الأحد، 21 فبراير، 2010

يوم في حب مصر بجد 19-2-2010 ... يوم استقبال البرادعي ومشاهد تهز القلب

امبارح كان يوم فريد من كل حاجة
من كتر التعب حتى مش قادرة اكتب فهقول كل اللي يجي على بالي من غير ترتيب

المشهد 1 : 10 الصبح
هدوووووووووووووووووء وتواجد امني بسيط

المشهد 2 : 11 ونص الصبح
امام مبنى 3 تواجد اعلامي كثيييييف وتواجد سياسيين من احزاب وحركات وشخصيات ولقاءات صحفية

المشهد 3: عدد الجماهير في ازديياااااد

المشهد 4 : بدا الهتافات بصوت عالي واغلبها النشيد الوطني

مشهد 5: سيدة عجوزة تحمل بوستر للبرادعي
سالتها حضرتك تبع ايه؟
قالتلي انا مش تبع حاجة انا جاية بس استقبل البرادعي
قلتلها يعني اانتي ملكيش في السياسة؟
قالتلي دي مش سياسة دي مصر .. احنا تعبنا من كل حاجة جه الوقت عشان نعمل حاجة

مشهد 6: سيدة في سن الاربعين من كتر التعب قعدت تستريح في مكتب تذاكر دخول الصالة
سالتها حضرتك تبع ايه؟؟
قالتلي انا مش تبع حاجة انا شفت الايفنت على الفيس وجيت
قلتلها يعني مش تبع اي تيار سياسي؟
قالتلي مبقتش ساسة بقى احنا اتخنقنا كل حاجة في البلد بايظة انا عندي اواد شايلة همهم هيعملو ايه من بعدي فاقل حاجة اقدمهالهم اني اطالب بحقهم في بلدهم واختارلهم الرئيس القادم ولازم كلنا نسعى لده

مشهد 7:
واقفة مع احمد ماهر ولقيت واحدة في اواخر التلاتينات تقريبا جاية تجري على احمد وتقوله حمدلله على السلامة يابطل انت متعرفنيش وانا مش تبع حاجة انا واحدة عادية بس بتابع الجروب بتاعك وكمل في طريقك انت اثرت في ناس كتيير اوووي وربنا يكرمك ويقويك ويقوي كل اللي معاك مع السلامة ومشيت

مشهد 8:
واحد شايل بنوتة عندها 4 او 5 سنيين بالكتيير وهي اللي بتهتف واحنا بنرد وراها
باسم الجموع
يابراااااااااااادعيييي
مفيييييييش رجووووع
يابراااااااااااااادعي

انا كنت لابسة علم 6 ابريل فوانا ماشية رايحة الكافتيريا بقى كل حد يشفني يسالني هو في ايه ويعني ايه 6 ابريل وانتو ومين والاسئلة دي:

مجموعة ستات وقفوني وسالوني هو في ايه؟
قلتلهم اصل انهاردة استقبال البرادعي
فواحدة قالتلي اعذريني انا فلاحة هو يعني برادعي مش دي المنطقة اللي في مية وحشة
قلتلها مفيش احلى من الفلاحين وده شرف والرادعي ده مسئول دولي كبيير ومصري وكان بيشتغل برة وخلاص شغله خلص وقال انه عايز يغير الدستور اللي بيمنع اي حد غير حسني مبارك او ابنه هما اللي يترشحه وهما اللي سايبين الناس تاكل في بعضها كده انتي حاسة انك عايشة كبني ادمة وواخدة حقوقك؟ قاتلي لا طبعا
قلتلها كلنا بقى عايزين الراجل ده يساعدنا اننا ناخد حقنا
قالتلي زي ايمن نور كده؟ قلتلها ااه بس ايمن نور عشان ملوش ضهر بهدلوه والشعب خاف
لكن البرادعي شخصية دولية فصعب يقدرو ياذوه والشعب لو وقف وقفة واحدة وراه هنكون كلنا اقويا وهناخد حقنا
فواحدة معاها قالتلي هو احنا ممكن نيجي نقف معاكو قلتلها طبعا انتو لازم تيجو معانا ومحدش هيكلمكو واللي هيكلمكو قولولو ان انتو حرين وجايين تستقبلو مصري عظيم
فرحوا اوووووي وقالولي صح يااارب بقى مصر تبقى احسن

اول مرة اشم ريحة الحرية وانا مش خايفة واحس ان في دمقراطية في مصر مع انها مش مصر والسر ان المطار منطقة دولية مينفعش يبقى فيه اي تعنف من اي نوع
ماشية في اركان المطار وبدخل الصالة وبقعد فيها وبتكلم مع الناس في تغيير النظاام وانا حررررررررة بجد الحرية دي شيء عظيم وجميل
اللي عاجبني كمان ان مع كل العدد ده ومع انهم ميعرفوش بعضهم بس كلنا بنتكلم كاننا نعرف بعض مفيش حد مكسوف من حد وكله بيتكلم مع كله اول مرة اشوف المصريين حاجة وحدة
انتمائك لمصر هو اللي بيخليك قريب للي جمبك
لقيت في ناس جايبة عيالها وعيلتها وجايين يستقبلو البرادعي وهما مش منتمين لاي تيار سياسي جايين بفررحة وامل انهم يرشحو البرادعي عشان يغير البلد دي للاحسن

شفت في عيون الناس لاول مرة في حياتي الامل في شيء
شفت الناس اللي ملهاش في السياسة بتهتف لمصر مش للكورة
شفت العاملين في المطار وهما فرحانين ومستنيين ميعاد شغلهم يخلص عشان ينضمو لينا
شفت ان مفيش تحرشات ولا ضرب ولا عنف ولابلطجة في عدم وجود الامن
شفت الناس كلها مش جاية للبرادعي عشان البرادعي لأ هما جايين لمصر وبس والبردعي ده مجرد رمز لبديل رئاسي نقدر من خلاله اننا نكون وراه ويقدر يجمعنا على بناء مصر من جديد
شفت الهتافات وهي بتهز المطار كله وبتهز قلوبنا
شفت الفرحة في عيون الناس

قد ايه فرحت لما لقيت ناس بتقولي 6 ابريل انا في الجروب معاكو وبجد فخورين بيكو ... ولما يسالوني عن اسمي واقولهم اسماء محفوظ يقولولي ايوة انتي اللي بتبعتي رسايل من على الجروب
بجد في أمل وبجد الناس مش زي ما احنا فاكرين لأ المصريين دول احلى ناس في الدنيا دي كلها
طيبة وحنية وجدعنة

انا مكنتش حاسة اني غريبة انا كنت حاسة اني في بلدي بجد كل دول اهلي وحبايبي
نظرة الحب في عيون كل الناس
ناس محترمة بجد
انا حاسة ان االلي شفته امبارح رد فيا الروح واداني قوية اني انزل بكثافة للناس في الشارع حتى لو هخبط علي بيت بيت واتكلم معاهم واقولهم يلا معانا ايدك في ايدي نغير مصر

بحب يا مصر وبحب كل مصري فيكي كل مصري بجد بقبله وبعقله مصري
بحبك يا مصر اووووووووووووووووووووي
بجد انا عمري ما كنت اتخيل ان المصريين ممكن يتعبو التعب ده كله من 10 الصبح ل 7 ونص على رجيليهم من غير راحة وهما جواهم ان كل التعب ده لمصر
بحبكو اوووووووووي


تنبيه هام:
بجد انا عرفت ان الناس متبعانا حتى لو مش بيكلمونا او مش بيشاركو بس احنا اللي بنديهم الامل فياريت نكون قد المسئولية وقد ثقتهم فينا عشان الناس دي فعلا تستاهل اللي بنعمله عشانهم وعشان مصر
واسفة اني طولت عليكم

الجمعة، 12 فبراير، 2010

كلام مش مهم

لما شاركت في الدعوة لاضراب 6 ابريل 2008 وشاركت في تأسيس حركة شباب 6 ابريل ومن بعدها نشاطات كتيير للحركة
كان هدفي اني اقتل الظلم اللي في مصر واجيب حق الشعب اللي بيموت كل يوم من الذل والفقر والجوع والبرد
وكانت وقتها نشاطات الحركة زي السيل اللي ماشي بقوة رهيبة بيهد اي شيء قدامه


لما نجحنا اووووي وكبرنا وكل الجرايد المحلية والعالمية كتبت عننا ولما لفتنا انظار مش بس الشعب المصري لا كل شعوب العالم
كان تعامل الامن معانا بالضرب والاعتقالات والتهديدات
ومع كل ضربة من النظام لينا كان كل مدى بنقوى وبنكبر وبنسمع العالم كله صوتنا

بس شوية شوية ابتدت حاجات كتيير تتغير
الامن هدي " شكليا " معانا وابتدت حاجات بتظهر في الناس اللي معانا واللي حوالينا

ابتديت اسمع كلمات غريبة زي ايدولوجية واجندة وهيكل ورؤية وعميل وحزب
ولقيت ان في تقسيمة غريبة بتحصل وحسابات بتتصفى
وكل واحد عايز ياخد الحركة لايدولوجية معينة وشوية عايزين يضموها لحزب معين
كل واحد بايدولوجيته او بحزبه او باجندته
وصراعات مش فاهمة معناها وساعتها غياب الامن كان ملحوظ
وساعتها سألت نفسي هو انا فين؟؟ ميين دول؟؟ يعني ايه الكلام ده؟؟

وعرفت ان هو ده عـــــــــــــــــالم السيـــــــــــاسة

وسط زيه زي وسط الفن والمشاهير
كل فيلم لازم يبقى في اتفاق اسم مين يتكتب قبل اسم مين وميين اللي هينتج وميين اللي هينقي الممثلين وكل ممثل يتكلم عن التاني في الجرايد واحاديث صحفية وحوارات كتيييييييييير بتحصل والمهم ان ميين يبقى ميين اكبر من ميين
هو ده بالظبط الوسط السياسي والصراع على تقسيمة التورتة قبل حتى ما نطفي الشموع
عالم ملوث زيه زي الوسط الفني اللي بيدخل في اي وسط فيهم بيتعلم ازاي يهز وسطه كويس
والنضيف فيهم يا اما بيهرب يا اما بيتداس عليه يا اما بيتعب اوووووي بس بيبقى كانه بيزق في جبل
ولما استغربت غياب الامن بعد فترة اتكشفت لعبتهم ويمكن هي مكشوفة من زماان قدام الكل
جزء كبيييييييييير من المعارضة هما عملاء الامن بيمثلو دور المعارضة من ناحية عشان يظهرو ديمقراطية النظام ومن ناحية تانية عشان يلوثو الشباب الابيض المستجدين في السياسة ومن ناحية تالتة يشغلو الجزء النضيف بخلافات وصراعات واتهامات ملهاش لازمة
وبتبقى مهنة بياكلو منها عيش وشوية شهرة لطيفة وكمان عشان يكرهو الشعب في المعارضة فتجيلو حالة يأس ويرضى بالوضع اللي هو فيه

وجزء تاني من المعارضة هما نفسهم محتاجيين تغيير لان فسادهم اكبر من انهم يدعو للتغيير
ومنهم ناس فاضية كانت بتدور على حاجة تشغلها فلقت اثارة المشاكل ونميمة على اي حد يجي على بالهم وللاسف محسوبين على المعارضة

ومع كل فترة بتتلوث بيها 6 ابريل بيصمم باقي اعضائها المخلصين بانها تنضف وتكمل في طريقها اللي اتولدت عشانه
ومع كل امتحان بنعدي منه بيجي الاسوأ منه بس العملية بتبقى اصعب كل مدى
احنا هدفنا اسقاط النظام بس انشغلنا في صد الهجمات اللي علينا والوقاية منها ومعالجة الشروخ اللي بتسببها جوانا
باجي اتفرج على باقي المعارضة عاملين ايه بلاقيهم اسوا حالا مننا بس وبعدين
العلاقة بين الحركات والاحزاب السياسية بقت مجرد مين يعمل ضجة قبل التاني مين يتكتب اسمه قبل التاني
والحركة بقت في نظرهم مخزن من الناشطين ومين ياخد اكتر والحسابة بتحسب
وبقت من مصلحة الكل سقوط 6 ابريل
والنظام اصبح مجرد موضوع للمناقشة في الندوات والجرايد واللقائات التلفزيونية

ومع ذلك في أمل
وبرغم تلوث المعارضة في أمل
وبرغم وجود فصائل ملوثة في الحركة بتسعى لتفككيها في أمل
الامل في الناس النضيفة اللي برة وجوة الحركة
الامل موجود مع كل ثانية بنفكر فيها في مصلحة مصر
الامل موجود مع كل وجود لينا وسط الناس في الشارع
الامل موجود مع صمود منسق نضيف ومخلص وقوي وذكي
الامل موجود مع كل فشل بنرجع بعدها اقوى وانجح من الاول

يمكن بنغلط لما بنمشي مع التيار المعارض الملوث
بس لازم نرجع تاني بعيد عنهم
احنا مختلفين غير مأدلجين وغير متبعين اجندة نحسب عليها
مكاننا وسط الناس في الشارع واملنا بيهم وقوتنا فيهم ونجاحنا جواهم
عشان نوصل للتغيير لازم نوصل للناس في الشارع
وهنوصلهم اقسم بالله العظيم هنوصلهم
وده هدفنا وده حلمنا
ونجاحنا الحقيقي ان الشعب المصري وقف ضد النظام مش ان حركة او حزب هو اللي وقف ضده

المشوار لسة طويل وصعب اوووووي مع كل التحديات اللي بنواجها ولسة هنواجها
بس ادينا عرفنا حقائق كتيير هتساعدنا في مشوارنا الفترة اللي جاية

وانا شخصيا اتعلمت ان نجاحنا مش اننا اللي نغير الدستور او نجيب حد يغيره .. لا لازم نوعي الشعب بانه ياخد باله من حقوقه ويبطل سزاجة وخوف لازم الناس تفهم ان هي السبب في ان الظالم بقى ظالم والفاسد بقى فاسد
لازم يفهمه ان الانسان ميبقاش انسان لما يبقى زي الحيوان عايز ياكل ويشرب وينام وبس وكل همه هيجيب اكله منين
لازم يفهمو اننا مش عايشين لوحدنا في العالم واننا بنسخدم لقتل ناس تانية
لازم يفهمو ان ربنا خلق كل واحد فينا لهدف ولرسالة معينة لازم يعرفها ويعمل بيها والا هيبقى دخل الدنيا وخرج منها وهو ملوش لازمة وهيتحاسب على كل ثانية عاشها ومعملش بيها حاجة
لازم الناس تفهم ونكبر دماغنا بقى من ميتين  المعارضة اللي اتحسبت على مصر على الفاضي دي
ولازم كلنا نعرف ان مصر بتضيع بسبب الفساد السياسي من النظام ومن المعارضة

كل واحد لازم يعيد حسابته ويعرف هو عايز ايه وايه هدفه واللي بيعمله عدى عليه كام خطوة لقدام ولو مفيش تقدم يبقى لازم يعيد خطته من تاني لحد ما نقدر نعمل حاجة بجد

اسفة للرغي الكتيير بس كنت موجوعة ومحتاجة اتكلم

مشكلتنا مع النظام وسلاحه المعتقلات وعملائهم من بعض المعارضة ... وسلاحنا المقاومة والمخلصين من الشعب .... هما سلاحهم جاهز واحنا لسة بندور عليه ودورهم تعطيلنا وتضليلنا بس صبرا ايها النظام الفاسد فبامكانك تعطيلنا بعض الوقت وليس لكل الوقت

الجمعة، 5 فبراير، 2010

متضامنة مع وائل عباس ... 18 فبراير جلسة الاستئناف

وائل عباس المدون اللي فضح  ظباط الشرطة البلطجية
وائل عباس اللي فضح انتهاكات الشرطة في انتخابات 2005
وائل عباس اللي جاب حق كتيير  ضحايا التعذيب في مصر ومنهم عماد الكبير
وائل عباس اللي وقف جمب كتيير من المعتقليين السياسيين ونشر قضاياهم في كل مكان في العالم كله
دلوقتي الشرطة عايزة تاخد بتارها منه
بتلفيق قضية من اتهف انواعها
" اتلاف سلك نت "
وعقوبتها 6 شهور سجن مع الشغل!!!!!!!
وده بعد ما رفع قضية ضد ضابط شرطه جاره عشان اعتدى عليه وعلى ووالدته
وطبعا عشان احنا اكيد اكيد في مصر
فتم الحكم لصالح الجاني ضد المجني عليه
وده لينك اللي حصل
http://misrdigital.blogspirit.com/archive/2009/04/10/تفاصيل-الإعتداء-على-وائل-عباس-ووالدته-في-منزله.html

وده خبر الحكم عليه
http://misrdigital.blogspirit.com/archive/2010/01/23/الحكم-بحبسي-ستة-أشهر.html

جلسة استئناف الحكم يوم الخميس 18 فبراير
ضروري جداا اكبر عدد يكون معاه في اليوم ده
وندد بالحكم الظالم لصالح بلطجية مصر اللي بيحموا اقذر نظام على وجه الارض
وائل عباس مش لوحده ومش هنسمح انه يكون فريسة للداخلية ينتقموا منه عشان بيكشف فضايحهم

متضامنة مع وائل عباس

17369_311172955288_565035288_4997146_5972339_n