان خايف البنزين ساعتها يخلص منه ومفيش بنزينة فاتحة بس كان ناقص نبوس ايده عشان يوافق يودينا اي حتة

مش مهم اصلا الحكاية دي كلها ولا اللي بعد كده

المهم من القصة اللي حصل مع حسن راتب وانه كان عارف اللي هيحصل يوم موقعة الجمل

وافتكرت الكلام ده لما شفت المحور دلوقتي وسالت نفسي ازاي القناة دي لسة شغالة وسالت حسن راتب فين من القضايا

زهلت انه لسة برة ومحدش حتى وجهله اي تساؤل

أحد البلطجية سرق موبايلي لكن مدير الأمن لم يسكت.. صرخ بعلو صوته: هاتولي البت دي!

2010-04-09T22:07:00.001+02:00

6 أبريل» اليوم الوحيد اللي عيني توقفت فيه عن العياط، مقدرتش أعيط إلا آخر اليوم بعد كل اللي حصل وبعد الضرب والإهانة، لأن العياط وقت الضرب كان معناه الضعف وبنات مصر و6 أبريل أثبتوا أنهم أرجل من النظام واللي بيقولوا عليهم رجالته، النظام اللي سرق حلمنا، والبلطجية اللي خطفوا شبابنا، والحرامية اللي سرقوا موبيلاتنا، سحل في الشارع وسرقة لأجهزة الموبايل وفلوسنا وكل ده علشان مطالبنا وحقنا، 3 مطالب كنا بنام وبنحلم بيها وكانت بالنسبة لينا مفتاح الحرية لأكثر من 3 شهور، بنظم ونفكر ونحدد ثلاثة مطالب، تغيير في 3 مواد من الدستور يقدر بيها كل مصري يترشح لانتخابات الرئاسة ونلغي قانون الطوارئ ويتناقش قانون مباشرة الحقوق السياسية اللي قدمه 100 نائب لمجلس الشعب، رفضنا أن نكون تنظيماً سرياً أعلنا لكل الدنيا مطالبنا وقلنا للداخلية هنعمل وقفة أمام مجلس الشعب وبعتنا لهم إخطار بالمسيرة وحددنا يوم 6 أبريل الساعة 12 الظهر موعداً لإعلان مطالبنا، توقعت أن الأمن كالعادة سيمنعنا من الوقفة أو علي الأقل سيعتقل شباباً من الحركة قبلها بيوم لكن الأسوأ حصل من الساعة 8 الصبح، عرفت إن إسماعيل الشاعر - مدير الأمن - كان في الميدان بيباشر بنفسه توزيع الأمن والبلطجية، اتحركت من البيت واتفقت أقابل ندي ونيللي وعواد قدام جامع الفتح في رمسيس وأنا في الطريق جالي اتصال بيقولي مترحيش علي رمسيس أي وجه معروف بيتقبض عليه، انتظرت لحد معاد المظاهرة الساعة 12 وشوفت قد إيه الأمن كان مستعداً بالفعل، جميع مداخل ومخارج التحرير والقصر العيني وشارع الفلكي مغلقة فقررنا إننا نتجمع في الشوارع الضيقة لحد ما وصلنا عند مجلس الشوري لقيناهم بيعملوا كردون من عساكر الأمن المركزي، كردون ضيق كأنهم مش عايزين عددنا يزيد علي كده، وبكل عنف.. بدأنا نهتف 5 دقايق وفجأة حسيت أن فيه كباسة بتكبسنا في بعض.

إحساس بشع وإحنا في مفرمة، شايفة ناس كانوا هيموتوا وكل شوية يشدوا واحد يطلعوه برة ويسيبوه وسط 10 بلطجية يكسروا فيه، شوفت إنجي بتتشد من شعرها ومن ملابسها، وبنات تانية كانت واقفه معانا لأول مرة أشوفها بتنضرب بالشلاليت، منتهي الوحشية والقذارة رغم الضرب والعنف، كنا مصريين نكمل وكنا بنحاول نصمد، وعملنا أكتر من مسيرة وإحنا بنهتف، وفي نفس الوقت بننضرب، ولما وصلنا لحد المجمع اتلموا علينا من كل مكان بلطجية وقيادات وأمن مركزي بعصيان وعربيات ترحيلات جابوها ولقيتها بتركن ولقيت مرة واحدة 10 بلطجية بيضربوا بنتين حاولت أشدهم فجأة بصيت حواليا ملقتش حد من الناشطين الشباب وملقتش عربية الترحيلات كانوا اتاخدوا خلاص اكتشفت أن الأمن نازل يضربنا ويسحلنا ويسرقنا، يسرق حلمنا وكمان يسرق فلوسنا وموبايلاتنا وأنا بتكلم في التليفون لقيت واحد شد الموبايل مني بشكل عنيف كأنه كان بياخد وشي كله.. وطلع يجري زي الحرامية، والظباط حموه ولقيت ظابط مباحث بيقولي عايزة موبايلك؟؟ تعالي معانا هنوديكي ليه، ولقيتهم بياخدوني وبصيت لقيت مخبرين وبلطجية وظباط حواليا وإسماعيل الشاعر بميكرفون وهو بيقولهم هاتولي البت دي.. ولقيت هشام العراقي بيقولهم سيبوها سيبوها تمشي ولقيت ناس نشطاء أخدوني.

وكفاية أن كل واحد ضرب بنت أو شد شعرها أو اعتدي علي ناشط هييجي يوم عليه وفي نفس المكان والناس هتعمل فيه أكتر من اللي عمله.

http://www.dostor.org/politics/egypt/10/april/7/12241

صباح الامل والحرية والتغيير

2010-04-09T21:59:00.001+02:00

صباح الخير والأمل والحرية والتغيير

يوم 6 ابريل 2010

بقى ليه معنى كبيير في كل واحد فينا

شفنا خوف النظام في غضبه

شفنا الجدعنة في تصرفات كل الشباب

شفنا كل واحد فينا خايف على اللي حواليه ومش همه نفسه

شفنا الاصرار في عيون المصريين على الهتاف وانجاح اليوم وعملو مسيرات وسط البلطجية في كل شوارع وسط البلد

نجحنا

ايوة نجحنا في اننا نفوق مصريين كتييير غيرنا

نجحنا انه يحضر لليوم مش بس شباب لأ

ده من أول سن ال17 لسن ال70 حضرو اليوم وهتفو بأعلى صوتهم

" تحـــــــــــــــيا مــصـــــــــــــــر"

نجحنا في اننا نوصل صوتنا لكل الناس اللي شافتنا من البنوك والشركات والمواصلات واللي ماشيين في الشارع

قدرنا اننا نوصل صوتنا للعالم كله

قدرنا اننا نقول احنا المصريين عايزين تغيير

عايزين نغيير 3 مواد دستور هينقذونا من الاستبداد والتوريث والفقر والفساد

قدرنا اننا نقول ان المصريين فاقو وبيقولو حررررررررررررررية بأعلى صوتهم

كل من حضر اليوم واتضرب واتسحل رجع أقــــوى

كل من تم القبض عليه رجع أقــــــوى

كل من تألم لمشاهدته ما حدث .. قرر انه يشارك في اللي جاي

كلنا قررنا اننا نكمل بكل حماس وصمود

و

حـــــــــــــــــب

ايوة حب

حب البلد

حب المصريين لبعضهم

حبنا لبعض

حبنا للحرية

كل يوم بنتعلم وبنقوى وبنزداد خبرة

اللي حصل ده اكبر نجاح لينا كلنا

احنا بنطالب بالتغيير واتفاجئنا اننا في طريقنا بنغير وبنتغير للي احنا عايزينه

هنتجمع وهنتكلم وهننتاقش في جلسات عصف ذهني

صباح الفل على كل المصريين الجدعان

انهاردة وبكرة أحلى بينا

:-))

يوم واحد من وقتك هيفرق كتيييير في حياتنا كلنا

2010-03-30T00:41:00.001+02:00

ضحي بيوم واحد من وقتك وخد اجازة من شغلك وتعالى معانا يوم 6 ابريل 2010 الساعة12 ظهرا امام مجلس الشعب

هنطالب بتغيير 3 مواد من الدستور 76 و77 و88 اللي هما اكبر عقبة في تغيير مصر وعقبة في طريق مستقبلنا

حضورك هيفرق كتيير ..... من غير ما تطالب بحقك بنفسك يبقى عمرك ما هتاخد الحق ده وكمان حق البلد دي

حقنا كشعب متوقف عليك وعليا

خد اجازة من شغلك يوم 6 ابريل وتعالى طال بابسط حقوقك وباسلوب سلمي تماما

لو انت مجتش غيرك مش هيجي ولو انت جيت ساعتها الحكومة هتفكر بشكل جدي في تنفيذ المطالب دي

الحكومة ساعتها هتعرف ان اغلبية الشعب المصري فاق ومصمم انه ياخد حقه

مستقبلك ومستقبل اولادك مش هيكون كويس طول ما مصر متكتفة بقوانين معقدة وفايدتها مقتصة بس على اللي ناهبين البلد.

فكر ولو مرة حاجة بجد

يوم 6 ابريل 2010 أملنا الحقيقي في تغيير الدستور ... أملنا الحيقي اننا نقول للظلم لأ وللفقر لأ

أملنا الحقيقي في رسم مستقبل حقيقي لينا كلنا

اوعى تقول مليش دعوة .. المعاناة اللي انت فيها مرتبطة بمواد الدستور دي

الغلاء اللي بيزيد يوم عن التاني بسبب شلة مسئولين نصابين

الأمراض اللي احنا فيها بسبب الحكومة اللي بقالها 30 سنة بيشربنا مية ملوثة واكل مدود وفاكهة بهرمونات وغيره وغيره

قلة الوعي والجهل اللي احنا فيه بسبب مسئولين فاشلين مبيتغروش

الفساد اللي حوالينا ي كل مكان بسببحكومة عايزة تنهب وبس

كل ده بسبب اشخاص مطمني انهم مش هيتغيرو عشان قوانين هما اللي حاطينها بنفسهم وعلى مزاجهم

وطبعا هما مطمنين انهم سايبنك وسايبيني غرقانين في بحر من المشاكل اللي هي بسببهم اصلا

طب ليه نسكت؟؟!!! معدش في وقت والله

عشان خاطر مستقبك ومستقبل شعب بحاله تيجي يوم 6 ابريل 200 الساعة 12 الظهر قدام مجلس الشعب

تعالى طالب بحقك معانا

وكلم صحابك وقرايبك وجيرانك وعيهم بأهمية اليوم

اوعى تموت الامل بايديك ونرجع كلنا نندم

ميعادنا 6 ابريل 2010
حلمك بين ايديك

Carl Orff: Carmina Burana

2010-03-24T16:09:00.001+02:00

يعني ايه تغيير 3 مواد دستور؟؟

2010-03-18T00:21:00.001+02:00

يعني ايه تغيير 3 مواد دستور؟؟

يعني خلق فرصة لتغيير الرئيس الحالي

يعني تغيير النظام الحالي

يعني تقييد الرئيس القادم بفترة رئاسية محددة بدل ما كل واحد يجيي يكبس على نفسنا لحد ما يموت

يعني في رقابة من القضاء عشان الانتخابات متتزورش

يعني هيبقى في منافسة حقيقة ونزيهة بين المرشحين

يعني منافسة على تلبية احتياجات الشعب

يعني اصلاح وضع فاسد

يعني تغيير وزاري

يعني وزير المالية يتغير يعني اقتصاد مصر يتغير

يعني وزير التعليم يتغير وتعليم مصر يتغير

يعني وزير الصحة يتغير نلاقي مستشفيات نضيفة تعالجنا

يعني تغير وزير الضمان الاجتماعي ونلاقي دعم بجد على رغيف العيش اللي بجد

يعني وزير داخلية يتغير ونحس بادميتنا في الشارع ونحس باالامان ونتعامل باحترام من ضباط الاقسام

يعني نواب مجلس شعب يتغيرو ونحس باهتماهم بينا ويطالبو بمطالبنا وحقنا احنا مش ينهبوه

يعني ويعني ويعني ويعني ويعني

حقي وحقك وحق ولادك وولادي

وحق بلدنا كله في ايدينا احنا

لما تتطالب بحقك في تغيير دستور بلدك اللي شوية عصابة لفقوه وحطوه وكنا احنا السبب اننا مرفضناهوش

وجه الوقت اننا نطالب بتغييره

انا وهو وهي لوحدنا مش هنقدر نعمل حاجة من غيرك

ولو في خطر علينا هيبقى عشان احنا من غيرك

انت لازم تتحرك معانا

تغيير الوضع الحالي هيبدأ من عندك انت

ايه؟ خايف؟

ومش خايف وانت ماشي في الشارع تتقتل من شوية بلطجية ومفيش حتى عسكري واحد يحميك؟؟

مش خايف على ولادك يجيلهم سرطان من المية اللي بيشربوها؟؟

مش خايف من ربنا عشان بقيت بتاخد رشوة من واحد عشان تديها لتاني عشان تخلص مصالحك

اللي هي اصلا من حقك؟؟

مش خايف يتقبض عليك عشان تشابه اسماء وحلني بقى عشان تتطلع وربنا عالم باللي هيتعمل فيك

جوة؟؟

مش خايف على اختك تعنس عشان رجالة مصر المحترمين مبقوش لاقيين ياكلو عشان يلاقو

يتجوزو؟؟

مش خايف من سنك اللي بيكبر وانت لسة ملقتش وظيفة محترمة؟؟

مش خايف من كل ده وما خفي كان اعظم؟؟

اوعى تخاف الا من اللي خلقك واوعى تخاف من المطالبة بحقك

تلات مواد دستور لو اتغيرو هنعبر من بوابة طريق مصر التغيير الصحراوي اللي لو مشينا فيه هيبقى زراعي

فكر كده

لأ لأ سوري ده مفيش وقت للتفكيير

يلا معايا للتغيير ;-)

رسايل المصرييين من مصر وبررة مصر ... ضروري تقروها

2010-03-03T21:40:00.001+02:00

مكالمات وايميلات بتيجي للحركة من مصريين مغتربين برة مصر وتيلفونات من شباب ورجالة وسيدات كبار وشباب
من كل المستويات الثقافية والاجتماعيية

تلفون من مصريين في قطر
===============
الوووو السلام عليكم شباب 6 ابريل
احنا معاكم انتو شباب امل مصر احنا فرحانين اوووووووي ان في شباب بتعمل حاجة لمصر

احنا تعبانين اووووووووي اللي خلانا نسافر ونتغرب عن بلدنا ان مفيش شغل في مصر مفيش امان مفيش اي حاجة
الحكومة خلصت على البلد
انا بكلمك بس عشان اقولكم ان احنا معاكم وكل المصريين اللي هنا معاكم واللي عايزينا نعملو هنعملو
احنا لازم نغيير بقى لازم نبقى بني ادمين ... احنا مستعدين نعمل اي حاجة بس البلد دي تبقى احسن
وهنحاول نعمل وقفة عند سفارة مصر في قطر اليوم ده مع انه صعب جدااا بس خلاص بقى احنا هنعمل اي حاجة عشان مصر
ربنا معاكو واوعوا تخافو من حاجة واي حاجة امن الدولة هتعملها معاكو هتبقى في ميزان حسناتكو
ربنا ميرضاش بالظلم ابدا وانتو بتدافعو عن شعب بحالو

تلفونات من السعودية
=============
السلام عليكم شباب 6 ابريل
الوووو يا امل مصر والمصريين كلهم
احنا معاكم يا اجدع شباب .... خلو بالكم من نفسكم واحنا هنا كلنا بندعيلكم واحنا بنعمل كل اللي نقدر عليه عشان ننزل مصر ونكون موجودين في يوم 6 ابريل
احنا بنموت هنا يا استاذة والله بنموت .. حسني مبارك سوء سمعة مصر في كل حتة والعالم كله بقى بيكره المصريين
وقولي لدكتور البرادعي اوعى تسيبنا يادكتور لوسيبتنا احنا هنموت انتي متعرفيش احنا متهانيين هنا قد ايه
احنا نفسنا نعمل ححاجة في السعودية بس مينفعش هنا الكلام ده هنا بيحتقرو المصريين
بس احنا عمالين ننشر رسايلكو في كل مكان وبنتكلم مع كل المصريين وكلهم فخورين بيكم جداا وهتلاقو الاف هيكلمكو
عشان نفسهم بس يقولو اننا معاكم بكل قلبنا واللي فينا ربنا يقدره ويقدر ينزل هينزل وهيكون معاكم
ومش خايفيين من حاجة ان شاء الله يعمونا ويعذبونا معدناش خايفيين
انا واحد من الناس كل امنيتي اني ادخل ابني كلية عسكرية ومش عارف
انا عايش ذليل انا وولادي بس العيشة بقت غالية اوووي في مصر ومفيش شغل ومرتبات متكفيش تاكل اسرة
حرام اللي بيحصل ده .. اوعو تبطلو اللي بتعملوه عشان خلاص معدناش نستحمل اللي بيحصل ده
لازم نعمل اي حاجة عشان ناخد حقنا في بلدنا
احنا معاكم احنا معاكم بس خلو بالكم في ناس كتيييير متعرفش الانترنت ونفسها تعمل حاجة
الحل هو الشارع واحنا في السعودية هنوصل صوتكم للشارع وانتو وصلو صوتنا في الشارع في مصر

وواحد منهم قالي انا عندي 65 سنة وقدمت على اجازة انا وهاجي يوم 31 مارس عشان ابقى معاكم في 6 ابريل
ومستعد اشتغل بدمي بس اعمل حاجة للبلد دي
عايزين راجل زي البرادعي يجي يشيل الاهانة والذل اللي بنشوفه .. الحيوانات بتتعامل احسن مننا
الله يخربيته الراجل اللي ماسك البلد دي خربها واهان كل المصريين برة وجوة ربنا معاكم وخدو بالكم من نفسكم وكل الناس معاكم
وقولو للبرادعي احنا وراه وهنكمل وياه

تلفونات من ناس كتيير في مصر

احنا معاكم وايميلات من مصر من ستات بيوت وطلبة جامعة عايزين يشاركو في يوم 6 ابريل وتحضيره
اللي يقدر ينزل واللي عايز يشارك في البيت واللي بيتصل بيقول افكار
زمان كنت بقول لازم الناس العادية تفوق ... دلوقتي بقول لازم احنا اللي نفوق احنا شايلين مسئولية كبييرة ومش هينفع فيها اي دلع
لازم كلنا نتحد ونعمل حاجة بجد لكل المصررييين جوة مصر وبرة مصر لازم نعمل كل جهدنا

تلفونات الناس دي قدتني قوة وشجعتني اني اكمل بكل قوتي مهما خسرت هفضل كسبانة كفاية اوووي اني اقدر اعمل حاجة

انشرو صوتنا في كل حتة يا جدعااااان الناس متبعاااانا والناس تعبانة بجددددددد وجه وقت القومة اللي بجد اللي معدش ينفع اي سكوت او اي خوف
ياااااااااااااااااارب خليك معانا وقوينا وقدرنا ناخد حقنا وحق كل الناس دي
انتو مش متخليين انا متقشعرة ازاي وبترعش من كتر الفرحة وقلبي وجعني اوووي على اهل بلدي واللي والله العظيم ما هسيبهم
حتى لو اتجلدت .. المصريين يستاهلو الخير كله ومصر هتفضل ام الدنيا بس لازم نقدر نغير النظام الزبالة ده وعلى راسهم حسني وابنه

لازم نصمم بكل قوتنا اننا نغير الدستور عشان دي اول خطوة ولازم ننزل الشارع نتكلم مع كل الناس
وصاية المغتربين برة لازم نعملها اننا نوصل صوتنا للمصريين اللي معندهمش انترنت في البيت

علو صوتكم كمان وكمان اكييد في الاخر هننجح وفرحة النجاح المرة دي مش هتبقى زي اي يوم تاني
فهمتو الرسالة ولا لا

احنا شايليين مسئولية كبيييييييرة اووي اووووي ولازم نكون قدها

يوم في حب مصر بجد 19-2-2010 ... يوم استقبال البرادعي ومشاهد تهز القلب

2010-02-21T00:30:00.001+02:00

امبارح كان يوم فريد من كل حاجة
من كتر التعب حتى مش قادرة اكتب فهقول كل اللي يجي على بالي من غير ترتيب

المشهد 1 : 10 الصبح
هدوووووووووووووووووء وتواجد امني بسيط

المشهد 2 : 11 ونص الصبح
امام مبنى 3 تواجد اعلامي كثيييييف وتواجد سياسيين من احزاب وحركات وشخصيات ولقاءات صحفية

المشهد 3: عدد الجماهير في ازديياااااد

المشهد 4 : بدا الهتافات بصوت عالي واغلبها النشيد الوطني

مشهد 5: سيدة عجوزة تحمل بوستر للبرادعي
سالتها حضرتك تبع ايه؟
قالتلي انا مش تبع حاجة انا جاية بس استقبل البرادعي
قلتلها يعني اانتي ملكيش في السياسة؟
قالتلي دي مش سياسة دي مصر .. احنا تعبنا من كل حاجة جه الوقت عشان نعمل حاجة

مشهد 6: سيدة في سن الاربعين من كتر التعب قعدت تستريح في مكتب تذاكر دخول الصالة
سالتها حضرتك تبع ايه؟؟
قالتلي انا مش تبع حاجة انا شفت الايفنت على الفيس وجيت
قلتلها يعني مش تبع اي تيار سياسي؟
قالتلي مبقتش ساسة بقى احنا اتخنقنا كل حاجة في البلد بايظة انا عندي اواد شايلة همهم هيعملو ايه من بعدي فاقل حاجة اقدمهالهم اني اطالب بحقهم في بلدهم واختارلهم الرئيس القادم ولازم كلنا نسعى لده

مشهد 7:
واقفة مع احمد ماهر ولقيت واحدة في اواخر التلاتينات تقريبا جاية تجري على احمد وتقوله حمدلله على السلامة يابطل انت متعرفنيش وانا مش تبع حاجة انا واحدة عادية بس بتابع الجروب بتاعك وكمل في طريقك انت اثرت في ناس كتيير اوووي وربنا يكرمك ويقويك ويقوي كل اللي معاك مع السلامة ومشيت

مشهد 8:
واحد شايل بنوتة عندها 4 او 5 سنيين بالكتيير وهي اللي بتهتف واحنا بنرد وراها
باسم الجموع
يابراااااااااااادعيييي
مفيييييييش رجووووع
يابراااااااااااااادعي

انا كنت لابسة علم 6 ابريل فوانا ماشية رايحة الكافتيريا بقى كل حد يشفني يسالني هو في ايه ويعني ايه 6 ابريل وانتو ومين والاسئلة دي:

مجموعة ستات وقفوني وسالوني هو في ايه؟
قلتلهم اصل انهاردة استقبال البرادعي
فواحدة قالتلي اعذريني انا فلاحة هو يعني برادعي مش دي المنطقة اللي في مية وحشة
قلتلها مفيش احلى من الفلاحين وده شرف والرادعي ده مسئول دولي كبيير ومصري وكان بيشتغل برة وخلاص شغله خلص وقال انه عايز يغير الدستور اللي بيمنع اي حد غير حسني مبارك او ابنه هما اللي يترشحه وهما اللي سايبين الناس تاكل في بعضها كده انتي حاسة انك عايشة كبني ادمة وواخدة حقوقك؟ قاتلي لا طبعا
قلتلها كلنا بقى عايزين الراجل ده يساعدنا اننا ناخد حقنا
قالتلي زي ايمن نور كده؟ قلتلها ااه بس ايمن نور عشان ملوش ضهر بهدلوه والشعب خاف
لكن البرادعي شخصية دولية فصعب يقدرو ياذوه والشعب لو وقف وقفة واحدة وراه هنكون كلنا اقويا وهناخد حقنا
فواحدة معاها قالتلي هو احنا ممكن نيجي نقف معاكو قلتلها طبعا انتو لازم تيجو معانا ومحدش هيكلمكو واللي هيكلمكو قولولو ان انتو حرين وجايين تستقبلو مصري عظيم
فرحوا اوووووي وقالولي صح يااارب بقى مصر تبقى احسن

اول مرة اشم ريحة الحرية وانا مش خايفة واحس ان في دمقراطية في مصر مع انها مش مصر والسر ان المطار منطقة دولية مينفعش يبقى فيه اي تعنف من اي نوع
ماشية في اركان المطار وبدخل الصالة وبقعد فيها وبتكلم مع الناس في تغيير النظاام وانا حررررررررة بجد الحرية دي شيء عظيم وجميل
اللي عاجبني كمان ان مع كل العدد ده ومع انهم ميعرفوش بعضهم بس كلنا بنتكلم كاننا نعرف بعض مفيش حد مكسوف من حد وكله بيتكلم مع كله اول مرة اشوف المصريين حاجة وحدة
انتمائك لمصر هو اللي بيخليك قريب للي جمبك
لقيت في ناس جايبة عيالها وعيلتها وجايين يستقبلو البرادعي وهما مش منتمين لاي تيار سياسي جايين بفررحة وامل انهم يرشحو البرادعي عشان يغير البلد دي للاحسن

شفت في عيون الناس لاول مرة في حياتي الامل في شيء
شفت الناس اللي ملهاش في السياسة بتهتف لمصر مش للكورة
شفت العاملين في المطار وهما فرحانين ومستنيين ميعاد شغلهم يخلص عشان ينضمو لينا
شفت ان مفيش تحرشات ولا ضرب ولا عنف ولابلطجة في عدم وجود الامن
شفت الناس كلها مش جاية للبرادعي عشان البرادعي لأ هما جايين لمصر وبس والبردعي ده مجرد رمز لبديل رئاسي نقدر من خلاله اننا نكون وراه ويقدر يجمعنا على بناء مصر من جديد
شفت الهتافات وهي بتهز المطار كله وبتهز قلوبنا
شفت الفرحة في عيون الناس

قد ايه فرحت لما لقيت ناس بتقولي 6 ابريل انا في الجروب معاكو وبجد فخورين بيكو ... ولما يسالوني عن اسمي واقولهم اسماء محفوظ يقولولي ايوة انتي اللي بتبعتي رسايل من على الجروب
بجد في أمل وبجد الناس مش زي ما احنا فاكرين لأ المصريين دول احلى ناس في الدنيا دي كلها
طيبة وحنية وجدعنة

انا مكنتش حاسة اني غريبة انا كنت حاسة اني في بلدي بجد كل دول اهلي وحبايبي
نظرة الحب في عيون كل الناس
ناس محترمة بجد
انا حاسة ان االلي شفته امبارح رد فيا الروح واداني قوية اني انزل بكثافة للناس في الشارع حتى لو هخبط علي بيت بيت واتكلم معاهم واقولهم يلا معانا ايدك في ايدي نغير مصر

بحب يا مصر وبحب كل مصري فيكي كل مصري بجد بقبله وبعقله مصري
بحبك يا مصر اووووووووووووووووووووي
بجد انا عمري ما كنت اتخيل ان المصريين ممكن يتعبو التعب ده كله من 10 الصبح ل 7 ونص على رجيليهم من غير راحة وهما جواهم ان كل التعب ده لمصر
بحبكو اوووووووووي

تنبيه هام:
بجد انا عرفت ان الناس متبعانا حتى لو مش بيكلمونا او مش بيشاركو بس احنا اللي بنديهم الامل فياريت نكون قد المسئولية وقد ثقتهم فينا عشان الناس دي فعلا تستاهل اللي بنعمله عشانهم وعشان مصر
واسفة اني طولت عليكم

View Full Album

كلام مش مهم

2010-02-12T06:28:00.001+02:00

لما شاركت في الدعوة لاضراب 6 ابريل 2008 وشاركت في تأسيس حركة شباب 6 ابريل ومن بعدها نشاطات كتيير للحركة
كان هدفي اني اقتل الظلم اللي في مصر واجيب حق الشعب اللي بيموت كل يوم من الذل والفقر والجوع والبرد
وكانت وقتها نشاطات الحركة زي السيل اللي ماشي بقوة رهيبة بيهد اي شيء قدامه

لما نجحنا اووووي وكبرنا وكل الجرايد المحلية والعالمية كتبت عننا ولما لفتنا انظار مش بس الشعب المصري لا كل شعوب العالم
كان تعامل الامن معانا بالضرب والاعتقالات والتهديدات
ومع كل ضربة من النظام لينا كان كل مدى بنقوى وبنكبر وبنسمع العالم كله صوتنا

بس شوية شوية ابتدت حاجات كتيير تتغير
الامن هدي " شكليا " معانا وابتدت حاجات بتظهر في الناس اللي معانا واللي حوالينا

ابتديت اسمع كلمات غريبة زي ايدولوجية واجندة وهيكل ورؤية وعميل وحزب
ولقيت ان في تقسيمة غريبة بتحصل وحسابات بتتصفى
وكل واحد عايز ياخد الحركة لايدولوجية معينة وشوية عايزين يضموها لحزب معين
كل واحد بايدولوجيته او بحزبه او باجندته
وصراعات مش فاهمة معناها وساعتها غياب الامن كان ملحوظ
وساعتها سألت نفسي هو انا فين؟؟ ميين دول؟؟ يعني ايه الكلام ده؟؟

وعرفت ان هو ده عـــــــــــــــــالم السيـــــــــــاسة

وسط زيه زي وسط الفن والمشاهير
كل فيلم لازم يبقى في اتفاق اسم مين يتكتب قبل اسم مين وميين اللي هينتج وميين اللي هينقي الممثلين وكل ممثل يتكلم عن التاني في الجرايد واحاديث صحفية وحوارات كتيييييييييير بتحصل والمهم ان ميين يبقى ميين اكبر من ميين
هو ده بالظبط الوسط السياسي والصراع على تقسيمة التورتة قبل حتى ما نطفي الشموع
عالم ملوث زيه زي الوسط الفني اللي بيدخل في اي وسط فيهم بيتعلم ازاي يهز وسطه كويس
والنضيف فيهم يا اما بيهرب يا اما بيتداس عليه يا اما بيتعب اوووووي بس بيبقى كانه بيزق في جبل
ولما استغربت غياب الامن بعد فترة اتكشفت لعبتهم ويمكن هي مكشوفة من زماان قدام الكل
جزء كبيييييييييير من المعارضة هما عملاء الامن بيمثلو دور المعارضة من ناحية عشان يظهرو ديمقراطية النظام ومن ناحية تانية عشان يلوثو الشباب الابيض المستجدين في السياسة ومن ناحية تالتة يشغلو الجزء النضيف بخلافات وصراعات واتهامات ملهاش لازمة
وبتبقى مهنة بياكلو منها عيش وشوية شهرة لطيفة وكمان عشان يكرهو الشعب في المعارضة فتجيلو حالة يأس ويرضى بالوضع اللي هو فيه

وجزء تاني من المعارضة هما نفسهم محتاجيين تغيير لان فسادهم اكبر من انهم يدعو للتغيير
ومنهم ناس فاضية كانت بتدور على حاجة تشغلها فلقت اثارة المشاكل ونميمة على اي حد يجي على بالهم وللاسف محسوبين على المعارضة

ومع كل فترة بتتلوث بيها 6 ابريل بيصمم باقي اعضائها المخلصين بانها تنضف وتكمل في طريقها اللي اتولدت عشانه
ومع كل امتحان بنعدي منه بيجي الاسوأ منه بس العملية بتبقى اصعب كل مدى
احنا هدفنا اسقاط النظام بس انشغلنا في صد الهجمات اللي علينا والوقاية منها ومعالجة الشروخ اللي بتسببها جوانا
باجي اتفرج على باقي المعارضة عاملين ايه بلاقيهم اسوا حالا مننا بس وبعدين
العلاقة بين الحركات والاحزاب السياسية بقت مجرد مين يعمل ضجة قبل التاني مين يتكتب اسمه قبل التاني
والحركة بقت في نظرهم مخزن من الناشطين ومين ياخد اكتر والحسابة بتحسب
وبقت من مصلحة الكل سقوط 6 ابريل
والنظام اصبح مجرد موضوع للمناقشة في الندوات والجرايد واللقائات التلفزيونية

ومع ذلك في أمل
وبرغم تلوث المعارضة في أمل
وبرغم وجود فصائل ملوثة في الحركة بتسعى لتفككيها في أمل
الامل في الناس النضيفة اللي برة وجوة الحركة
الامل موجود مع كل ثانية بنفكر فيها في مصلحة مصر
الامل موجود مع كل وجود لينا وسط الناس في الشارع
الامل موجود مع صمود منسق نضيف ومخلص وقوي وذكي
الامل موجود مع كل فشل بنرجع بعدها اقوى وانجح من الاول

يمكن بنغلط لما بنمشي مع التيار المعارض الملوث
بس لازم نرجع تاني بعيد عنهم
احنا مختلفين غير مأدلجين وغير متبعين اجندة نحسب عليها
مكاننا وسط الناس في الشارع واملنا بيهم وقوتنا فيهم ونجاحنا جواهم
عشان نوصل للتغيير لازم نوصل للناس في الشارع
وهنوصلهم اقسم بالله العظيم هنوصلهم
وده هدفنا وده حلمنا
ونجاحنا الحقيقي ان الشعب المصري وقف ضد النظام مش ان حركة او حزب هو اللي وقف ضده

المشوار لسة طويل وصعب اوووووي مع كل التحديات اللي بنواجها ولسة هنواجها
بس ادينا عرفنا حقائق كتيير هتساعدنا في مشوارنا الفترة اللي جاية

وانا شخصيا اتعلمت ان نجاحنا مش اننا اللي نغير الدستور او نجيب حد يغيره .. لا لازم نوعي الشعب بانه ياخد باله من حقوقه ويبطل سزاجة وخوف لازم الناس تفهم ان هي السبب في ان الظالم بقى ظالم والفاسد بقى فاسد
لازم يفهمه ان الانسان ميبقاش انسان لما يبقى زي الحيوان عايز ياكل ويشرب وينام وبس وكل همه هيجيب اكله منين
لازم يفهمو اننا مش عايشين لوحدنا في العالم واننا بنسخدم لقتل ناس تانية
لازم يفهمو ان ربنا خلق كل واحد فينا لهدف ولرسالة معينة لازم يعرفها ويعمل بيها والا هيبقى دخل الدنيا وخرج منها وهو ملوش لازمة وهيتحاسب على كل ثانية عاشها ومعملش بيها حاجة
لازم الناس تفهم ونكبر دماغنا بقى من ميتين المعارضة اللي اتحسبت على مصر على الفاضي دي
ولازم كلنا نعرف ان مصر بتضيع بسبب الفساد السياسي من النظام ومن المعارضة

كل واحد لازم يعيد حسابته ويعرف هو عايز ايه وايه هدفه واللي بيعمله عدى عليه كام خطوة لقدام ولو مفيش تقدم يبقى لازم يعيد خطته من تاني لحد ما نقدر نعمل حاجة بجد

اسفة للرغي الكتيير بس كنت موجوعة ومحتاجة اتكلم

مشكلتنا مع النظام وسلاحه المعتقلات وعملائهم من بعض المعارضة ... وسلاحنا المقاومة والمخلصين من الشعب .... هما سلاحهم جاهز واحنا لسة بندور عليه ودورهم تعطيلنا وتضليلنا بس صبرا ايها النظام الفاسد فبامكانك تعطيلنا بعض الوقت وليس لكل الوقت

متضامنة مع وائل عباس ... 18 فبراير جلسة الاستئناف

2010-02-05T19:21:00.001+02:00

وائل عباس المدون اللي فضح ظباط الشرطة البلطجية
وائل عباس اللي فضح انتهاكات الشرطة في انتخابات 2005
وائل عباس اللي جاب حق كتيير ضحايا التعذيب في مصر ومنهم عماد الكبير
وائل عباس اللي وقف جمب كتيير من المعتقليين السياسيين ونشر قضاياهم في كل مكان في العالم كله
دلوقتي الشرطة عايزة تاخد بتارها منه
بتلفيق قضية من اتهف انواعها
" اتلاف سلك نت "
وعقوبتها 6 شهور سجن مع الشغل!!!!!!!
وده بعد ما رفع قضية ضد ضابط شرطه جاره عشان اعتدى عليه وعلى ووالدته
وطبعا عشان احنا اكيد اكيد في مصر
فتم الحكم لصالح الجاني ضد المجني عليه
وده لينك اللي حصل
http://misrdigital.blogspirit.com/archive/2009/04/10/تفاصيل-الإعتداء-على-وائل-عباس-ووالدته-في-منزله.html

وده خبر الحكم عليه
http://misrdigital.blogspirit.com/archive/2010/01/23/الحكم-بحبسي-ستة-أشهر.html

جلسة استئناف الحكم يوم الخميس 18 فبراير
ضروري جداا اكبر عدد يكون معاه في اليوم ده
وندد بالحكم الظالم لصالح بلطجية مصر اللي بيحموا اقذر نظام على وجه الارض
وائل عباس مش لوحده ومش هنسمح انه يكون فريسة للداخلية ينتقموا منه عشان بيكشف فضايحهم

متضامنة مع وائل عباس

الاعلام المصري …. بااااااااااااااااااطل

2010-01-08T00:04:00.001+02:00

شوبير في برنامج في الملاعب على قناة الحياة 2 ... اخد نص ساعة في مقدمة الحلقة بيتكلم فيها على اللي حصل في العريش وعلى معبر رفح وبيوصف مصر بالبيت والرئيس برب الاسرة اللي بيحمي اسرته وقافل على نفسه باب بيته .. ووالفلسطنيين بالحرامية اللي بيدخلو عن طريق المواسير وبيدخلو يخربوا في مصر ويدو لولادنا المخدرات والاسلحة اللي بيخلي حادثة زي نجع حمادي تحصل وغيره وغيره وبيقول اننا عملنا لفلسطين كتيير وهما بيهاجمونا وبيهاجمو مصر وان اللي اسرائيل عملاه فيهم ده نتيجة الخلاف والارهاب اللي بين حماس وفتح ... وان جالوي مش بطل ولا حاجة وتاريخه اسود ومهبب ومفصو من حزب العمال البريطاني وعايز يعمل فيها بطل قدام الناس لاغراض سيئة في نفسه وعايز يدخل عنوة من ارض مصر وبيكره العالم كله في مصر وان الفلسطنيين بيقتلو في الجنود المصريين ولازم نحمي نفسنا منهم

ووصف المعارضة بالغوغاء اللي بتسوء سمعة مصر وبتحارب مصريين زيها وان المعارضة ضد امن مصر القومي وسيادتها

نفس الحرب الاعلامية الكاذبة لتشويه صورة العرب وتوليد الكره في نفوس المصريين لاخواتهم العرب ولقتل القومية العربية ولتمثيل النظام المصري الفاسد والرئيس الخائن بالبطل وليبعد انظار المصريين عن المتهم الرئيسي في جميع حوادث مصر وليكمنها في الفلسطنيين بشكل خاص والعرب بشكل عام لزرع الكره وخلق العدواة بيننا وبينهم

وبيستخدمو فاسدين زي شوبير وكثير مننا عارف ايه هي حقيقة شوبير وفضايحه وللاسف هما دول وجهتنا في العالم كله

وكل ده عشان يبعد الانظار عن حقيقة النظام المصري فانه صار خادم الصهاينة وحارسهم

ولتقديم كل فروض الولاء للادارة الامريكية في حمايتها لاسرائيل لكسب رضاهم لابقاء الرئيس في السلطة ونجله من بعده

وللاسف الشديد الاعلام المصري بيستخدم التزوير في الحقائق والتمثيل على الشعب المصري عشان يصدقوه ده وبقت الوسيلة الاكبر لاسكات الشعب عن كل الفساد المصري داخليا وخارجيا بعد البلطجة واعتقال وتعذيب كل من يحاول ان يقف امام فساد النظام القائم

وحان الوقت لكل التيارات ولكل الشرفاء استخدام كل وسائل الاعلام البديل لخلق اعلام موازي لفضح كل جرائم النظام ولفت انظار المصريين لكذب الاعلام وتوعيتهم بكل الوسائل الاعلامية والعملية

شباب 6 إبريل يضعون المجلس المحلي التابع للحزب الوطني في موقف محرج امام اهالي ترب اليهود

2010-01-01T16:09:00.001+02:00

شباب 6 إبريل يضعون المجلس المحلي التابع للحزب الوطني في مواجهة ساخنة مع أهالي ترب اليهود

في المرحلة الثانية من حملة واسطتك مصريتك في ترب اليهود ... كنا متفقين مع احد اعضاء المجلس المحلي انه يتفق مع باقي اعضاء المجلس وهو اللي يجيب الاهالي عشان نتكلم معاهم ونتفق على خطوات التحرك لحل مشاكل المنطقة

وكان من ناحية تانية كنا متفقين مع الاهالي اللي قابلناهم قبل كده على نفس الميعاد بس المكان مجهول واول لما وصلنا كلمنا الاهالي عشان يجو على المجلس وفوجئنا انهم ميعرفوش اصلا مكان المجلس ..ولما رحنا المجلس لقيناه عبارة عن صالة ضيافة فاضية تماما وفيها كراسي خشب ومليانة فيران

المهم ابتدى الكلام الاول بينا ( عمرو علي ومحمد سوكا وياسر سيد ) وبين اعضاء المجلس وبين 2 ممثلين من الاهالي اللي هما متفقين معاهم وطلبو مننا نعرفهم بنفسنا ونفهمهم ايه هدفنا بالظبط وايه اللي ناويين عليه

عمرو علي ابتدى بالكلام وقالهم اننا في حملة هدفها انها توعي وتعلم الناس ازاي يتجمعوا على مشكلة واحدة ويوحدوها بدل ما كل فرد بيتكلم على مصلحته الشخصية وبيتحرك بشكل فردي وكده كده المشكلة تخص منطقة بحالها او بمعظم اهالي المنطقة.. يجمعو نفسهم ويتحركة ككتلة ويطالبو بحقهم بشكل سلمي ويسلطو ضوء الاعلام بمشكلتهم عشان الحكومة تتضر انها تستجيب وتحل المشكلة بشكل اسرع
وبكده بعد فترة لما كل منطقة تتحل مشاكلها وتبقى في احسن حال .. البلد هتفضل يتحسن حالها وده المطلوب

ساعتها رد عليه واحد من اعضاء المجلس بنظرات خبث وقاله انتو مين؟ ودخل علينا باللغة العربية : هل انتم تملكون مؤسسة شرعية نستطيع الاستظلال بها؟

فعمرو رد عليه وقالو انهم مش محتاجين مؤسسة عشان يستظلو بيها ... هما مش بيطلبو بحل مشكلة سياسية هما بيطلبو بحقهم في الخدمات اللي بيدفعو عليها فلوس ومش بياخدوها وبيدفعو ضرائب ومش بيحصلو على خدمات ..

ساعتها الراجل رد عليه وقالو طيب احنا اصلا تابعين للحزب الوطني وان الاهالي بالفعل بيطالبو بحقوقهم من خلال الحزب وان الحزب بينشر وبيدعم قضاياهم من خلال الجرايد القومية وبتتحل وان المنطقة دي كانت منطقة ميتة مفيهاش خدمات ودلوقتي بقى فيها صرف ودخلها الكهربا و و و

وهو بيقول الجملة دي كانت الاهالي اللي بجد اللي قابلناهم المرة اللي فاتت دخلو

منهم ام خالد واللي سمعت الكلام ده وهي داخلة وفضلت تبصلهم وهي هتجنن .... قمت فهمتها القصة من بدايتها وقلتلهم ان المجلس المحلي بيقول انهم دخلوا كهرباء ودخلو صرف ودخلو كافة الخدمات وان اللي عنده مشكلة بيروح للحزب الوطني وبيحلها عالطول

وسيبت الستات يردو عليه بقى .... قالوله كهرباء ايه اللي دخلت؟؟ معظم المنطقة مفيهاش ولا صرف ولا كهربا انت بتتكلم على انهي منطقة وبعدين انتو دايما بتتكلمو كتيير ومش بتعملو حاجة ... وياما ناس جت اشتكتلكو وراحت كمان اتكلمت مع الحزب ومش بناخد منكو الا كلام وبس

رد عليها وقالها ان دي اساسا منطقة عشوائية مش المفروض يبقى فيها خدمات (( واخدين بالكو انه بيناقض كلامه؟؟)))
وان المنطقة بتتوسع بشكل راس بمعنى ان الاهالي بيبنو ادوار جديدة في البيوت وان مفيش حد راح اصلا اشتكى

((طبعا الاهالي بيبصوله بصة غضب ووضح الكدب وقتها ))

عمرو علي قالو طيب احنا نمشي بقى بما ان الحزب الوطني متكفل بالمنطقة وبيحل مشكلتها بس انت مسئول انك تحل مشاكل الناس اهي ولو بتقول انهم مجوش قبل كده اديهم جم اهم وريهم بقى هتساعدهم ازاي وانتو كده مش محتاجين مساندتنا واحنا مش جايين قصدنا اننا نخلي الناس تهاجم الحكومة او الحزب بس كل اللي احنا عايزنه ان الناس تبطل تعتمد على حد يدورلها على حقها وكله منفض وميعتمدوش الا على نفسهم بس بتحرك جماعي بما ان المشكلة جماعية عشان الصدى يكون اقوى ولو الحزب حل المشكلة يبقى هايل

واول لما وقفنا حصلت مشادة كلامية بين الاهالي وبين اعضاء المجلس وبيقولوله انهم كدابين وان الحزب الوطني مش بيعمل حاجة وكله كلام وبس واتنين من الستات اخدوني قالولي احنا فاض بينا خلاص من الكذب بتاعهم بس متسيبوناش وفهمونا نقدر نعمل ايه

قلتلهم متقلقوش احنا نفسنا طويل وكمان مش بنخاف الا من ربنا ومش هنسيبهم الا لما نحطهم على اول الطريق الصح
وهنساندهم بكل اللي نقدر عليه وطمنتهم وشكرونا جداااا على تعبنا وقالولي بيتنا مفتوح ليكم في اي وقت ومش محتاجين للحزب الوطني عشان نتجمع فيه

بعد ما سيبناهم في وسط المشادات اللي بتحصل ومسكوا في اعضاء المجلس وهاتك يا زعيق واتهامات وخلاص بقى لازم ناخد حقنا بعد ما فهمو حقيقتهم

لقينا واحد من اللي كان جايبهم معاه اعضاء المجلس .. جه ورانا يلحقنا ويقولنا انه مجرد صاحبهم لكن مش مقتنع بسياستهم وانه مقتنع جدااا بكلامنا وقالنا انه عايز فعلا يخلي الاهالي دي تقف على رجلها عشان حقيقي طيبيين وغلابة وانه مصدقنا عشان هو كمان بيشتغل بشكل تتطوعي مع اهالي المنطقة اللي ساكن فيها ودايما ياخد المبادرات عشان يساعد الناس
وقالنا انه عايز يتحرك معانا ومستعد انه يكمل معانا للاخر
واتفقنا معاه اننا هننزلهم تاني عشان ننتكلم في الخطوة اللي بعد كده

لما نزلنا المرة الاولانية كانت مشاكلهم بتتلخص في :
=============================
1- مفيش كهرباء دخلت مع انهم دافعين الفلوس من 2005 وكل فترة بيدفعوهم فلوس ولحد دلوقتي مفيش كهرباء دخلت وعايشين على الوصلات اللي وخدينها من الكابينة اللي قريبة منهم والظباط بيقبضو عليهم كل فترة وبعد الحجز باليومين والتلاتة ودفع الغرامة بيسبوهم
ورافعين محاضر ودعاوي عشان الكهرباء تتدخل بس للاسف الحكومة متقاعصة

المشكلة التانية ان مفيش صرف صحي

المشكلة التالتة انهم محتاجين كوبري مشاةعشان هما ساكنين عند الاوتستراد و بيموت منهم كتيير في حوادث على الطريق اثناء تعديتهم

المشكلة الرابعة الزبالة المنتشرة في كل مكان حتى امام وداخل المدارس وتفشي الامراض بشكل كبير
وفعلا المنطقة كلها ريحتها زي الزفت مش عارفة مستحملين ازاي ربنا يكون في عونهم

مع تحيات شباب 6 ابريل
حملة واسطتك مصريتك
ترب اليهود
31- ديسمبر 2009
http://www.facebook.com/topic.php?uid=9973986703&topic=27656

من غير ما نقصد بسلبيتنا اتسببنا في الحال اللي احنا فيه

2009-12-22T22:15:00.001+02:00

مرينا بفترة سيئة جداا في مصر الفترة اللي فاتت ويمكن كتيير مننا ميعرفش ان بسلبيتنا كانت السبب في الفساد اللي مالي البلد
بس جه الوقت اننا نغير كل ده .. 2010 و2011 سنتين مهمين جداا في مصر ولازم يكون لكل واحد فينا دور
اكيد هتقول وانا مالي وانا في ايدي ايه اعمله .. يعني انا لو اتكلمت حد هيسمع كلامي
ايوة في ايدك كتييير تعمله اولهم انك تستخدم اكبر حق ليك وهو صوتك واللي هو حق الانتخاب
انت طلعت بطاقتك الانتخابية؟ لأ؟ طب يلا بسرعة الحق روح طلعها
وليه اطلعها ؟ انا ماليش في السياسة
يعني ايه ملكش في السياسة .. ببطاقتك الانتخابية انت ليك دور كبيير اووي في اختيار اللي يمسك مصالحنا
في اختيار رئيس الجمهورية وعضو مجلس الشعب وعضو مجلس الشورى
طب ومجلس الشعب ولا عضو مجلس الشورى هيعملي ايه؟؟ وانتخابات الرئاسة لسة بدري عليها
يوووه هيعملك كتييير ... اقولك ياسيدي عضو مجلس الشورى ده مهمته بتتخلص في الاتي:
مجلس الشورى ده هو بيدرس ويقترح على رئيس الوزراء كل ما يتعلق بمصلحتنا كمصريين في الاقتصاد والخدمات وحقوق الانسان والحريات والواجبات والتنمية الاجتماعية ... وكمان الرئيس بياخد رأيهم في كل حاجة بتتعلق بقوانين وشئون الدولة الداخلية والخارجية.... يعني لو مكنش عضو مجلس الشعب ده راجل كويس هيخلي مصر زي الزفت زي الحال اللي احنا فيه دلوقتي واسوأ
مجلس الشعب هو اللي في بيحط القوانين والسياسة العامة لمصر والخطة العامة اللي هنمشي عليه في التنمية الاقتصادية والاجتماعية وكمان الموازنة العامة للدولة وكمان بيراقب على اعمال السلطة التنفيذية .. الدستور ادى الحق لعضو مجلس الشعب في سلطات واختصاصات عشان يبقى نائب عننا ... تخيل بقى النائب عنك اللي بيعمل كل ده وانت ليك الحق انك تنتخب اللي انت شايفه اصلح للدور ده وبتقول مليش في السياسة وضيعت حقك في بلدك وبقيت سبب ان واحد فاسد يبقى نائب عنك
مجلس الشعب والشورى بيكون ليهم دور كبيير في انتخابات الرئاسة .. هما اللي بيعملو الدستور وقوانين الترشح لرئيس الجمهورية
وبيتيحوا الفرصة لظهور كوادر سياسية تصلح لرئاسة الجمهورية عشان يرشحوا نفسهم
وكمان بالبطاقة الانتخابية بنقدر نقول رأينا في استفتاء تعديل الدستور اللي مجلس الشعب والشورى بيقرروه
فلو احنا رافضين التعديل ده هنقول رأينا طالما معانا بطاقة انتخابية وساعتها مش هيقدرو يعدلوه غصب عننا
- طب الانتخابات دي مش بتتزور؟
فعلا السنين اللي فاتت اكييد حصل تزوير كبيير بس ده سببه احنا بردو عشان مفيش الا 8% من الشعب بس اللي كانو بينتخبوا
وبقيت الناس مش دريانة باللي بيحصل فسهل جدااا انهم يزوروها ومحدش واخد باله من حاجة وبيعملوا دستور وقوانين على مزاجهم عشان تسهل عليهم يعملو ما بدالهم واحنا ولا هنا عشان محدش فينا بيستخدم حقه في الاستفتاء
- طب والانتخابات دي امتى؟
انتخابات مجلس الشورى فبتتقسم لمرتين لنص اعضاء المجلس وبيتم تعيين تلت الاعضاء باختيار رئيس الجمهورية وميعاد الانتخابات هتكون في فبراير 2010
انتخابات مجلس الشعب دي وبتكون في شهر اكتوبر كل 5 سنين ... وأكتوبر 2010 هيكون معاد انتخابات مجلس الشعب اللي الجاية
انتخابات الرئاسة بقى هتكون في سبتمبر 2011
يعني هتعدي عليك في خلال السنتين الجايين 3 انتخابات بيحددو مستقبل مصر الفترة الجاية وصوتك هو العامل الاساسي
- طب اطلع البطاقة الانتخابية ازاي؟
قدامك 3 شهور تبدأ من يوم 1 نوفمبر إلى 31 يناير من كل سنة عشان تسجل اسمك في الجداول الانتخابية يعني فاضلك شهر واحد بس فرصتك الاخير في خلال الفترة دي.. وهي بطاقة واحدة للانتخابات الجاية سواء مجلس الشعب أو مجلس الشورى أو الانتخابات الرئاسية أو المجالس المحلية.
1- توجه إلى القسم التابع له وفقا لبطاقة الرقم القومى أذا كنت قد تجاوزت 18 عام
2- أذا كنت من مواليد 1982 او ما يليها فانت مقيد تلقائيا فى الجداول الانتخابية لكن أحتمال سقوط اسمك سهوا وارد
3- أذا كان اسمك غير مقيد بالسجلات الانتخابية قدم للموظف المختص صورة من بطاقة الرقم القومى
4- قم بتسجيل بياناتك فى استمارة القيد التى يعطيك أياها الموظف
5- سلمها للموظف نفسه و أساله عن ميعاد أستلام بطاقتك الأنتخابية
6- مش هتدفع فلوس خالص ولا اي رسوم .. البطاقة الانتخابية مجانية
السياسة لم تعد وحش كاسر يدمر استقرارك ولم تعد تقتصر على رجال السياسة كلنا لازم نشارك ما حدث ويحدث فى مصر احنا احد اسبابه علشان مروحناش ننتخب ونقول نعم او لا - اوافق او لا اوفق - اؤيد او لا اؤيد متقولش وبعد ما اطلع بطاقة وانتخب اية اللى هيحصل انا وانت وهى وهو لو كلنا اختارنا اللى احنا شايفية اكيد هنقدر نتغير انت مش خايف على مستقبلك؟ مش خايف على مستقبل ابنك؟ مش خايف على بلدك والفساد اللى انتشر فيها؟ لازم يكون ليك دور علشان لا تكون ممن يشاركوا فى تدهور بلدنا
http://www.facebook.com/event.php?eid=176205281617

سنة 2010 و2011 حاسميين جدااا في مستقبل مصر ولازم يكون ليك دور

2009-12-20T23:30:00.001+02:00

السنتين الجايين هايكونوا حاسمين فى تاريخ مصر
ولازم يكون ليك دور

التغيير مش هيجي بمجرد الرئيس بس هو اللي يتغير
ومش هيجي بمجرد ان الدستوربس هو اللي يتغير
ومش هيجي لما واحد هو اللي يجيبلنا حقنا مرة او مرتين

           لا

التغيير هيجي لما اغلبية الشعب تتغير
كان صادق وواقعي لما المعلم الكبير غاندي قال كن التغيير الذي تريد ان    تصنعه
التغيير هو ان تكون ايجابي بكل السبل وبكل الاشكال
تعرف حقوقك ايه وتعرفها للي حواليك ولاكبر قدر من الناس تقدر عليه
التغيير هو انك تتمسك بحقوقك وتستخدمها
التغيير هو انك تعرف الغلط ايه وجاي منيين وتفكر في اساليب حله وتتناقش فيها مع الناس
التغيير هو انك تكون مؤمن بالتغيير وبتعتمد على نفسك انك تصنعه مش   بتأمل ان غيرك يصنعه
وعشان تكلم الناس وتوعيهم باللي انت وصلته لازم تتكلم معاهم باللغة اللي يفهموها
فلازم نشتغل بكل الطرق والاساليب
اغاني بكلمات توصل المعنى اللي عايزينه
نصور الفساد في كل مكان ونعمله فيديوهات بمؤثرات وكلام يفهم الناس ميين المتسبب في كل ده
نطلع بطاقة انتخابية ونوعي الناس تيجي معانا ونتمسك بحقنا في الانتخابات ونشجع الناس انها تروح تتنخب ولازم نفهمها
نعمل اغاني وبرومهات عن الانتخابات
ونعلم الناس اسس الاختيار ونخليها تفكر صح ازاي
السنة دي مهمين اوووووووووي في تاريخ مصر
نكون او لا نكون
شغل كتيير وكل واحد فينا يسعى انه يعمل اقصى ما في جهده عشان كل ما   هنتعب وكل ما هنفكر عشان نوصل لخطوات صح ونتعب في تنفيذها كل ما النتيجة هتكون اكبر واحلى
وساعتها هيكون فعلا شعب مصر صنع التغيير والتغيير ده عمره ما هيتنسى وعمر ما حد هيقدر يقضي عليه
عشان ساعتها هيكون الشتعب اتعلم وخاض تجربة التغيير بنفسه
مش سياسي ولا اتنين هما اللي بيجروله على حقوقه
كل واحد فينا يفكر هو موهوب في ايه وبيقدر يعمل ايه ويستغل مقدرته دي في انه يوعي الناس ويحمسهم ويشجعهم على الايجابية وينسيهم الخوف
لازم نفكر ونساعد بعض عشان نوصل لهدفنا في الاخر
هدف اننا نكون بني ادمين بجد
بناكل وبنشرب اكل نضيف ومية نضيفة
كل واحد بيشتغل الشغل اللي بيبدع فيه عشان نقدر نكبر بلدنا
المرتبات تعيشنا مش تقهرنا وتذلنا
نعيش في امان والشرطة في خدمة الشعب مش في خدمة النظام الحاكم
عايزين يبقى في عدل في كل حاجة
عايزين نبقى مصرييييين بجد

شباب 6 ابريل .. APRIL 6 YOUTH MOVEMENT

قسوة والم وانكسار ونزيف

2009-12-18T03:17:00.001+02:00

ما اقسى الالم عندما تحتبس صرختك بداخلك
عندما لا تستطيع الا الابتسامة في وجه الناس حولك حتى تخفي حزنك
عندما تفقد الامل لحياتك في حضن من اتولد بين ايديك
عندما تشعر بالغربة وسط من حولك
ما اصعب تلك الغربة
ما اصعب شعور بالشلل التام عندما لا تسطيع
ان تعبر
ان تدافع
ان تتكلم
ان تفعل
ان تثور
ما اقسى ان ترى النار بعينيك ولا تسطيع ان تخمدها
ما اصعب ان تنام وانت تفكر في مشكلة غد وبعد غد
ما اصعب الاحساس وانت مغلل بالقيود ولا تستطيع حتى ان تغادر
ما اصعب ان تفقد الثقة كل الثقة في كل من حولك وحتى في نفسك
ما اصعب ان ترى الضعف قوة والقوة ضعف ... والكذب صدق والصدق كذب
الجدية هزل والهزل جد
الصديق عدو والعدو صديق
ما اصعب ان تشعر بكل لحظة تفارق فيها الحياة يوما بعد يوم
ان تشعر بجفاف كل دمعة في عينيك وتكتل الدم داخل كل انحاء جسمك
وانحباس انفاسك بداخلك

الاحتجاج والمقاومة

2009-12-12T00:25:00.001+02:00

فضلت كتيير افكر ليه في معارضة من زمان ومنجحتش انها تغير النظام القائم ولا اي حاجة في الوضع الحالي

وبعد تقريبا سنة ونص من دخولي المعارضة واشتغلت في العمل العام ابتديت احس ان اللي بنعمله ده كبيير اوووي اه بس في حلقة مفقودة

ولا الناس حاسة بينا ولا اصلا مقتنعة باللي بنعمله ده هيجيب نتيجة ولا الحكومة اتاثرت

واضح اوووي ان النظام فيه قلق مننا بدليل ان كل كلمة بنقولها حتى لو في استيتس على الفيس بوك ببياخدوها على محمل الجد وبيدرسوها وبيشوفو نتائجها

لما ابتديت اقرا في اساسيات التغيير اللاعنيف لقيت في شبه كبييير اوووي بين اللي بنعمله وبين العلم ده

يمكن في الشكل لكن كان في حاجة في المضمون ناقصة

هحاول اقولها بمنتهى التلخيص بس ياريت حد يرد عليا ويكمل كلامي او حتى نناقشه من غير اسلوب التنظير عشان نقدر نوصل لنتيجة

1- اول حاجة اكتشفتها ان في دراسة العلم اللاعنيف بيتكلم عن ان كل الشعب واعي بس ناقصه فكرة يغير ازاي

ودي حاجة احنا لسة موصلنهاش اصلا اغلبية الشعب ابتدى يقتنع فعلا ان العيب في الافراد مش في الحكومة وان الحكومة دي احسن من غيرها ونضمن منين ان اللي هيجي بعد الرئيس الحالي او حتى اي مسئول هيكون احسن من اللي احنا فيها على الاقل النظام الحالي اخد خبرة انه يكون افضل وكمان ابتدو يقتنعو انهم واخدين كل حقوقهم ولازم يكون في فقير وغني والفقير ده هو اللي مش راضي بحاله ولازم يرضى عشان الحكومة هتجيب ايه لمين ولا لمين

2- لما قريت في كتب كتيير لقيت في مفهومين: الاحتجاج والمقاومة

الاحتجاج هو مجرد الاعتراض على موقف او وضع معين نصرخ نعيط نفضل واقفين او قاعدين في مكاننا وخلاص ويبقى الوضع كما هو عليه

ام المقاومة فاننا بنلغي قرار معين او وضع معين وبنتحدى النظام بكل الوسائل السلمية

في قصة صغيرة قريتها في كتاب مهمة اووووي اننا نقراهاه

يحكي بير هيرنجرين حكاية له مع أخيه الصغير وهو طفل: "من الدروس الأولى التي تعلمتها في العصيان المدني كان عند ولادة أخي الصغير ... ولقد كنت مفتوناً بإصراره البريء على تنفيذ ما يشاء وبالطريقة التي يشاء، وعندما لا يرغب في عمل شيء فإنه ببساطة يرفض ولا يساوم على هذا الرفض وهو ما كان مغايراً تماماً لما كنت عليه حيث أنني كنت ابناً مطيعاً جداً..

ولا أقصد بهذا أنني لم أكن أحتج فلقد كنت أصيح بشكل عنيف وأصرخ وأجادل، ولكن عندما ينتهي هذا الاحتجاج والصراخ فإنني أنصاع في نهاية الأمر. كان هذا هو التباين بيني وبين أخي والذي ساعدني كثيراً في أن أفهم بوضوح الاختلاف بين مفهوم المقاومة

فاكتشفت ان كل اللي بيحصل من معارضة من سنييين ما هي الا احتجاج فقط بنضرب وبنعتقل وبنفقد حياتنا ومجهودنا وكل ده على احتجاج بس

في افكار مجنونة كتييير ممكن نعملها كاساليب مقاومة

بس السؤال بقى ... هي المقاومة ينفع تحصل من 1% من الشعب؟؟؟؟

اكيد لأ ... طيب الحل البديل ان يتم توعية الناس وتدريبهم على اساليب الاحتجاج وبعدها اساليب المقاومة وكل ده على نماذج صغيرة ... في شركة وفي هيئة في حي في محافظة ونعمل فيديوهات واغاني توعيهم وتحثهم على مقاومة الاوضاع الغلط

يمكن ناس تعارض كلامي وتقول اننا لازم ننتخب رئيس جديد وهو اللي يعلم كل ده للشعب

ما هو لو شعب مش واعي وسلبي زي اللي احنا فيه ده حتى لو جه ملاك حكم البلد دي مش هيدي الناس حقها 100% طالما مش عليه رقيب

والسؤال الاهم:

منين احنا عايزين ديمقراطية والشعب اصلا ميعرفش ابسط حقوقه ايه ولا حتى عنده الوعي انه يتابع التغييرات اللي بتحصل في شئونه قبل ما يتابع اللي بيحصل في شئون بلده

نفسي المعارضة كلها حتى لو كل كيان باسلوبه بس يفكرو ازاي نقلب اساليبنا من احتجاج فقط الى مقاومة حقيقة عشان نهزم النظام الحالي

وياريت كلنا نفكر في اساليب المقاومة ونفكر ازاي ننفذها بدل ما كلمة مستحيل بقت على لساننا وكمان ياريت نبتكر اساليب جديدة بدل ما احنا معتمدين على اساليب اللي هي نفسها بتتنفذ ملايين السنيين والامن اتعلم ازاي يجهدضها قبل حتى ما نحاول نعملها

احنا بنعمل مجهود جبار والنتيجة ضئيلة جداا ممكن بشوية تفكير يفرق في النتيجة جامد

واسطتك مصريتك ---- مقبرة اليهود

2009-12-11T23:50:00.001+02:00

ونزلنا مقابر اليهود كنا 4 عفاف وسوكا وياسر ... مقابر اليهود دي مساكن مبنية وسط المقابر بتاعة اليهود
هي منطقة جمب الاوتوستراد كده لما شفنا الشارع اللي في الاول واتقالنا هي دي مقبرة اليهود قلنا ايه دي منطقة عادية بسيطة شوية وخلاص مكناش نعرف انها فعلا مقبرة كبييييييييييييييرة جواها مش عارفة تتعرف ازاي
دي زي ما يكون دايرة كبييرة وجواها متاهة ... وكل ما نتوغل اكتر جوة كل ما المستوى بيقل اكتر من قليل لاقل
المقبرة حوالين المنطقة والمنطقة غرقانة وسط الزبالة والمجاري
المهم الاول كنا بنشوف اي ست او راجل ماشي كنا بنكلمه عن المشاكل اللي بيقابلوها كان كل ردهم المشاكل كتييييييييييييير جدااا عايزة مشاكل من انهي نوع؟؟؟ وسالناهم اسئلة كتيير واتكلمنا معاهم وسألنا اشتكوا ولا لا وعملو ايه والرد ايه
نفس الاجابات كلها بنقابلها .. وكل ما نقابل واحد يدلنا على واحد تاني يكون جرب يشتكي وحصلتله مشاكل
لحد ما واحنا بنتكلم واحدة ست ندهت جارتها وجارتها ندهت على جوزها وجوزها نده على زميله وهكذا لحد ما لاقينا نفسنا وسط ناس كتييير اوووووي
عرفناهم بنفسنا وسالناهم ايه هي المشاكل الكبيرة اللي شايفنها في المنطقة دي؟
نفس الاجابات وهي:
1- مفيش كهربا ولما قدمنا من 2005 ودفعنا فلوس ومن ساعتها ومفيش كهرباء بتيجي وكل مرة نروح نشتكي ونسال يقولو كمان شهرين في شهرين لحد ما عدت 5 سنين ومفيش حاجة واخدنا وصلات سرقة من كباين من برة المنطقة وبقى الامن يجي ياخدنا ويرمينا في الحجز وندفع غرامة ... طب نعيش منيين من غير كهربا وولادنا اللي بيدرسو يذاكرو ازاي؟؟ احنا دافعين فلوس ومن حقنا تجيلنا كهرباء ميجبوش وكمان يقبضو علينا ويعاملونا زي المتهمين كده؟
2- مفيش صرف صحي ولما اتكلمنا مع نائب مجلس الشعب وقت الانتخابات قال رشحوني وانا هعمل ووهسوي ولا شفنا وشه بعد كده ولما قدمنا شكاوي كتيير من سنتين الحكومة جت حفرت عشان تركب مواسير الصرف ومركبوش حاجة وسابوا الحفر دي كده واثرت على البيوت وفي بيت وقع من الحفر ده وموت ناس عايشة ولا حد سأل فيهم
3- المدرسة اللي عندهم مفيهاش نضاااااااافة خاااااااالص واكتر من طفل جاتلو انفلونزا وسخن اكتر من 40 درجةوامرا ض تاني والمدرسين بيخافو يدخلو الفصول عشان ميتعدوش وبردو سايبنها زبالة من جوة ومن برة وطبعا مفيش تعليم عشان المدرسين مش راضيين يدخلو الفصول وسايبين العيال يضربو في بعض ويعورو بعض ومهما يشتكو ولا حد سائل فيهم
4- حوادث على طريق الاوتوستراد بسبب ان االطريق سريع وضلمة ومفيش كوبري ولا نفق وكل نائب يجي يوعدهم انه هيبنيلهم كوبري او يعملهم نفق وبعد ما ينجح في االانتخابات ولا بيعرفو يشوفوه
اتكلمنا مع الناس وفهمناهم ان هتفرق كتييير لو نظمنا نفسنا واتكلمنا مع محاميين وروحنا نشتكي مرة واحدة ونعتصم كمان لو ادى الامر لحد ما بجد يعملو حاجة وخصوصا ان التعداد السكاني في المنطقة دي كتيييييييييييير جداا
والناس فعلا رحبت جدااا وكنا بنوزع عليهم ورق بالكلام ده وفيه الارقام بتاعتنا وخدنا ارقام اللي منهم معاه تلفونات
وقالو هيتكلمو ويجمعو المنطقة كلها في يوم واحنا هنكون معاهم ونفكر في احسن حل وميعاد يناسب الجميع نروح نشتكي في المحافظة او الحي
الغريب ان الناس في الاول قبل ما نتكلم حتى معاهم شافونا بنصور المنطقة خافو وقلقو جدااا ولما قلنالهم شباب 6 ابريل افتكرونا من المسئولين وفرحو اوووي ان حد اهتم بيهم وعبرهم ففهمناهم اننا مجرد شباب عادية بس عايزين بلدنا تبقى احسن من كده ونجبر المسئولين انهم يشوفو شغلهم كويس ساعتها استغربو اوووي وخصوصا لما واحدة سألتني انتو هتاخدوا كام لما هتقفوا معانا وتساعدونا ... ولما قلتلها اننا متطعوين عشان عايزين نغير مصر وفهمتها ان المشكلة مشكلة حكومة واحنا عايزين نحاسب الحكومة ونخليها تدينا حقوقنا واننا فينا الطلبة وفيينا اللي بيشتغلو كانو مستغربين اوووي بس بيدعولنا ولقيت في عنيهم نظرات فرح وامل ان حد افتكرهم وحس انهم بني ادمين وبيحاول يفهمهم هيعملوا ايه
النظرة دي بجد مش قادرة انساها في عيون الناس دي عشان كده لازم لازم لازم لازم منسبهمش ونستمر معاهم لحد ما يتعلمو انهم يعتمدوا على نفسهم ويتعلمو يجمعو بعض ويصممو انهم ياخدو حقهم باسلوب سلمي
ياريت كل اللي عنده افكار يقولها عشان لازم ننزلهم تاني في خلال يومين

أسماء محفوظ
حملة واسطتك مصريتك ---- شباب 6 ابريل
8 ديسمبر 2009

http://www.facebook.com/topic.php?topic=27156&post=192780&uid=9973986703#post192780

الطفلة البريئة المغمضة بقت من انهاردة مش كده بقت واحدة تانية متمردة

2009-12-07T21:44:00.001+02:00

عمري ما كنت افكر اني ممكن اكون من ضمن السياسين او افكر يعني ايه سياسة وسياسين
كلمة مجتش اصلا على بالي قبل 2008
لما اشتركت في جروب اضراب عام لشعب مصر مفكرتش بردو ان دي سياسة
كنت بتاعمل مع الناس على انهم ناس عادية
كنت زي اللي قاعدة على الرملة على شط والبحر جه سحبها لجوة
لما اتسحبت لجوة ابتديت اشوف عالم كل يوم بتبان معالمه اكتر واكتر
كل يوم بقيت بتخض واتصدم بواقع غريب ومؤلم
"ما وراء الستار" .... جملة كنت بسمعها زمان ويمكن سمعتها في فيلم فتح عينيك بس جملة بتعدي زي اي جمل
بس شوية بشوية بقيت اشوف تفاصيل خلتني اعرف يعني ايه ما وراء الستار
لما ادركت اني كده في عالم السياسة كنت متخيلة اني الناس دي ناس كلها عندها مباديء ماشيين عليها بغض النظر اني اتصدمت بالتحرر الزائد عن اللزوم في اغلب الاشخاص
وحسيت انه عالم غريب من اخلاق غريبة بس قلت انا مالي دي حرية شخصية بس اكيد هما ليهم مباديء واهداف نبيلة
واتعلمت ان اي حد بيحاول يشوه صورة السياسين انه كعبو كعبو حبيبي وانا الاعبه
كعبو ده كان اللقب بتاع افراد الامن
واي حد يعترض على السياسين يبقى كعبو
وثقت في اشخاص كتيير كانو راسمين الوش الملائكي على وجوهم
وابتدوا يقربو مني كل ما نشاطي يزيد على انهم خايفين عليا وبيشجعوني وكل واحد يجي يقولي انا اللي هحميكي من كل الذئاب البشرية الموجودة في الوسط السياسي
كنت بصدق ناس منهم كتيير كان اسلوبهم وقتها مقنع جداااا وانا كنت وقتها طفلة بريئة شايفة كل الناس ملايكة
شوية شوية لما ابتديت اتفرج على الصراعات اللي بتحصل بين السياسين وبعضهم كنت بسال ليه بيحصل ده
كان سؤال بريء اوووي
احنا عدونا واحد اللي هو النظام واللي واحنا بنواجه مواجهة مباشرة هو الامن
ولكنا معارضة ليه نقف قدام بعض وننسى نقف قدام الامن؟
كل شخص قابلته لقيته بيجاوب بشكل مختلف
الي يتهم ناس انهم عملاء للامن
واللي يقولي دول بيلعبوا لمصلحتهم الشخصية
واللي يقولي دول مرضى نفسيين
وكلها اتهامات
مشغلتش بالي اوووي اني افهم بس كان كل همي اني ابعد اي شخص انه يوقف الشغل اللي داخلة عشانه
وفضلت اشتغل بكل كياني بعقلي وقلبي ومجهودي
نسيت اني بنوتة ليها حياتها وقربت اخسر شغلي وخسرت اهلي وخسرت اصحابي ومهمنيش
كل اللي كان هممني اني اوصل للهدف حتى لو مت بس افضل لاخر نفس شغالة للبلد وللناس ونيتي كانت اني لمااموت واقابل ربنا اقوله انا مسكتش انا حاولت بكل اللي قدرت عليه
اشخاص كتيير اتغيرت او بانت على حقيقتها بس يمكن الضرب كله مكنش فيا كان في اللي حواليا
فابتديت اعرف قيمة شخاص ويعلو في نظري واشخاص تانية اتصدمت فيهم
وكان شغلني اوووي اعرف هما اتغيرو؟ ولا هما كانو كده؟ ياترى اسلوبهم البريئ اللي كانو بيكلموني بيه ده تمثيل متقن بالشكل ده؟ ولا هما اللي اتغيروا؟
طب ايه اللي بيغيرهم؟
واسئلة من النوع ده وموصلتش لاجابة
بس مع كل اللي بيحصل ده وكل شوية ناس تتكشف وناس جديدة بتظهر منهم يتكشفوا ومنهم يكملو ومنهم يبعدو
وانا كان كل همي اني اكمل
ابتديت افكر شوية في مبادئي واللي عايزة اوصله واللي الناس مش بتتكلم فيه وابتديت يبقى ليا راي حقيقي في السياسة والدين والاجتماعيات و و وو
لقيت هجوم شديييييييد من ناس كتييير ولقيت فرض راي ابتدى يحصل ولقيت ناس اتغيرت معايا واشاعات تتطلع وواغلب كل ده كان بسبب الكلام في الدين
اتقالي اهدي شوية في الدين عشان اسلوبك بيكره الناس في الدين .. لا لا والله ما ده هدفي انا مش عايزة اكره الناس في الدين
طيب يبقى اهدي ومتتكلميش في الدين خالص
حاضر
قمت مكملة في النشاط السياسي والاجتماعي وبحاول اربطهم ببعض
ايتديت اعرف من ناس قالولي انهم خايفين عليا ان من كتر شغلي وثقت اغلبية الناس فيا ده عمل غيرة حواليا وان لازم اهدى شوية
قلت لا اهدى ليه والناس الغلبانة دي من هيجبلهم حقوقهم
طيب بلاش تهدي كملي شغلك عادي بس بلاش تكتبي كل شوية انتي بتعملي ايه وبلاش تتكلمي عن شغلك عشان اسمك يتنسي شوية والناس تبطل تغير منك عشان متموتيش
وسيبي اللي حواليكي شوية يشتغلو
ووزعي شغلك على الناس اللي حواليكي
قلت ماشي مفيش مشكلة حتى لو اسمي مات في داهية
المهم اني اعمل حاجة قدام ربنا
وقد كان حاولت على قد ما اقدر اني اقلل نشاطي شوية
واستغليت الوقت ده في دراسة الجو العام في السياسة وكان هممني اوووي اني اعرف السياسين اللي بقالهم سنيين فشلو ليه وليه مفيش حاجة بتتغير من المعارضة ويعني ايه تغيير لاعنيف بس مش من وجهة نظر اكتر من كاتب واكتر من منظمة واكتر من بلد وايه الظروف اللي حصل فيها تغيير وكده
ويمكن كمان احبطت وقعدت في فترة اكتئاب من تغيرات بعض الاشخاص اللي كنت بثق فيهم
بس مكنتش اعرف ان النصيحة دي كمين ليا سواء مقصود بالشخص اللي قالي كده او لا
للاسف الشديد من وقتها والهجوم بيزيد وفي ضهري ومش لاقية ليه اي سبب
وياريت حد بيجي يقولي حاجة في وشي وكل لما اسال حد فيهم يا يقولي اني بتوهم حاجات مش بتحصل او انه او هي بيدافعوا عني وانه مش من ضمن اللي بيضربوني في ضهري
وكلام كتييير بلاقيه بيطلع عليا وحاجات انا معرفش عنها بتتقال اني بعملها
واكتشفت ان مش بس اللي اخاف منهم الامن زي ما كنت متخيلة
لا ناس طلع ليهم تاثير اكبر بكتيير من اللامن
الامن بيقبض علينا ويعزبنا وخلاص وده احيانا بيخدم القضية اكتر عشان بيتكتب في الاعلام فلان اتقبض عليه ليه
لكن في حروب باردة من تحت الطرابيزة بتحصل عاملة زي الفيروس
وحروب مش شريفة ولا نضيفة
واكتشفت اني في عالم تخلو فيه المباديء
عالم بيحاولو فيه يصطادو الطير لحد ما هيقع ولما يقع على الارض ينهشوا في لحمه ويمصه دمه
بس بعد كل ده قررت اني اقف واعمل الصح بعد ما كشفت كل الناس على حقيقتها وعرفت ميين الكويس ومين الفاسد
واني عشان احرر البلد دي لازم اكون حرة
ومش هخاف ولا من السحالي
ومش هخاف من امن الدولة
ولا من الحكومة ولا من النظام
مش هخاف الا من ربنا
وهستخيره هو في كل شيء مش حد تاني
وهنزل للناس تاني عشان ده المكان الوحيد اللي برتاح فيه عشان بلاقي الصدق
وواثقة ان ربنا هيظهر الحق مهما كان
وهقرا اكتر وهربط كل اللي بقراه بالواقع اللي احنا فيه
ومش هتقلب زي السياسين اللي بيتكلمو بالانشا ومحدش بيسمعلهم
ومش هحلم اني اوصل للنجومية
ومش هخلي الاعلام غاية بددل وسيلة وانجرف تحت قيوده
وهكسر كل القيود اللي مكتفاني وهصرخ تاني باعلى صوتي
وهحاول على قد ما اقدر اني احمي الناس النضيفة من قذارة السياسة
اللي عايز البلد دي تبقى نضيفة لازم يكون هو نضييف عشان يعرف ينضف غيره

اسماء محفوظ
بعد حرب لم ولن تنتهي
7 ديسمبر 2009

حلم التغيير …. شباب 6 ابريل

2009-11-29T04:53:00.001+02:00

السياسة مش مجالي ... دي مجرد محطة في حياتي

2009-11-29T04:10:00.001+02:00

من ساعة ما دخلت السياسة وانا بين طرفين ويمكن اكتر من طرف
برة السياسة بيقولولي ايه وجع القلب اللي انتي دخلاه ده ومش هتعرفي تعملي حاجة وغيرك جرب وكانت نهايته المعتقلات والبهدلة ده غير اللي هيبقى عايز يستغلك عشان اغراض سياسية
واطراف من السياسة اللي هرشوا على طول اني لسة مستجدة في العالم العجيب ده وكل طرف بيحاول يجرني ناحيته
زمان مكنتش فاهمة ده اووي بس فضلت افهمه شوية بشوية
وكنت عاملة زي القطة الصغيرة اللي بتحس بدفا الام الحنون وبتروح ناحيتها
واستقريت في الحضن الحنين اللي حسيت انه اللي هييخليني اتحرك براحتي واعرف اعمل ايه اللي اقدر اعمله عشان خاطر اعمل حاجة بجد تفيد بلدي واهل بلدي
اشتغلت كتيير اووي بكل اللي اقدر عليه وكل ما اعمل حاجة الاقي نقض وشكوك من اتجاهات كتير
اللي يقولي اني غاوية شهرة واللي يفتكرني عايزة منصب سياسي
وكل كلمة بقولها بتتحفظ ويتعملها سكان وتترجم على محامل كتيير
والكلام ده بيطلع في وقته بعد كده على انها اتهامات
ولما اجي اسال ليه
يقولولي يا بنتي دي سياسة
وانا مش فاهمة يعني ايه سياسة دي
بس حبيت اوضح لكل الناس حاجة
انا انسانة عادية جداااا مجرد عندي حلم ان البلد دي تتغير للاحسن ونموت الظلم فيها لو لقيت غيري بيعمل مكنتش هدخل سياسة
لكن طول ما انا مش لاقية هفضل فيها
انا ماليش حسابات ولا عايزة يبقى ليا
انا بتضامن مع اي حد حسب مبدائي وحسب احساسي
مش بساعد حد مظلوم الا لما بحس فعلا انه مظلوم
كلامي بيطلع باحساسي بيه في وقته من غير حسابات
انا ليا احلام كتيير اوووي برة السياسة وهي دي اللي عايزة احققها
يعني ولا ليا اهداف سياسية ولا طموحات اعلامية
وعمري ما اضرب حد في ضهره وعمري ما عرفت اضحك في وش حد مش طايقاه
حتى لو مش طايقاه وجيت في يوم نسيت واتعاملت معاه عادي بيبقى نابع من جوة احساسي
ولو عدوي لقيته في موقف ضعف واتظلم احيانا بقف جمبه وحتى دي مش حاطلها معايير
مش لازم عشان تضامنت مع حد استنى منه انه يردهالي لكن على الاقل ميضربنيش في ضهري
بس بردو مش بحسبها كده
انا زي الطير اللي بيحب يتحرك بحرية طالما مش بيعمل حاجة غلط .. مش بحب القيود اللي ملهاش لازمة
مش بحب الخداع اللي عايز يقولي حاجة يكلمني يقولي في وشي
هقولها للمرة المليون
السياسة مش مجالي ... دي مجرد محطة في حياتي هتنتهي بمجرد انتهاء هدفها

ذكرياتي في حركة شباب 6 ابريل

2009-11-23T22:07:00.001+02:00

في يوم من الايام في شهر مارس 2008 لقيت جروب اسمه اضراب عام لشعب مصرتنحت ودخلت لقيت شوية شباب عارضين اضراب لعمال المحلة وبيقولو عايزين نعمم الاضراب على مستوى الفئات في جميع انحاء الجمهورية عشان نطالب بتغيير الوضع الحالي

فرحت اوووووووي عشان كنت بحلم باليوم ده من زمان مع ان مكنش ليا اي نشاطات سياسية ومكنش ليا في السياسة اساسا ولا اعرف اي تفاصيل بس كان كل اللي شايفاه اننا في بلد بقت خرابة واللي يقدر يسرق اي حاجة يسرقها والبقاء للاقوى والوضع بيسوء يوم عن يوم ومفيش تعليم عدل ولا صحة عدلة ولا اي حاجة عدلة وكل حاجة بتغلى يوم عن يوم وكل يوم حاجة في البلد تتباع واجي اتفرج على التلفزيون مفيش حاجة بيقولو عليها غير ان الوضع زي الفل ومصر في تقدم مستمر

المهم لما دخلت الجروب لقيت ناس زيي ملهاش علاقة بالسياسة ولقيت ناس تانية فاهمة وواعية هي بتتكلم عن ايه بس كنت داخلة الجروب وانا مقلقة وخايفة

المهم فضلت اتابع يومين كده وشوية شوية لقيت نفسي بكتب وبرد وبقول افكار زي بقيت شباب كتيير واضح انهم ملهمش في السياسة بس دخلوا يعبروا عن رايهم ويقولو افكار نعملها عشان الاضراب ينجح

الاضراب ده مكنش هدفه شغب او تعطيل مصالح ونخنق على الحكومة وخلاص وبردو مكنش تقليعة جديدة بنحاول نعملها لأ احنا كانت كل احلامنا بسيطة

عايزين تعليم بجد عايزين مرتبات تعيشنا على الاسعار الغالية دي او يقللو الاسعار بشكل يتناسب مع المرتبات .. كان نفسنا نثبت اننا شباب قوي فاهم حقوقه ومش بيستكين للاستبداد ده

فضلت انشر هنا وهناك من جروب لجروب ومن منتدى لمنتدى زي ما كان كتيييير من الشباب في الجروب بيعملو … كان اول حدث من نوعه يحصل من جيلنا والغربيب والغير متوقع كان رد الحكومة في كل وسائل الاعلام الاول تكذيب للاضراب وكانه شيء لازم يتعلن من جهة حكومية عشان الناس تستجيب وكانوا سبب كبير من اسباب انتشار فكرة الاضراب وساعتها بقى حديث الساعة في كل مكان وفي كل المواصلات والمحلات وبين الاصحاب والعائلات ونسبة كبيرة جدا من الناس دخلت على الفيس بوك تدور على الجروب عشان يعرفوا تفاصيله منهم ناس كتيير اتحمست وبدات تنشر الفكرة ومنهم اللي خاف بس فضل يتابع والناس في كل حتة بقوا ييسالو نفسهم انت عندك في شغلك في اضراب يوم 6 ابريل ولا شغل عادي انت في جامعتك في اضراب ولا لا طب ياترى الاضراب ده هياثر على الحكومة وفضل الكلام والتساؤلات ينتشر وسط الناس

ولما الحكومة حست بخطر اكبر من كتر التساؤلات دي ابتدت تتجه لاسلوب الارهاب والتهديد

ونزلت بيان عام من وزارة الداخلية في كل المحطات المحلية ان اللي هيعمل اضراب هيتئذي ويهعرفوا يجيبوه …

طبعا الناس مش فاهمة يعني ايه اضراب وخافوا من البيان وخافوا ينزلوا من البيت وفيهم اللي فهم وقرر انه يقول للحكومة مش نازل من بيتنا الا لما اخد حقي وفي اللي نزل عشان يشوف الشوارع عاملة ازاي

اسبراي في كل حتة غرق شوارع مصر وبوسترات اتلزقت في كل مكان وفي كل المواصلات ومنشورات اتوزعت في كل مكان وافكار للي هيحصل قبل الاضراب شباب وبنات بنتكل فيها على الجروب الكبير والخوف على قد ما بيزيد على قد ما المجهود بيكبر والحماس بيزيد وبيغلبنا على خوفنا

يااااااااه معقولة احنا هنقدر ننجح ونقف قدام الحكومة ؟؟ شباب مصر بدعوتهم للاضراب هيستجاب ليها كل شعب مصر؟؟

كانت احاسيس كتيير اووي واحلام وطموحات خلتنا نصمم ونتفق من غير ما نشوف بعض ومن غير ما نجتمع في اي مكان بس حلمنا جمعنا وهو اللي وحدنا على عمل واحد وروح واحدة وحماس واحد

وجه اليوم …. اضرراب 6 ابريل 2008

شوارع مصر فاضية مفيهاش الا ناس قليلة وفيها امن كتييييير ظباط وعساكر وعربيات امن عام وامن مركزي حتى المترو مليان جيش عساكر وكاننا في يوم اجازة

اجازة؟؟ لا الاجازة مش بتكون كده ده زي ما يكون بلد مفيهاش ناس

كأن في حذر تجول في شوارع مصر … وبعدها رجعت البيت لقيت في التلفزيون حرب في المحلة

مصدقتش نفسي دي في مصر ولا في قطاع غزة؟؟ وسمعت ان في ناس كتييير اوووي اتقبض عليهم من شباب الفيس بوك … ساعتها كان اهلي ميعرفوش اني بدخل على الجروب ده ولقيتهم بيقولولي اوعي تتدخلي على الفيس انتي فاهمة ولا وفجاة الفيس بوك تحول لجريمة محظورة يعاقب عليها بس من غير قانون بس لقيت جروبات كتيير ظهرت بتطالب فيها بالافراج عن المعتقلين هنا وهنا وتعاطف كبيير

العالم كله كان بيتكلم على مصر اليوم ده

خلص اليوم وقررنا نعمل يوم زيه يوم 4 مايو عشان نضغط على الحكومة انها تنفذ المطالب

ووقتها كانت قلوبنا اجمد لدرجة اننا اتفقنا على بيان على النت .. ساعتها اخدت البيان ده وطبعته وصورت من نسخ كتييير ونزلت اوزع في المترو بس اول لما ابتديت اوزع لقيت عندي احساس غريب خوف وتصميم اني اوزع ويمكن كسوف عشان لوحدي ومعرفش حد

لقيت الستات في المترو منهم افتكرني بوزع ورق دعاية مرضيوش ياخدوه مني وستات تانية تقرا تلاقي اضراب يبعدوا عني بسرعة وستات وبنات اكتر لقيتهم بيخبوني ويقولوي خافي على نفسك انتي عارفة ممكن يحصلك ايه فضلت اتكلم معاهم واقولهم وجهة نظري في الاضراب واهميته واخدوا الورق ولما جيت انزل من المحطة لقيت ستات نزلت معايا تخبيني من العساكر ونزلت على عربية تانية وهكذا معرفش جاتلي الجراة دي منين اول مرة اوزع منشروات ولوحدي ومن غير ما حد يقولي ولما رجعت الجروب حطيت اللي حصل ولقيت غيري عمل كده كتيير ومكنتش انا بس اللي عملت كده ساعتها فرحت جداا وابتدينا نشجع بعض

بعدها تم اصدار قرار انه هيتم زيادة المرتبات 30% والناس فرحت اووووووي وحسوا انهم نجحوا لاول مرة يعملوا حاجة عامة كل الناس عملتها وحققوا بيها المطالب

وساعتها الناس قررت انها تروح شغلها عادي ومتعملش اضراب يوم 4 مايو 2008

وبعدها كانت الصدمة زيادة في الاسعار 50 في المية في كل حاجة وخصوصا البنزين وفضلت الاسعار تزيد وتزيد وساعتها الناس بعد ما اخدت ثقة في نفسها احبطت جدا

وهنا كان قرار لمجموعة كبيرة من الشباب انهم يبتدوا مشوار عارفين ومتاكدين انه صعب

to be continued…….

View Full Album

تعالو نشجع مصر بجد في ماتش التغيير

2009-11-18T23:57:00.001+02:00

عشان نغير مصر لازم نوصل لاكبر فئة فيها او اكبر عدد ودي حاجة مش جديدة اكيد كلنا عارفينها
بس للاسف احنا مهما وصلنا لعدد كبير من الشباب بس لو قسناها بالنسبة هتطلع نسبة ضئيلة من الشباب اللي قدرنا نوصلهم صوتنا وفهمونا
بس للاسف الحكومة بشرها طلعت اذكى مننا وعرفت ازاي توصل لاكبر نسبة من الشباب وبوظتلهم مخهم
عرفت تلعبها صح وتملى دماغهم باحلام وهمية زي العربية والشقة في مكان شكله ازاي وطموحاتهم اقتصرت على شركة كبيرة بمرتب كبير مش مهم في مجال ايه
ومش مهم هما ناجحين فيه ولا لا المهم انه يجيب فلوس وخلاص
خلت الشباب معندهمش انتماء للبلد كلهم بيحلمو بالسفر ... لو جيت تقول لواحد مصر هيتريق عليك ويشتمك
يا اما اللي فاهم وخايف بس ده كمان مش فاهم اووي عشان لو فهم بجد مش هيخاف
الشباب ثقافتهم بتنحدر يوم عن يوم ولا بيقروا جرايد ولا بيشوفو اخبار ولا بقو عايزين حتى يعرفوا اخبار البلد
لو سالتهم احنا عندنا كام وزارة يمكن ميعرفوش طيب وظيفة الوزارت ايه بردو ميعرفش
نسبة كبيرة منهم ميعرفوش الانتخابات الرئاسية امتى
اسالهم عن اي حاجة تخص البلد غير الحفلات والعربيات والمخدراات والسجاير والقهاوي مش هيعرفوا
ولا حتى فكروا يسالوا نفسهم
كلمة وانا مالي اتعلموها من حضانة ... وانا مالي ياعم دي سياسة وانا مالي بالسياسة
ولو حد صاحبك اوووي وجيت تكلمه فجاءة في حال البلد ممكن يقولك ايه ياعم انت عندك اكتئاب ولا ايه
طيب عشان مرغيش كتيير والكلام ده كلنا عارفينه
خلاصة الكلام اننا عايزين نوصل لاكبر نسبة من الشباب دي
فعايزين نسال نفسنا كذا سؤال؟
ياترى الشباب كلها تفكيرها واحد؟ ولا متقسمين فئات؟
طيب ايه اكتر حاجة بتشتغلهم وازاي نقدر نوصلهم للسياسة عن طريق الحاجات دي؟
طيب احنا كلنا عارفيين رؤيتنا واهدافنا بس ياترى لو بنفس الطريقة دي قلناها لاي واحد من الشباب هيفهمها؟
وهتوصله؟
اصلا الشباب بتكسل تقرا وبتهزق من الكلام الكتيير
طيب لو حبينا نلخص كل الكلام ده في رؤية محددة ومهمات محددة واهداف محددة
سطر او سطرين في كل حاجة منهم باسلوب يوصلهم
هتتكتب ازاي؟؟
طب لو كلمناهم ايه الاسئلة اللي بيسالوها عايزين يفهموها ؟ وايه احسن طريقة واسلوب اجابة على الاسئلة دي؟
عايزين كلنا نفكر سوا ايه احسن طريقة واسلوب نوصلهم بيه

http://www.facebook.com/topic.php?uid=9973986703&topic=26702

مصر والمعارضة والناس

2009-11-11T00:13:00.001+02:00

هي المعارضة بتعارض من امتى حكومة مبارك؟
اكتشفوا امتى ان الحكومة دي فاسدة؟
لو في معارضة بجد كان الفساد على الاقل هيقل
ليه الفساد بيكتر كل يوم عن اللي قبله؟
في زيادة مستمرة بشكل يخوف
والناس سلبيتها بتكبر واحساسها بانعدام الامل بيكبر
وللاسف الشديد الناس اللي عندها مبدأ وضمير وايجابيين يا اما بيتجننوا يا اما بيموتو ياما بيتسجنوا يا اما ايه؟
يا اما بيبقو اكبر فسادا من اللي وقفو ضدهم في يوم
طب ايه دور المعارضة
جعجعة وتنظير
سواء المعارضة اللي تبع الحكومة او المعارضة اللي بتمشي زي ما الحكومة عايزة وهما مش داريانين او عارفين يمكن الله اعلم
لو هنتكلم عن الوطنيين
اكيد اكيد ناس كتيير زمان اوووي لما دخلو السياسة دخلوها عشان مصر والوطنية والشعب والى اخره
بس ياترى ايه اللي يبحصل؟
كل اللي سمعته وبما اني معنديش اي خبرة ثقافية او تاريخية او زمان ان كل شلة بيقولو هنعمل حاجة بيحصل فيها انقسامات وان النفسيات بتاعة الناس وحب المال والشهرة هو اللي بيكسر الكتلة دي الي مجموعة كتل
طيب الناس دي ازاي دخلوا سياسة على حب الوطن وفجاءة اتحولو لحب شهرة والامراض التانية اللي عارفينها؟؟
طيب معقول كل المصريين اللي دخلو المعارضة كده؟
اكيد لا
طيب ايه اللي حصل للباقي؟
في ناس بتهزق وناس بتسافر وناس بتكمل بقيت حياتها متحسرة وناس بيتقال عليها كلام زبالة وبيهربو من الكلام ده ويختفوا
وناس يتقال عليها بتاخد تمويل ويكرهو فيهم الناس وناس يتلفقلها قضية تخابر ويكرهوا برضو فيهم الناس
وبنات يتحرشوا بيهم ويقولو انهم بنات وسخة وهما اللي بيدعو ده عشان الشهرة
بس بس بس بس بس بس
لازم نفكر في كل ده
اولا مش منطقي خالص ان كل التكتلات يحصل فيها نفس المرض وتموت نفس الموتة باختلاف السيناريوهات ونقول صدفة
ااه الناس منفسنة بس مش معقول بقالنا سنين الناس تدخل السياسة زي الفل تدخل جوة تتعدي مش انفلونزا خنازير دي اصلها
ميين اللي بيقيد نار الخناقات؟
وميين في مصلحته يخلي المعارضين يمسكوا في بعض بدل ما يمسكوا في الحكومة؟
وميين اللي في مصلحته يكسر مجاديف بقيت الناس عشان يقولو عمرنا ما هنغير يعني اللي حاولو يغيرو عملو ايه؟
وميين في اللي مصلحته يخلي كل السياسين يقعدوا في قهاوي وسط البلد بس قهاوي وسط البلد بس؟؟؟
ميين اللي في مصلحته يدخل ناس مأجورة ويعملوا فيها ابطال وزعماء ووطنين وبعد كده يبتدوا يوقعو بين الناس ويكرهوا الناس في الناس؟؟؟
ميين اللي قلب السياسية وظيفة ومصدر رزق؟؟
ميين اللي قلب الوطنية مكانة سياسية؟؟
ميين وميين وميين وميين
اكيد كل ده مش صدفة مع اني متفقة ان النفس البشرية ليها دور كبير في اللي بيحصل
بس من سنييييييييين طويلة والقصة هي هياها بتكرر بس بسيناريوهات مختلفة
صدفة؟؟؟ اكيد لا
طب ليه اساليب السياسين واحدة؟
ليه الناس المثقفة محاولتش تستغل ثقافتها في التطبيق وسط الناس في الشارع واستغلوه بس في المناظرات على القهاوي والندوات؟؟
ليه عمر ما حد ربط مناخ الشارع وتغيراته بالعمل الوطني؟
وليه اللي يجرب يعمل كده يتهموه باسوا اتهامات ومن ميين
مش من برة لا
ده لازم الاتهامات دي تتطلع من اقرب المقربين

طب ما تيجو نمسح كل ده باستيكة
ونبتدي من الاول
ليه كل واحد عايز يغير مصر بجد ينسى اسمه خالص ويقول انا مصري وعايز اغير وعشان اغير هبعد عن اسلوب الحمضانين وانزل اشوف اقدر اوصل الناس في الشارع ازاي يبقو ايجابين ويفكرو في عقلهم وفي مستقبلهم صح بدل ما بيفكروا ازاي يحافظو على الطريق المستقيم اللي جمب الحيطة؟

ليه منفكرش في اساليب مبتكرة مش اساليب التمنينات ونشوف نقدر نوصل للمصريين اللي من كل الفئات اللي في الدنيا ومن كل الاعمار ومن كل الوظايف ومن كل الثقافات
ليه بدل ما نبهدل بعض قدام الناس دي ونقولهم تعالو اتفرجو علينا اصل احنا اللي هنغير مصر
نحافظ على بعض وننصح بعض ونتكلم ونتفق على ان مصر مش هيفدها تقطيع هدومها وهدومنا
ليه ما كل المعارضة تتفق على مبدا او فكرة
وكل معارض لو حبكت معاه يشتغل باسمه بس يخدم الفكرة او كل كتلة او حزب
تعالو ننزل الشارع نوعي الناس الشهر ده بكذا
كل مجموعة من كل تيار تنزل وتعمل ده باسلوبها
ويتناقشوا مع بعض كل اسبوع او كل شهر عملو ايه وايه تجربتهم ونجحت في ايه
ويبقى التنافس في ارض الملعب مش ارض الندوات اللي لا بتودي ولا تجيب

لو بصيتو على غلطات زمان متتحسروش عليها بالعكس تعالو نتعلم من كل اللي وقع المعارضة وتعالو نتفاداه ونجرب غيره لحد ما نوصل بجد
لو قريتو تجارب شعوب اسوا مننا حالا هتلاقوا ان في امل كبيير
لو اتعلمنا ازاي نخطط صح ونحسب خطواتنا في سبيل الهدف وقيمنا نفسنا كل فترة ونسينا اي حد يقول علينا ايه ولا الجرايد تشهر علينا وتقول ايه ولا مركز فلان السياسي اتهز ليه
تعالو نفكنا من كل ده ونفكر ازاي نوعي الناس على الاقل اول فترة يكونو ايجابين في المحيط الضيق الشغل مثلا
ونشجع الناس كلها انها متسكتش عن الباطل ونعلمهم ونعلم نفسنا معاهم ازاي نقول لا بطريقة سلمية وحضارية وازاي نغير المكان اللي حوالينا من فساد لمحيط فيه نسبة كبيرة من العدل والعمل الجاد والجيد
جوايا كلام كتيير اووي اتفجر بعد سنتين سياسة
بس لو قلنا مفيش امل نتعدل نبقى بندفن نفسنا بالحيا
في وقت لسة نعمل مارشيدير ونرجع وندور على الطريق اللي هيخلي بلدنا احسن بلد في الدنيا بجد

اسفة لو زهقتكوا مني ومش لازم اكون صح بس دي وجهة نظري

Somebody Already Broke My Heart

2009-09-05T14:39:00.003+02:00

- You came along when I needed a savior

Someone to pull me through somehow

I've been torn apart so many times

I've been hurt so many times before So I'm counting on you now

Somebody already broke my heart

Somebody already broke my heart Here I am

So don't leave me stranded

On the end of a line

Hanging on the edge of a lie

I've been torn apart so many times

I've been hurt so many times before So be careful and be kind

[2] - Somebody already broke my heart

If someone has to lose, I don't want to play

Somebody already broke my heart

No, no I can't go there again

اهالي عين شمس اخدوا حقهم بايدهم

2009-08-25T20:50:00.005+02:00

التجمع كان امام حي عين شمس الساعة 10 صباحا
مكنش في عدد كبيير من اهالي حي عين شمس
بس كان في عدد حوالي 15 واحد من بيوت متفرقة
وكانوا جايين ومتخوفيين وعندهم تساؤلات
ياترى هنروح هنلاقي حد معانا؟
طب حد هيسمعلنا؟
طب ولو سمعو حد هيعملنا حاجة؟
اتكلمت معاهم الاول قلتلهم احنا ندخل تقابل رئيس الحي ونوضحله المشكلة ومنمشيش الا لما يحصل تصرف
طبعا كلهم اجمعوا انه مش هيقابلنا . فاتفقت معاهم قلتلهم احنا عددنا مش قليل احنا هنقف هنا ومش ماشيين الا لما يقابلنا او نصطاده وهو خارج
فدخلنا نسأل على رئيس الحي وقلنالهم بخصوص الزبالة ... والموظف اللي على الباب واحد طول بعرض كده قالنا لفو من الباب اللي
ورا قدموا شكوى في الشباك وهنبعتاله ان شاء الله
فعلينا صوتنا وقلنا مش ماشيين الا لما نقابله
فاتصل بسكرتيرة رئيس الحي ورجعلنا قالنا واحد بس منكوا هو اللي يطلعله
قلناله مش هنتحرك من هنا الا لما كلنا نطلع
وفي غيرنا كتيير ممكن نتصل بيهم يجوا كمان
وصممنا على موقفنا لحد ما طلعنا الدور الاول اللي فيه المكتب بتاع رئيس الحي
طلعلنا موظف واقف على مكتب السكرتيرة قالنا عايزين ايه والموضوع بخصوص ايه قلناله الزبالة الي في شارع احمد عصمت
قالنا مش هينفع تقابلوه الرئيس مش بيقابل حد
سألناه طيب يعني نعمل ايه؟
قالنا اكتبوا شكوى وهبقى اديهاله
قلتله لأ احنا بقى مش متحركين من هنا الا لما نقابله وادينا قاعدين
حاولو يتفاوضوا مع الاهالي ويهدوهم عشان يمشوا
قمت قلتلهم لو مش هتدخلوله يبقى مش هتعملوا حاجة
لازم نتكلم معاه
قالنا طيب دقايق وراجعلكوا
ساعتها قمت بعت لكل الصحفيين رسالة بتقول ان رئيس الحي رافض يقابلنا ونزل بيان باسم شباب 6 ابريل بنقول فيه ان رئيس الحي
تقاعس فيه عن واجبه ورافض مقابلة الناس
سمعنا السكرتيرة بتكلم حد وبتقوله " هي صغيرة مش كبيرة في العشرينات كده ... بس بتتكلم كويس وهي اللي بتقود الاهالي ... طيب
حاضر تمام ساعتك حاضر مع السلامة"
وبعتتلنا الموظف وقال عايز واحدة بس تدخل فقلتله انا هدخل بس مش هدخل لوحدي هدخل على الاقل اتنين معايا كمان من الاهالي
ووافقوا
دخلنا قابلنا رئيس الحي ومعاه حد كده معرفناش بنفسه ولابس بدلة بيضا متشيك اووي وشكله مش مريحني كده
المهم
السلام عليكم وعليكم السلام
اتفضلوا ايه مشكلتكوا
ابتديت الكلام وقلتله احنا مش لوحدنا في برة 15 واحد كل واحد بينوب عن العمارة اللي ساكن فيها ولسة في ناس تانية المشكلة اللي
هقول لحضرتك عليها دي مشكلة الحي بحاله اللي حضرتك رئيس ليه
وهي مشكلة الزبالة
لقيته قالي انا شخصيا قرفان وانا مش مقصر في حاجة دي اصلا مش مشكلتي بس هي في وشي في الاول وفي الاخر
قلتله طب دي مشكلة مين؟
قالي دي مشكلة هيئة النظافة وشركة النظافة
قلتله طيب هم مش بيعملوا حاجة وحضرتك رئيس الحي واي تقصير من اي هيئة في الحي حضرتك اللي بتصعد الموضوع للمحافظ
قالي انا قدمت بدل الشكوى 1000 للمحافظ وقلتله عايز معدات وانا اخلي عين شمس دي اضف حي في مصر وهو معملش حاجة
وطالبت ان الصفقة بتاعة شركة الزبالة مع المحافظة تتلغي ومتلغتش
قلتله متلغتش ليه
قالي اكيد انتي فاهمة بلاش نفتح في مواضيع تانية
راح الاتنين من اللي الاهالي اللي كانوا معايا قالوله حضرتك انقل الصندوق بتاع الزبالة واحنا هنجيب بلطجية على حسابنا نمنع اي حد

يجي يرمي زبالة هنا بس تعالوا نضفوها
قال طيب هنشيل الصندوق
قلتله طب ما المشكلة مازالت قائمة هتنقل الصندوق من مكان هتوديه في مكان تاني علمنا احنا ايه
قالي انتي مشكلتك قدام بيتك؟ ههحلهالك
قلتله لا انا يهمني ان الحي كله يبقى نضيف
قالي انتي اتكمتي كتيير انا عايز اسمع راي الناس التانية
فقالوله حضرتك نضف قدام بيوتنا بس عشان البنزينة ومش عايزين كارثة تحصل لو حاجة ولعت لا قدر الله
راح بصلي وابتسم قالي كده تمام هشيل الزبالة واشيل الصندوق واعلمكوا رصيف ونجمل المكان
قلتله حضرتك بقالك سنة في الحي لما المحافظ مش بيستجيب ليه مصعدتش الموضوع ده؟؟
قالي متتكلميش معايا بالاسلوب ده انا لواء مخابرات سابق
ولقيت بلطجي واحد زي بتوع امن الدولة اللي بنشوفهم ولابس نضارة شمس وجه وقف ورايا بالظبط
بصيت ورايا لقيت ركب بني ادم
قلتله انا مواطنة مصرية ومن حقي اعيش في مكان نضيف وحضرتك رئيس الحي ومسئول مسئولية كاملة عن الحي
قالي يابنتي متناهديش انا والله تعبت بس دي سلوكيات شعب
قلتله لااااااااااااا من فضلك
نفس الشعب دول كانوا موجودين زماان والمكان كان نضيف عملتوا صفقة عربيات الزبالة البلد كلها بقت زبالة
يبقى العيب مش في الشعب
قالي احنا بنشيل الزبالة والعربجية بيجوا يحطو زبالة تاني
قلتله ودي بقى مسئولية مين؟
قالي واحنا مالنا بقى
قلتله طيب هخلي العربجية دول يروحو عند بيت الريس ونشوف مشكلة مين؟
قالي الريس مش هيعرف يعمل حاجة
قلتله نعم؟؟؟؟؟؟؟؟؟
قالي يابنتي ده تقصير من الكل
من هيئة النظافة للمحافظة للبوليس اللي مش بيمسك العربجية دول
قلتله خلاص اشتكيهم
قالي وانتي فاكرة اني مشتكتهمش
انا عملت كل الليي عملته والله العظيم واقسم بالله اقسم بالله انا مش مقصر
بس محدش بيعمل حاجة
وقالي عموما مشكلة اهالي الشارع اللي جم انا هحلها وهنضف الشارع كله
وجابلنا مهندسة الحي واتفق معاها على تجميل الشارع
واتصل بمساعد رئيس الحي قاله تنزل تشرف بنفسك علىنظافة الشارع دلوقتي عايزهم يروحو بيتهم يلاقوا الشارع نضيف
وقالي انتي اسمك ايه؟
قلتله اسماء محفوظ
قالي يا اسماء يابنتي متفتكريش اني مقصر والله انا بعمل اللي عليا
قلتله على العموم انا اسفة لو كت انفعلت عليك ولما نشوف اللي هيحصل ايه
روحنا لقينا فعلا بلدوزر وعربيات جاية مش من الشركة دي جاية من المحافظة نفسها
وبينضفوا
والاهالي فرحوا اوووي انهم علموا حاجة
لقيت مساعد رئيس الحي بيدور عليا وبيديني موبايله وبيقولي رئيس الحي عاوزك
كلمته قالي شفتي نفذت وعدي اهو
قلتله لا ده نص الوعد بس لما نشوف هيكمل ازاي
قالي هنكلمه باذن الله
وانا بكرر اسفي لو كنتي زعلتي مني وخي موبايلي وفي اي وقت مكتبي مفتحولك
وانا والله نفسي انضف مصر كلها
قلتله طب ايدي في ايدك اقدر اساعدك في حاجة
قالي اعملي اللي انتي عايزاه بس م غير ما تسيئي لحد
انتي فاهمة وانا فاهم
صح
ودي كان المرحلة التالتة من واسطتك مصريتك

توزيع ورق يشجع الناس تروح تشتكي في الحي في حملة واسطتك مصريتك

2009-08-17T17:28:00.002+03:00

نزلنا انهاردة عشان نتكلم تاني مع الناس ونقولهم اننا لازم كلنا نتحرك ونكون ايد واحدة عشان نجيب حقنا من الحي
وكتبنا ورقة توعي الناس ونقولهم على عنوان الحي والميعاد اللي هنتجمع فيه
وزعنا الورق على الناس ووعيناهم والناس اخدت مننا الورق وابتدوا هما كمان يوزعوا ولزقنا في مداخل العماير وحطينا الورق تحت المساحات بتاعة العربيات
الناس نفسها تعمل حاجة بجد بس فعلا محتاجة اللي يزقها ويشجعها
المصريين مش وحشين بس هما مظلومين وضحايا التعليم والاعلام البايظ ده
بس كان يوم حلو وخصوصا ان في ناس قابلتها كنت اتكلمت معاهم قبل كده
لقيتهم قالولي احنا صورنا فيديو الزبالة وصورنا مع الناس نبعتلك الحاجات دي فين
بجد في ناس تعاونت معانا جامد
دي بقى نسخة من اللي تم توزيعه انهاردة حملة واسطتك مصريتك
شارك معانا وخليك ايجابي
بقالك قد ايه بتشتكي من الزبالة اللي في الشارع قدام بيتك وفي الشارع اللي ساكن وتقريبا في كل شوارع عين شمس؟؟؟
انت عارف ان في ناس كتيير اوووي في عين شمس جاتلهم امراض بسبب الزبالة دي؟
انت عارف ان في احياء تانية كانت الزبالة عندهم كده وسكتوا عليها لحد ما جاتلهم امراض كتيير والحكومة ولا سألة فيهم
طيب انت عارف البنزينة في شارع احمد عصمت مثلا اللي قدامها مقلب زبالة لو اي واحد وقعت منه سجارة فيها وولعت والنار جت
جمب البنزينة ايه اللي ممكن يحصل؟؟ دي هتبقى كارثة اسمها كارثة عين شمس والحي ولا هو هنا
انت ممكن تكون اشتكيت مرة والحي مستجابش وممكن يكون غيرك كمان اشتكى والحي مستجابش بس مينفعش نزهق ونستسلم للزبالة
اتخنقت كام مرة انت وجارك اللي في العمارة اللي جمبك عشان هو جاب الزبالة اللي قدام بيته وحطها قدامك وانت عملت نفس الشيء؟
اكيد طبعا الخناقة وصلت للضرب مش كده؟
طيب انت ذنبك ايه وهو ذنبه ايه؟؟
دي مسئولية الحي اللي معملش اللي عليه وشال الزبالة دي
ولو بيشلها مرة الصبح والعربجية بيجوا يرموا مخلفات البناء تاني .. دي مش مشكلة العربجي دي مشكلة ان الحي مش عايز يراقب
ويحط عمال نضافة في الحي تواظب على تنضيف الحي
مش لازم يكون لينا واسطة في الحي عشان يشيلوا الزبالة من قدام بيتك او المحل بتاعك
انت انسان ومواطن مصري من حقك تعيش في حي نضيف زي بقيت الاحياء اللي بيسموها راقية ... يعني هما بني ادمين من حقهم في
حي راقي واحنا خنازير نعيش في الزبالة؟؟
دي مسئولية الحي من ضمن مسئوليات كتيير مش بيعملها
خليك ايجابي وتعالى كلنا في وقت واحد وفي يوم واحد نقدم شكوى جماعية من اهالي عين شمس عشان نطالب بحقنا بحي نضيف خالي
من الامراض ولما نكون كلنا في وقت واحد رايحين هيكون صوتنا اقوى وشكوتنا اكبر
ولو رئيس الحي معملش حاجة هنصعد الموضوع للنائب العام وللاعلام
هنتجمع كلنا الساعة يوم الاربعاء 12 اغسطس الساعة 10 صباحا امام حي عين شمس
العنوان : ناصية شارع عبد الحليم محمود مع شارع حسونه من شارع 6 أكتوبر
http://shabab6april.wordpress.com
shabab6april.mov@gmail.com

تحيا اهالي عين شمس تحيا المصريين

2009-08-17T17:21:00.002+03:00

ونزلنا عين شمس تاني
اللي هي منطقتي وانجي وخليل واحمد وشيرين نزلنا مع بعض
الاول عملنا حملة استقصاء عن اكبر مشكلة بتواجه المنطقة
ولقينا ان المطقة وده واضح انها تحولت لمقلب زبالة
وصورنا وعملنا حوارات مع الناس
كتبنا شكوى بقى انهاردة ونزلنا نمضي الناس عليها ونوعيهم بحملة واسطتك مصريتك
في انواع كتيير جداا من الناس
وكل المستويات
كل واحد فينا اتنشر في مكان عشان نمضي اكبر عدد ممكن
المهم
الناس اللي قابلتهم بقى
كل واحد فيهم بيسال انتي محامية طب انتي مين
فقلتلهم على اسمي وشاورتلهم على العمارة اللي ساكنة فيها فاطمنوا انهم يتكلموا
قلتلهم بقى احنا شباب 6 ابريل واحنا مش شباب فاضي انا بشتغل 11 ساعة في اليوم وبدرس كمان بس انا مش قادرة اسكت على ظلم الحكومة لينا
وكلمتهم على الضرائب اللي بيدفعوها ومش بيستفيدوا بيها
فالناس تواجبت جداا والكلام ابتدى يتفتح بقى ورئيس الحي اللي مش بنشوف وشه الا لما يجي يعمل اشغال طريق فياخد فلوس ويمشي
والشرطة اللي بتيجي تبلطج على الناس وتاخد فلوس وتمشي
وكلام بقى ايه وكانوا شافوا الكائنات الفضائية اللي بيسمعوا عنهم في الجرايد بيعتقلوا كل يوم ناس زيهم عاديين
الحلو بقى سمعت تعليق حلو اوووي
جمعت صحاب كام محل كده جمب بعض وقعدت اتكلمت معاهم وصوتي طبعا كان عالي فناس تانية جت تشوف في ايه
صوتي مش عالي بزعق بس التون كانت عالية
فواحد بيقولي انا خايف يتقبض عليا انا مالي ومال الحكومة
واحد قاله مش عيب عليك تشوف بنت زي دي صغيرة ونازلة بنفسها تتكلم مع الناس ومش خايفة
وانت ياراجل ياالي بشنبات خايف
قالي لا انا مش خايف انا بس كفاية مشاكلي
قلتله بزمتك اتخنقتوا كام مرة مع بعض عشان الزبالة كل واحد يرميها قصدا المحل التاني
قالي كتيير كل يومين نتخانق ونتصالح
ووصلت للضرب كمان
قلتله مش عيب طيب لما تضرب اخوك وحبيبك وانتوا الاتنين اصلا ملكومش ذنب
وسايبيين في اللي سارقينكوا
انت عارف انك هتتحاسب على حقوقك الضايعة دنيا واخرة
الرجال وزن الكلام وقالي طيب انا همضي وهشوف ايه اللي خيحصل
وسيبيني افكر شوية
لقيت اللي معاه اخدوا الورق ومضوا باسمهم وكتبوا اسامي اخواتهم اللي ساكنين معاهم
واسامي مراتتهم
وكانوا فرحانين اووي
قالولي ربنا يباركلك وبتاع وايه بقى شباب 6 ابريل دي
احنا بنسمع عنها في الجرايد
فضلت احكيلهم بقى هدفنا ومشوارنا فرحوا بينا اوووي
اما البنات بقى ياعيني على البنات
ادولي ارقامهم وعايزين ينزلوا معايا المرة الجاية
وواحدة متجوزة قالتلي ده اسم جوزي وشغلته اهي
حاولي تخلوه معاكو بدل ما هو مكبر من الدنيا كده
وقابلت واحدة وجوزها اتخنقت مع جوزها وقالتلوا انا همضي انا انسانة وليا حقوق
وهو عمال يشدها ويقولها خلينا في حالنا قالتوا ياراجل بطل سلبيتك دي هنجوز بنتنا ازاي بالزبالة دي
وحاجات كتييير اوووي بس بجد تعبانة ومش قادرة احكي دلوقتي
هنام بقى وبكرة لما افتكر الباقي هحكيلكوا عليه
بس حقيقي
تحيا اهلي عين شمس
وتحيا المصرييين
ووجودي في وسط الناس دي احسن مييت مرة مع التعامل مع السياسين
الناس المصرية بجد جميلة
كده عين شمس والخصوص
هاا ميين هينزل تاني منطقته يشوف اكبر مشكلة ويجمع الناس عليها عشان تحلها؟؟؟

مالكو ومال اهلي يابتوع امن الدولة

2009-05-08T18:13:00.006+03:00

أنا اسماء محفوظ عضو بحركة شباب 6 ابريل عندي 10 أعمام و9 خلان كل واحد فيهم عنده متوسط 5 ابناء وكلهم تقريبا اتجوزو يعني العدد اتضاعف وكمان خلف يعني اتضاعف 4 مرات
يعني ممكن نقول مثلا في بتاع 400 فرد في شجرة العيلة كل واحد فيهم في منصب مختلف ودراسة مختلفة وفكر مختلف
مباحث أمن الدولة ابتدت بوالدي كل يومين مكالمة تليفونية من مباحث امن الدولة عايزين حضرتك في موضوع يهمك بخصوص بنتك تيجي انت برجلك ولا نجيبك احنا بطريقتنا؟؟؟ وطبعا الإجراء إلي بيعملوه ده غير قانوني ووالدي رفضه. وهديوا شوية
رجعوا تاني بمخبرين في كل مكان يلاحق كل فرد في اسرتي يسأل عنهم وهذا اثار ضيقة اسرتي.
ابتدوا يهددوا اخواتي هددوا اخواتي عن ايقافهم من العمل وليس هذا فقط بل هددوهم ايضا انهم لو ذكروا اي شيء عن هذا التهديد هيسجنوهم وبعد التهديدات طلبوا اقرار مني مكتوب بخط ايدي باني لن يكون اي علاقة من بعيد او قريب بالسياسية وتحديدا في حركة شباب 6 ابريل وكمان اطلع على صفحات الجرائد واقول اني ندمانة اني كنت عضوة في حركة شباب 6 ابريل ولو مقدروش يخلوني اعمل كده .. طلبوا تزوير شهادة صحية تفيد باني مختلة عقلية وطبعا سببوا لي مشاكل جثيمة في البيت وقلق شديد لاهلي
وانا قررت إني لن أتنازل عن دوري الوطني من أجل بلادي
راحوا هددوا اخي وقالوا له : طيب متزعلش مننا بقى لما نجرجر اختك من بيتها بواسطة زوار الليل الساعة 3 الفجر وهنجيبها عندنا وانت اكيد فاهم كويس ممكن نعمل ايه في بنت فلمصلحتك ولسمعتك متجبرناش اننا نعمل كده
الكلام ده من شهرين وطول الفترة دي الاقي كل شوية فرد من العيلة يكلمني يقولي اتصل بي فرد من الحزب الوطني وقال لي ابلغك انهم عايزين يقعدوا معاكي عشان يحموكي من اللي حصل بمجرد انك تقولي انك ندمانة من معرفتك بشباب 6 ابريل ورفضت
راحوا غيروا الطلب احنا عاملين لجنة وعايزين نتكلم معاكي ياتقنعينا بنشاطك يانقنعك احنا بنشاطنا وبردو قد رفضت الحديث معهم تماما وهديوا شوية سواء بتوع الحزب الوطني او مبحاث امن الدولة
فجأة تليفون من أمن الدولة يطلبوا زيارة اخي لهم ورغم اني نصحت أخي بعدم الذهاب لهم فقد ذهب بالفعل اليوم
كانو عايزين بس يقولوله كلمة واحدة ابن خالك تقدم لوظيفة في وزارة الخارجية ووهو يصلح لها بعد ان نجح في كل الاختبارات بجدارة بس للاسف هو اترفض بسبب اسماء محفوظ تعد فرد من عائلته الكريمة
إلي كل الهيئات التي تعمل ضد راحه أهلي
أنا أسماء محفوظ أقر بأني أفخر بمصريتي وببلادي وأبزل كل الجهد من أجل تحسين وطني وتطويره ونقله إلي مرتبه الرقي والقوة .. بدلا من الظلام والإستبداد والضعف والوهن الذي نعيشه ... وأني لن أتنازل عن حلمي الذي أحلمه كل يوم لمصر بأن تكون مصر القوة والأمان
اعطوا لكل فرد حقه وانا اوعدكم باني هبطل نشاطي السياسي
أسماء محفوظ
عضو بحركة شباب 6 ابريل
مصـــــرية حرة

برافو عليك

2009-01-14T17:11:00.038+02:00

انت بتكمل مشوار جيل بقاله 27 سنة

جيل ضحى بنفسه عشان خاطر البطل

جيل تخلى عن أحلامه وحقوقه عشان خاطر الراجل العظيم

جيل تفانى وأخلص في حبه للزعيم

جيل مطيع للقائد ... قائد غير حياة مصر تماماً

ودلوقتي حان وقت رفع الستااار عشان نعرف مدى نجاحنا ومدى نجاح سيادة الرئيس

ها مستعد تعرف صمتك عمل ايه
- سجل الدين الخارجي لمصر رقما قياسيا بنهاية السنة المالية 2007 ـ 2008 ليصل إلى نحو 34 مليار دولار

عدد 1221 منطقة عشوائية , منها 20 منطقة تقرر إزالتها لأنها لاتقبل التطوير.

-التضخم في مصر يلتهم 50% من أجور العاملين.

- مصر الأولى عالمياً في عدد ضحايا حوادث الطرق وصلت إلى 25 ضعفاً عن المعدلات العالمية.

- وتقدر المصادر الرسمية فى مصر أن عدد المصابين بأمراض خطيرة مثل الفشل الكلوى أو فيروس (C) والفشل الكبدى والسرطان بحوالى 19 مليون مواطن
- افضل 500 جامعة في العالم لا يوجد من ضمنهم جامعة واحدة مصرية.

- يعيش 48% من السكان تحت خط الفقر ، و يعانى 29% من البطالة ، و يعانى 11 مليون شاب و شابة من العنوسة

- الاعتداء على استقلال السلطة القضائية الذى نص عليه الدستور

-27 سنة قانون طواريء و دخل المعتقلات فى عهد مبارك ربع مليون مواطن.

- التعذيب و انتهاك الأعراض ممارسة روتينية فى الأقسام و السجون فى ظل حالة طوارئ مستديمة

- ازدهار سوق المخدرات و زراعتها و صناعتها ، و بلغ حجم سوق تجارة المخدرات 6 مليار دولار سنويا ، مع انخفاض أسعارها نظرا لتوفرها الشديد

- متوسط عدد حوادث القطارات فى مصر كل عام حوالى 120حادثة قطار سنويا بمتوسط عشر حوادث كل شهر

- 73 ألف قضية فساد موثقة في مصر

- جعل التطبيع مع العدو الصهيونى من ثوابت السياسة المصرية على حساب استقلال مصر.

- عقد صفقة لبيع الغاز الطبيعى مع الكيان الصهيونى

-- التعاون مع الكيان الصهيونى لضرب و محاصرة الشعب الفلسطينى .
- التعاون مع قوات الغزو الأمريكى لاحتلال أفغانستان .

- التعاون مع قوات الغزو الأمريكى لاحتلال العراق.

وغيره كتيييييييير من الانجازات .... بجد هاااايل جدااا

نعم لمبارك لمزيد من الانجازات
هيا بنا لنحتفل بانجازات اعظم رئيس جمورية في العالم .. احتفالية 6 إبريل 2009 لنقول نعم لمبارك

نعم لانجازته العريقة
6 إبريل أجازة في كل مصر
لنحتفل معأ بمرور 27 سنة سكوت على كل هذا العناء والصمود وراء هذا البطل العظيم
لولا سكوتنا ورضائنا لم يكن لينجز اي من هذا
تحــــــــــــيا مـــصر

أخيرا نجحت اني اعمل حالة ثورية صغيرة في المترو

2009-01-12T23:54:00.002+02:00

كل يوم بلييل اجي اركب عربية السيدات في المترو الاقيها كلها رجالة ... عادي بقى ده احنا في مصر
اجي اتكلم ملاقيش اي ست تساعدني فبتكسف واسكت والرجالة بجحة ماشاء الله
المهم انهاردة صممت بقى ... وقمت بصوت عالي وقلت دي عربية سيدات يا استاذة
كل واحد فضل يبص للتاني ومتحركوش
قمت قلت تاني يا رجالة دي عربية سيدات انزلوا منها وروحوا عربية تانية يا رجالة
لقيت ولا حد رد ولا ست كمان اتكلمت
قلت ما بدهاش بقى ... وبصوت عالي ... غالبا انا مش شايفة كويس انا افتكرت ان في رجالة في العربية بتاعة السيدات
فلقيت راجل اتكسف وقام يستعد عشان ينزل ... فلقيت بنت قالت للراجل اللي جمبها .. دي عربية سيدات قوم من هنا .. فقالهما مش مكان في العربيات التانية
قمت قلتله بصوت عالي العربية دي للسيدات وكل اللي يعتبر نفسه سيدة يقدر يعقد
فاتكسف وقام والباقي لسة قاعدين
فواحدة قالت لا حياة لمن تنادي كبري دماغك يا بنتي
قلتلهها يعني لما الدولة اخييرا اديتنا حق واحد من حقوقنا احنا نسكت عليه ... حتى دي هنسكت عليها
واحد قالت عندك حق ... ياجالة انزلوا من هنا .. وابتدى صوت بنت ورا صوت ست يعلى لحد ما انتصرنا كلنا ونزلنا كل الرجالة في العربية
وده نموذج مصغر من الثورة .... صوت واحد في الاول .. بعديه هيبقى صوتين وبعديه ثلاثة .. ها . ها ... ها 100000 صوت ونطالب بحقنا لحد مانعرف ناخده
:-)))))

ادلة تورط النظام المصرى ومبارك فى مذبحة غزة

2009-01-12T14:54:00.011+02:00

1-منع القوافل الطبية والغذائية من دخول غزة لمدة عامين

2- تصريحات مسئولى النظام المتتالية بعدم السماح باقامة امارة اسلامية على حدود مصر

3- تصريح النظام بعداوته لحماس والقبض على الكثير من قادتها داخل سجون مصر

4-اعلان ليفنى بضرب غزة وابادتها اثناء زيارتها لمصر ومن قلب القاهرة وبجوارها ابو الغيط وعدم رده على ذلك

5- تصريحات ابو الغيط بان حماس هى المخطئة وعليها ان تتحمل نتيجة اعمالها

6- رفض مصر لاقامة القمة العربية التى دعا اليها امير قطر وبشار الاسد

7-دعم مصر القوى لابو مازن ودحلان رغم وضوح سقوطهم فى العمالة لاسرائيل

8- الحملات الاعلامية الموجهة بان حماس عميلة لايران وتحويل العدو عند المصريين من اسرائيل الى ايران

9- اعتقال المئات من المتعاطفين مع اهل غزة وخاصة الاسلاميين

10- حشد القوات المصرية بالداخل لاعتقال المتعاطفين وعلى الحدود لاعتقال الفارين من المذبحة

11-منع الاطباء الاتراك واليونانيين والمصريين من العبور لغزة مع شدة احتياجالجرحى والمصابين بالالاف لهم

12- منع دخول المساعدات العاجلة والتحجج تارة بضيق المعبر وتارة بالتخوفات الامنية

13- تصريحات الوفد الاوربى بتاكيد مبارك لهم على وجوب هزيمة حماس

14-تصريحات ساركوزى بان مبارك قال له بوجوب عدم خروج حماس منتصرة ابدا

15-رفض مبارك لقاء وفد علماء المسلمين الذين يلتقون بجميع الحكام العرب والمسلمين لدعوتهم لنصرة غزة

16- اصدار مبارك لمبادرة تهدف لتكريس الوضع وبقاء القوات على ما هى عليه وعدم دعوة اسرائيل للانسحاب وفك الحصار

17-شكر بوش واولمرت لمبارك بالوقوف الى جانبهم ودعم مواقفهم

18- صمت مبارك عن إختراق الطيران الإسرائيلى للحدود المصرية بل وقصف أجزاء من رفح المصري

19- التضليل الأمنى والإعلامى بإستشهاد الضابط ياسر العيسوى على أيدى حماس مع عدم ذكر التفاصيل الحقيقية للواقعة

20- عدم ذكر واقعة إستشهاد جندى مصرى بعد إنهيار أحد أبراج المراقبة عليه إثر القصف الإسرائيلى لمدينة رفح

وثائق*

-------

فيديو : قصف معبر رفح من الجهة المصرية

http://amlalommah.net/aml-2797.html

شاهد عيان يؤكد براءة "حماس" من دم الضابط المصري

http://www.islamtoday.net/albasheer/artshow-12-106193.htm

الأشعل: مصر تنتهك القانون الدولي بإغلاق معبر رفح

http://www.aljazeera.net/NR/exeres/DB26B514-D99C-43B0-B88C-6F1E0F94AC09.htm

قانوني مصري: حديث مبارك عن معبر رفح ليس قانوني

اhttp://www.aljazeera.net/NR/exeres/233F4B22-BEA4-417D-8FE1-7D826BDBACCB.htm

القاهرة تمنع إغاثة غزة

http://www.aljazeera.net/news/archive/archive?ArchiveId=1100673 مسؤولون بغزة: هكذا تعرقل مصر وصول المساعدات

http://www.aljazeera.net/NR/exeres/E717C4C4-0D71-4D66-AA5C-C342C14CFEEA.htm

مبارك يرفض فتح المعبر ويحمل حماس مسؤولية العدوان

http://www.aljazeera.net/NR/exeres/8BBF4C9E-9F49-47DE-80EB-35DDB09AA8BE.htm

معاناة آلاف المشردين بقطاع غزة بسبب استمرار القصف والحصار

http://www.youtube.com/watch?v=1u1Rk9610PI&feature=channel

الأمن المصرى يمنع قوافل كسر الحصار عن غزة

http://www.youtube.com/watch?v=TFHPerV0S6k&feature=related

http://www.youtube.com/watch?v=u2XyUhzaIwU&feature=related

http://www.youtube.com/watch?v=YcJVYrbXhtA&feature=related

http://www.youtube.com/watch?v=0hBW7But9y8&feature=related

http://www.youtube.com/watch?v=eovJJvomdEA&feature=related

http://www.youtube.com/watch?v=upTBkTmdnuM&feature=related

http://www.youtube.com/watch?v=D4siom8lfkM&feature=related

http://www.youtube.com/watch?v=752ImyVMRJo&feature=related

http://www.youtube.com/watch?v=pfL8ZlhHJGw&feature=related

http://www.youtube.com/watch?v=pa9GTJQD3f0&feature=related

http://www.youtube.com/watch?v=JoBnB3o-7no&feature=related

ليفني تهدد غزة من مصر

http://www.youtube.com/watch?v=oeViL47pLxo

مبارك يعرقل وصول المساعدات الإنسانية الدولية إلى غزة

http://www.youtube.com/watch?v=w1SOq_XeU9Uا

تفاقية منع جريمة الإبادة الجماعية والمعاقبة عليها _ أنظر الفقرة الثالثة من المادة 2

Http://www1.umn.edu/humanrts/arab/b087.html

نحن نعلن كشعب مصر العظيم اننا نتبرا من هذا الموقف المشين ونعلن تنضامننا الكامل مع اخواننا في غزة اللهم حررنا من الاستبداد وحررغزة من الاستعمارالبشير

احنا زهقنا ولا اييييه؟؟؟؟!!!!

2009-01-10T18:28:00.005+02:00

كام وقفة عملناها ومفيش حاجة بتتغير....امممم عندكوا حق ... اصلها حاجة تزهق فعلا

كفاية كده بقى ونرتاح احسن .... وربنا مع اهل غزة بقى

يعني احنا هنبقى ارحم عليهم من ربنا؟؟!!! مش كده ولا اييه؟؟

معقولة تكون بنكفر كده؟؟؟!!!! معقولة؟؟؟؟ لا لا لا لاااااا اكيييد لااحنا بردو مصريين ... المصريين اللي طول عمرهم رجالة ومناضليين وعندهم عزة

امال اييه اللي حصل انهاردة؟؟!! عدد قلييل ليه اللي جه؟؟ فيين الباااقي؟؟

عندهم أشغل بقى صح .. عندهم مصالح بردو معزورين ومينفعش نلوم حد مش كده

بس السؤال اللي بيطرح نفسه .... هنسيب غزة لميين؟؟ هه

للحكام؟؟ الحكام للأسف كلهم خذلونا وخزلوا اهل غزة ... أصلهم عاملين زينا بالظبط

عارفيين ليه عاملين زينا؟!! أصل مصالحهم أهم

ايه الكلام اللي يوجع ده؟؟؟ انا اسفة بس دي الحقيقة

احنا بنلوم الحكام ومش بنلوم نفسنا وبنتحجج بمصالحنامصالحنا طبعا اهم من الاطفال اللي بتموت وبتتيتم وبتتحرق وبتتصاب واهم من الستات والرجالة اللي بيفقدوا رجلهم او ايديهم واعضائهم او بيموتوا موتة ابشع من اي فلم رعب اتفرجنا عليه قبل كده

اكيد طبعا مصالحنا اهم .. وكمان اصلنا كل اللي بنقدر عليه نقول ليه البلاد التانية متحركتش ... اصل كل واحد متكل على التاني وادي عدى 15 يوم على الحرب واكتر من 800 شهيد والاف من الجرحى ولا حد لسة اتحرك ولسة على فكرة دي في الاول وفي الاخر قضيتنا... دي قضية جديدة من قواضي الفساد التابعة لمبارك

ده احنا بقينا بنحط ايدينا في ايد اليهود عشان نساعدهم في ضرب اخواتنا الفلسطنيين!!!!!!!!!!!!!!!

وكمان بناخد اوامرنا منهم زي ما مبارك قالها بمنتهى الصراحة من غير مايتتكسف من حد اصل مفيش حد يحاسبه

اصله حاكم عبييد ... يدوب ياكلوا ويشربوا وشكراهيتكسف منهم ليه بقى

يعمل اللي هو عايزه في ملكه ومش مهم رأي حد اصلا اصل المحكومين راضيين يكونو عبيد ومكسليين يطالبوا بحقهم هيطالبوا بقى بحق غزة ازاااي؟؟؟

خالينا بقى في مصالحنا ... وخلي مبارك والصهاينة يعملوا مابدالهم

واسفة اووي على الازعاج

اااه نسييت اقولكم حاجة ..... متنسوش تفكروا في حجة مقبولة نقولها لربنا يوم الحسااب وسلاام يااااا ................... عرب

واحنا قاعدين ..... لا تعليق

2009-01-07T16:25:00.000+02:00

المنشورات الاسرائلبية اللي بتتحدف على الفلسطنيين من الطيارات

2009-01-05T17:27:00.002+02:00

رسالة الى افراد الداخلية وامن الدولة

2009-01-05T17:08:00.005+02:00

طبعا متابعين كل خطوة وكل كلمة

وصلتو لايه بقى؟؟

شايفينا ايه؟؟؟

احنا اللي عايزين نخرب البلد ونموت ونغرق مصريين؟؟؟

احنا اللي عايزين ننهبها وناخد من المصريين اتاوة؟؟

احنا اللي بنبلطج على الناس ونزيلهم عششهم وبيويتهم؟؟

شايفنا ايه انا عايزة افهم؟؟؟

بتعملو معانا كده ليه....واخدين اوامر؟؟؟

طيب انتو مع الاوامر دي ولا ضدها؟؟

لو ضدها اشمعنى الاوامر دي اللي بتتنفذ بالحرف والباقي لأ؟؟؟؟؟

ماهي مصر مليانة اوامر وبتنفذو بس اللي بيعجبكو

طيب مسالتوش نفسكم ليه بنات وشباب في سننا ده سايب الفيديو كليب ومارينا والساحل وحفلات تيستو ومبهدل نفسه البهدلة دي؟؟؟

مسالتوش نفسكم ليه احنا صامدين؟؟؟

فاضيين مثلا؟؟؟

طيب ماهو في مليون حاجة ترفيهية تتعمل وانتو ادرى بده

بنعمل شو اعلامي؟؟؟

والله كنا عملنا فيديو كليب اظرف

فهموني بس انتم ضدنا ليه؟؟؟؟؟

احنا بني ادمين وانتم بني ادمين واكيد بناكل من نفس اكل البلد دي واتربينا في نفس المدارس والاخلاق بتاع زمان .

انتم مصريين واحنا كمان مصريين طيب ليه بتعملو كل ده بتقلقو اهالينا وبتوتورنا ليه؟؟

بتعذبو اخواتنا ليه؟؟؟

عايزينا نبعد ليه؟؟؟؟

عايزينا نسيب البلد بايظة ليه ومليانة ظلم وفساد وقمع ليه؟؟؟

احنا صامدين ومكملييين مهما عملتو مش هنسيب بلدنا ان شاء الله نموووووووت هنفضل مكلميين

وباذن الله هنجيب حق اهالي ضحايا العبارة وهنجيب حق كل مصري شريف ضيعتوله حقه

ده يبقى غلط؟؟؟؟؟؟؟؟

انا مش عايزاكو تردو عليا .. انا بس عايزاكم تفكروا مع نفسكم حاولو نحسبوها صح

لو انتم خايفين على اكل عيشكم اعرفو ان اكل العيش ده بتاع ربنا الرزق ده بايد ربنا وحده مش بايد حد تاني

لو خايفين على نفسكم بقولكم ان انتم بتخافو من بني ادمين زيهم زيكم

لكن الي لازم تخافوه هو الله ... ربنا لا اله الا هو

فوقو بقى

عايزين البلد دي تنضف

فوقو من اللي انتو فيه .. ده كله هيعود على ولادكم ... انتم مش باقيين ليهم

فكروا مع نفسكم وصلو واتكلمو مع ربنا واستفتو قلبكم في اللي بتعملوه فينا في ولاد بلدكم اللي نفسهم ومنى عينهم

يعملو ولو حاجة صغيرة اووي للبلد دي

يارب تكون الرسالة وصلت

احنا مكملين

مكملين

مصر انهارت بسببنا احنا .. مصر ضاعت بسببنا احنا

2009-01-05T16:46:00.005+02:00

مصر انهارت بسببنا احنا

الفساد انتشر بسببنا احنا

المصري مهان كرامته بسببنا احنا

الرشاوي انتشرت بسببنا احنا

جبروت مبارك بيزيد بسببنا احنا

حبس اخواتنا في السجون بسببنا احنا

حق اخواتنا ضحايا العبارة راااااااااح بسببنا احنا

ضحايا الدويقة لسة تحت الانقاض الاحياء منهم ولاموات بسببنا احنا

الغاز اتباع لاسرائيل بسببنا احنا

غزة محاصرة وممنوع عنهم المعونة بسببنا احن

االتعليم بايظ بسببنا احناالغلاء الفاحش بسببنا احنا

ايوة بسببناعارف ليه؟؟لو صحيت من النوم في عز الليل ولقيت حرامي جوة بيتك بيسرقك... هتعمل ايه؟؟

هتقوم تمسكه من زمارة رقبته؟؟؟

ولا هتتقلب على الجمب التاني وتقول ما انا لو قمتله ممكن يخبطني بحاجة يموتني او يعورني؟؟؟؟؟؟

الحرامي جوة بيتك وفي عز الظهر وانت بردو سايبه

يبقى متلومش حد بقى ان بيتك اتسرق

انت اصلا مش عايز تصررخ

مش عايز تستنجد

انت مش ضعيف .. انت اللي ضعفت نفسك بنفسك

لما بتروح تخلص مصلحة انت اللي بترشي عشان تخلص مصلحتك

انت اللي نشرت الرشوة

لما العبارة غرقت والمتهمين اخدو براءة عملت ايه؟؟؟

انت سكتت... ايوة سكتت

مستني حقهم يرجع ازااي؟؟

لما اخواتنا بيترمو في السجون بردو مش بتتحرك وبتقول مهما عملنا مش هيخرجو

حكمت منيين انهم مش هيخرجو؟؟

لما السلع الاساسية بتغلى كل يوم عن التاني بتعمل ايه؟

بتسكت وبتقول هكلم مين ومين هيسمع صوتي يعني بتسكت؟؟

ايوة بتسكت

لما الصخور تنهار فوق المصريين وتكون الحكومة على علم مسبق انها هتنهار ومع ذلك متحرك

شوبعد المصيبة بردو متحركتش وسايبة الضحايا تحت الانقاض

انت عملت ايه؟؟؟بردو فضلت ساكت.. ولا اتحركت

لما يحاصرو غزة ويمنعوا دخول الادوية ودخول الاكل والشرب!!!!

عملت اييه؟؟سكتت

عارف ان اسرائيل هي اللي مديانا اوامر عشان نفضل قفلين المنفذ؟؟

عارف اننا واهبين غازنا لاسرائيل اللي بيقتلو اخواتنتا الفليسطنيين؟؟

عارف ان اسرائيل هي اللي بتحكم اللي حاكمنا؟؟!!!!!!!!!!!!!!!

يعني اسرائيل اللي حكماناعملت ايه؟؟

سكتت؟؟

سكتت؟؟

سكتت؟؟

تحب اكمل ولا كفاية؟؟

ضميرنا صاحي؟؟

يا ترى احنا نستاهل نكون مصريين؟؟

ياترى اصلا عارف قد ايه غالية كلمة مصري؟؟

هنفووووق امتى

هنفوق امتى

يا مصرييييييييين لو متحركناش يبقى منستاهلش كلمة مصريييين

فوققققققققوووو بقى

مصر بتمووت بسببنا ايوة بسببنا احنا

عفوا مبارك انا لا اقبل عهدك.... لقد حان وقت التغيير

2009-01-05T16:43:00.008+02:00

سيادة الرئيس

انا واحدة من بنات وابناء هذا الوطن واعبر عن الكثير منهم

واحدة من البنات اللي اتولدت في ظل ظلمك

واحدة من الشباب التى نشأت في جو فسادك

واحدة من ابناء هذا الجيل الذي رأى قمعك

واحدة من ابناء هذا الشعب الذي يعيش في سجنك

سنيين مرت على حكمك وفسادك يزيد يوما عن يوم

سنيين مرت على عرشك وانتهاك حراسك للشعب يزيد يوما عن يوم

سنيين مرت على عهدك والفقر ينمو يوما عن يوم

سنييين مرت على حكمك وظلم فاق حدود السكوت

والان اقول لك بعلو صوتي وعلى الملأ

عفوااً مباارك انا لا اقبل عهدك .... لقد حان وقت التغيير

Wolf Inside

2009-01-05T13:46:00.009+02:00

باختلاف باقي الذئاب هناك نوع من انواع الذئاب قوي جدا ولكنه طيب ومخلص أيضاً وهذا هو النوع الذي أشعر به بداخلي.

ذئب وحيد برغم ما يحيط به من الاصدقاء .. ولكن أي أصدقاء وما معنى الصديق مهما تخيلت أنك تعرف صديقك ..

فالحقيقية أنك لا تعرفه لا تعرف متى يخلص ومتى يخون.

ذئب مخلص حتى وان لم يعرف حقيقة من يخلص له ولكن هذه سمة من سماة الذئب الذي بداخلي.

ذئب حنون على كل من حوله ذئب ذكي .. يستطيع أن يشعر بالخطر قبل حدوثه.

ذئب قوي .. يستطيع تحمل الظروف حوله ويصبر ليكمل هدفه وقادر أن يتحمل المسئولية مهما كانت ولكن للأسف بكل ما يملك من قوة ولكن بداخله ضعف وخوف لا يستطيع أحد أن يحتويه.

عينيه توضح كل ما بداخله وهذا مايعيبه.

طيبته تمنعه من أذية من حوله بالرغم من استطاعته لاذيتهم لما فعوله من جرائم ولكن بداخله يعلم جيداً أن يوماً ما سيأتي عقابهم.

لا يعلم لماذا يتألم من أجل الآخرين ولماذا يساعدهم ولكن يوجد بداخله جهاز Transmitter يجعله يشعر ما بداخل الآخرين.

يبحث عن كون خالي من الخيانة والغدر والظلم ... ويحاول أن يحمي الأبرياء من غدر الأشرار.

يبحث عن حضن يسكن بداخله ..... ولكن لا يثق في أن يوجد مكان واحد به شخص يستطيع حمايته.

هذا أنا

Wolf-Inside