الأحد، 29 نوفمبر، 2009

حلم التغيير …. شباب 6 ابريل

السياسة مش مجالي ... دي مجرد محطة في حياتي

من ساعة ما دخلت السياسة وانا بين طرفين ويمكن اكتر من طرف
برة السياسة بيقولولي ايه وجع القلب اللي انتي دخلاه ده ومش هتعرفي تعملي حاجة وغيرك جرب وكانت نهايته المعتقلات والبهدلة ده غير اللي هيبقى عايز يستغلك عشان اغراض سياسية
واطراف من السياسة اللي هرشوا على طول اني لسة مستجدة في العالم العجيب ده وكل طرف بيحاول يجرني ناحيته
زمان مكنتش فاهمة ده اووي بس فضلت افهمه شوية بشوية
وكنت عاملة زي القطة الصغيرة اللي بتحس بدفا الام الحنون وبتروح ناحيتها
واستقريت في الحضن الحنين اللي حسيت انه اللي هييخليني اتحرك براحتي واعرف اعمل ايه اللي اقدر اعمله عشان خاطر اعمل حاجة بجد تفيد بلدي واهل بلدي
اشتغلت كتيير اووي بكل اللي اقدر عليه وكل ما اعمل حاجة الاقي نقض وشكوك من اتجاهات كتير
اللي يقولي اني غاوية شهرة واللي يفتكرني عايزة منصب سياسي
وكل كلمة بقولها بتتحفظ ويتعملها سكان وتترجم على محامل كتيير
والكلام ده بيطلع في وقته بعد كده على انها اتهامات
ولما اجي اسال ليه
يقولولي يا بنتي دي سياسة
وانا مش فاهمة يعني ايه سياسة دي
بس حبيت اوضح لكل الناس حاجة
انا انسانة عادية جداااا مجرد عندي حلم ان البلد دي تتغير للاحسن ونموت الظلم فيها لو لقيت غيري بيعمل مكنتش هدخل سياسة
لكن طول ما انا مش لاقية هفضل فيها
انا ماليش حسابات ولا عايزة يبقى ليا
انا بتضامن مع اي حد حسب مبدائي وحسب احساسي
مش بساعد حد مظلوم الا لما بحس فعلا انه مظلوم
كلامي بيطلع باحساسي بيه في وقته من غير حسابات
انا ليا احلام كتيير اوووي برة السياسة وهي دي اللي عايزة احققها
يعني ولا ليا اهداف سياسية ولا طموحات اعلامية
وعمري ما اضرب حد في ضهره وعمري ما عرفت اضحك في وش حد مش طايقاه
حتى لو مش طايقاه وجيت في يوم نسيت واتعاملت معاه عادي بيبقى نابع من جوة احساسي
ولو عدوي لقيته في موقف ضعف واتظلم احيانا بقف جمبه وحتى دي مش حاطلها معايير
مش لازم عشان تضامنت مع حد استنى منه انه يردهالي لكن على الاقل ميضربنيش في ضهري
بس بردو مش بحسبها كده
انا زي الطير اللي بيحب يتحرك بحرية طالما مش بيعمل حاجة غلط .. مش بحب القيود اللي ملهاش لازمة
مش بحب الخداع اللي عايز يقولي حاجة يكلمني يقولي في وشي
هقولها للمرة المليون
السياسة مش مجالي ... دي مجرد محطة في حياتي هتنتهي بمجرد انتهاء هدفها

الاثنين، 23 نوفمبر، 2009

ذكرياتي في حركة شباب 6 ابريل

في يوم من الايام في شهر مارس 2008 لقيت جروب اسمه اضراب عام لشعب مصرتنحت ودخلت لقيت شوية شباب عارضين اضراب لعمال المحلة وبيقولو عايزين نعمم الاضراب على مستوى الفئات في جميع انحاء الجمهورية عشان نطالب بتغيير الوضع الحالي

فرحت اوووووووي عشان كنت بحلم باليوم ده من زمان مع ان مكنش ليا اي نشاطات سياسية ومكنش ليا في السياسة اساسا ولا اعرف اي تفاصيل بس كان كل اللي شايفاه اننا في بلد بقت خرابة واللي يقدر يسرق اي حاجة يسرقها والبقاء للاقوى والوضع بيسوء يوم عن يوم ومفيش تعليم عدل ولا صحة عدلة ولا اي حاجة عدلة وكل حاجة بتغلى يوم عن يوم وكل يوم حاجة في البلد تتباع واجي اتفرج على التلفزيون مفيش حاجة بيقولو عليها غير ان الوضع زي الفل ومصر في تقدم مستمر

المهم لما دخلت الجروب لقيت ناس زيي ملهاش علاقة بالسياسة ولقيت ناس تانية فاهمة وواعية هي بتتكلم عن ايه بس كنت داخلة الجروب وانا مقلقة وخايفة

المهم فضلت اتابع يومين كده وشوية شوية لقيت نفسي بكتب وبرد وبقول افكار زي بقيت شباب كتيير واضح انهم ملهمش في السياسة بس دخلوا يعبروا عن رايهم ويقولو افكار نعملها عشان الاضراب ينجح

الاضراب ده مكنش هدفه شغب او تعطيل مصالح ونخنق على الحكومة وخلاص وبردو مكنش تقليعة جديدة بنحاول نعملها لأ احنا كانت كل احلامنا بسيطة

عايزين تعليم بجد عايزين مرتبات تعيشنا على الاسعار الغالية دي او يقللو الاسعار بشكل يتناسب مع المرتبات .. كان نفسنا نثبت اننا شباب قوي فاهم حقوقه ومش بيستكين للاستبداد ده

فضلت انشر هنا وهناك من جروب لجروب ومن منتدى لمنتدى زي ما كان كتيييير من الشباب في الجروب بيعملو … كان اول حدث من نوعه يحصل من جيلنا والغربيب والغير متوقع كان رد الحكومة في كل وسائل الاعلام الاول تكذيب للاضراب وكانه شيء لازم يتعلن من جهة حكومية عشان الناس تستجيب وكانوا سبب كبير من اسباب انتشار فكرة الاضراب وساعتها بقى حديث الساعة في كل مكان وفي كل المواصلات والمحلات وبين الاصحاب والعائلات ونسبة كبيرة جدا من الناس دخلت على الفيس بوك تدور على الجروب عشان يعرفوا تفاصيله منهم ناس كتيير اتحمست وبدات تنشر الفكرة ومنهم اللي خاف بس فضل يتابع والناس في كل حتة بقوا ييسالو نفسهم انت عندك في شغلك في اضراب يوم 6 ابريل ولا شغل عادي انت في جامعتك في اضراب ولا لا طب ياترى الاضراب ده هياثر على الحكومة وفضل الكلام والتساؤلات ينتشر وسط الناس

ولما الحكومة حست بخطر اكبر من كتر التساؤلات دي ابتدت تتجه لاسلوب الارهاب والتهديد

ونزلت بيان عام من وزارة الداخلية في كل المحطات المحلية ان اللي هيعمل اضراب هيتئذي ويهعرفوا يجيبوه …

طبعا الناس مش فاهمة يعني ايه اضراب وخافوا من البيان وخافوا ينزلوا من البيت وفيهم اللي فهم وقرر انه يقول للحكومة مش نازل من بيتنا الا لما اخد حقي وفي اللي نزل عشان يشوف الشوارع عاملة ازاي

اسبراي في كل حتة غرق شوارع مصر وبوسترات اتلزقت في كل مكان وفي كل المواصلات ومنشورات اتوزعت في كل مكان وافكار للي هيحصل قبل الاضراب شباب وبنات بنتكل فيها على الجروب الكبير والخوف على قد ما بيزيد على قد ما المجهود بيكبر والحماس بيزيد وبيغلبنا على خوفنا

يااااااااه معقولة احنا هنقدر ننجح ونقف قدام الحكومة ؟؟ شباب مصر بدعوتهم للاضراب هيستجاب ليها كل شعب مصر؟؟

كانت احاسيس كتيير اووي واحلام وطموحات خلتنا نصمم ونتفق من غير ما نشوف بعض ومن غير ما نجتمع في اي مكان بس حلمنا جمعنا وهو اللي وحدنا على عمل واحد وروح واحدة وحماس واحد

وجه اليوم …. اضرراب 6 ابريل 2008

شوارع مصر فاضية مفيهاش الا ناس قليلة وفيها امن كتييييير ظباط وعساكر وعربيات امن عام وامن مركزي حتى المترو مليان جيش عساكر وكاننا في يوم اجازة

اجازة؟؟ لا الاجازة مش بتكون كده ده زي ما يكون بلد مفيهاش ناس

كأن في حذر تجول في شوارع مصر … وبعدها رجعت البيت لقيت في التلفزيون حرب في المحلة

مصدقتش نفسي دي في مصر ولا في قطاع غزة؟؟ وسمعت ان في ناس كتييير اوووي اتقبض عليهم من شباب الفيس بوك … ساعتها كان اهلي ميعرفوش اني بدخل على الجروب ده ولقيتهم بيقولولي اوعي تتدخلي على الفيس انتي فاهمة ولا وفجاة الفيس بوك تحول لجريمة محظورة يعاقب عليها بس من غير قانون بس لقيت جروبات كتيير ظهرت بتطالب فيها بالافراج عن المعتقلين هنا وهنا وتعاطف كبيير

العالم كله كان بيتكلم على مصر اليوم ده

خلص اليوم وقررنا نعمل يوم زيه يوم 4 مايو عشان نضغط على الحكومة انها تنفذ المطالب

ووقتها كانت قلوبنا اجمد لدرجة اننا اتفقنا على بيان على النت .. ساعتها اخدت البيان ده وطبعته وصورت من نسخ كتييير ونزلت اوزع في المترو بس اول لما ابتديت اوزع لقيت عندي احساس غريب خوف وتصميم اني اوزع ويمكن كسوف عشان لوحدي ومعرفش حد

لقيت الستات في المترو منهم افتكرني بوزع ورق دعاية مرضيوش ياخدوه مني وستات تانية تقرا تلاقي اضراب يبعدوا عني بسرعة وستات وبنات اكتر لقيتهم بيخبوني ويقولوي خافي على نفسك انتي عارفة ممكن يحصلك ايه فضلت اتكلم معاهم واقولهم وجهة نظري في الاضراب واهميته واخدوا الورق ولما جيت انزل من المحطة لقيت ستات نزلت معايا تخبيني من العساكر ونزلت على عربية تانية وهكذا معرفش جاتلي الجراة دي منين اول مرة اوزع منشروات ولوحدي ومن غير ما حد يقولي ولما رجعت الجروب حطيت اللي حصل ولقيت غيري عمل كده كتيير ومكنتش انا بس اللي عملت كده ساعتها فرحت جداا وابتدينا نشجع بعض

بعدها تم اصدار قرار انه هيتم زيادة المرتبات 30% والناس فرحت اووووووي وحسوا انهم نجحوا لاول مرة يعملوا حاجة عامة كل الناس عملتها وحققوا بيها المطالب

وساعتها الناس قررت انها تروح شغلها عادي ومتعملش اضراب يوم 4 مايو 2008

وبعدها كانت الصدمة زيادة في الاسعار 50 في المية في كل حاجة وخصوصا البنزين وفضلت الاسعار تزيد وتزيد وساعتها الناس بعد ما اخدت ثقة في نفسها احبطت جدا

وهنا كان قرار لمجموعة كبيرة من الشباب انهم يبتدوا مشوار عارفين ومتاكدين انه صعب

to be continued…….

الأربعاء، 18 نوفمبر، 2009

تعالو نشجع مصر بجد في ماتش التغيير

عشان نغير مصر لازم نوصل لاكبر فئة فيها او اكبر عدد ودي حاجة مش جديدة اكيد كلنا عارفينها
بس للاسف احنا مهما وصلنا لعدد كبير من الشباب بس لو قسناها بالنسبة هتطلع نسبة ضئيلة من الشباب اللي قدرنا نوصلهم صوتنا وفهمونا
بس للاسف الحكومة بشرها طلعت اذكى مننا وعرفت ازاي توصل لاكبر نسبة من الشباب وبوظتلهم مخهم
عرفت تلعبها صح وتملى دماغهم باحلام وهمية زي العربية والشقة في مكان شكله ازاي وطموحاتهم اقتصرت على شركة كبيرة بمرتب كبير مش مهم في مجال ايه
ومش مهم هما ناجحين فيه ولا لا المهم انه يجيب فلوس وخلاص
خلت الشباب معندهمش انتماء للبلد كلهم بيحلمو بالسفر ... لو جيت تقول لواحد مصر هيتريق عليك ويشتمك
يا اما اللي فاهم وخايف بس ده كمان مش فاهم اووي عشان لو فهم بجد مش هيخاف
الشباب ثقافتهم بتنحدر يوم عن يوم ولا بيقروا جرايد ولا بيشوفو اخبار ولا بقو عايزين حتى يعرفوا اخبار البلد
لو سالتهم احنا عندنا كام وزارة يمكن ميعرفوش طيب وظيفة الوزارت ايه بردو ميعرفش
نسبة كبيرة منهم ميعرفوش الانتخابات الرئاسية امتى
اسالهم عن اي حاجة تخص البلد غير الحفلات والعربيات والمخدراات والسجاير والقهاوي مش هيعرفوا
ولا حتى فكروا يسالوا نفسهم
كلمة وانا مالي اتعلموها من حضانة ... وانا مالي ياعم دي سياسة وانا مالي بالسياسة
ولو حد صاحبك اوووي وجيت تكلمه فجاءة في حال البلد ممكن يقولك ايه ياعم انت عندك اكتئاب ولا ايه
طيب عشان مرغيش كتيير والكلام ده كلنا عارفينه
خلاصة الكلام اننا عايزين نوصل لاكبر نسبة من الشباب دي
فعايزين نسال نفسنا كذا سؤال؟
ياترى الشباب كلها تفكيرها واحد؟ ولا متقسمين فئات؟
طيب ايه اكتر حاجة بتشتغلهم وازاي نقدر نوصلهم للسياسة عن طريق الحاجات دي؟
طيب احنا كلنا عارفيين رؤيتنا واهدافنا بس ياترى لو بنفس الطريقة دي قلناها لاي واحد من الشباب هيفهمها؟
وهتوصله؟
اصلا الشباب بتكسل تقرا وبتهزق من الكلام الكتيير
طيب لو حبينا نلخص كل الكلام ده في رؤية محددة ومهمات محددة واهداف محددة
سطر او سطرين في كل حاجة منهم باسلوب يوصلهم
هتتكتب ازاي؟؟
طب لو كلمناهم ايه الاسئلة اللي بيسالوها عايزين يفهموها ؟ وايه احسن طريقة واسلوب اجابة على الاسئلة دي؟
عايزين كلنا نفكر سوا ايه احسن طريقة واسلوب نوصلهم بيه

http://www.facebook.com/topic.php?uid=9973986703&topic=26702

الأربعاء، 11 نوفمبر، 2009

مصر والمعارضة والناس

هي المعارضة بتعارض من امتى حكومة مبارك؟
اكتشفوا امتى ان الحكومة دي فاسدة؟
لو في معارضة بجد كان الفساد على الاقل هيقل
ليه الفساد بيكتر كل يوم عن اللي قبله؟
في زيادة مستمرة بشكل يخوف
والناس سلبيتها بتكبر واحساسها بانعدام الامل بيكبر
وللاسف الشديد الناس اللي عندها مبدأ وضمير وايجابيين يا اما بيتجننوا يا اما بيموتو ياما بيتسجنوا يا اما ايه؟
يا اما بيبقو اكبر فسادا من اللي وقفو ضدهم في يوم
طب ايه دور المعارضة
جعجعة وتنظير
سواء المعارضة اللي تبع الحكومة او المعارضة اللي بتمشي زي ما الحكومة عايزة وهما مش داريانين او عارفين يمكن الله اعلم
لو هنتكلم عن الوطنيين
اكيد اكيد ناس كتيير زمان اوووي لما دخلو السياسة دخلوها عشان مصر والوطنية والشعب والى اخره
بس ياترى ايه اللي يبحصل؟
كل اللي سمعته وبما اني معنديش اي خبرة ثقافية او تاريخية او زمان ان كل شلة  بيقولو هنعمل حاجة بيحصل فيها انقسامات وان النفسيات بتاعة الناس وحب المال والشهرة هو اللي بيكسر الكتلة دي الي مجموعة كتل
طيب الناس دي ازاي دخلوا سياسة على حب الوطن وفجاءة اتحولو لحب شهرة والامراض التانية اللي عارفينها؟؟
طيب معقول كل المصريين اللي دخلو المعارضة كده؟
اكيد لا
طيب ايه اللي حصل للباقي؟
في ناس بتهزق وناس بتسافر وناس بتكمل بقيت حياتها متحسرة وناس بيتقال عليها كلام زبالة وبيهربو من الكلام ده ويختفوا
وناس يتقال عليها بتاخد تمويل ويكرهو فيهم الناس وناس يتلفقلها قضية تخابر ويكرهوا برضو فيهم الناس
وبنات يتحرشوا بيهم ويقولو انهم بنات وسخة وهما اللي بيدعو ده عشان الشهرة
بس بس بس بس بس بس
لازم نفكر في كل ده
اولا مش منطقي خالص ان كل التكتلات يحصل فيها نفس المرض وتموت نفس الموتة باختلاف السيناريوهات ونقول صدفة
ااه الناس منفسنة بس مش معقول بقالنا سنين الناس تدخل السياسة زي الفل تدخل جوة تتعدي مش انفلونزا خنازير دي اصلها
ميين اللي بيقيد نار الخناقات؟
وميين في مصلحته يخلي المعارضين يمسكوا في بعض بدل ما يمسكوا في الحكومة؟
وميين اللي في مصلحته يكسر مجاديف بقيت الناس عشان يقولو عمرنا ما هنغير يعني اللي حاولو يغيرو عملو ايه؟
وميين في اللي مصلحته يخلي كل السياسين يقعدوا في قهاوي وسط البلد بس قهاوي وسط البلد بس؟؟؟
ميين اللي في مصلحته يدخل ناس مأجورة ويعملوا فيها ابطال وزعماء ووطنين وبعد كده يبتدوا يوقعو بين الناس ويكرهوا الناس في الناس؟؟؟
ميين اللي قلب السياسية وظيفة ومصدر رزق؟؟
ميين اللي قلب الوطنية مكانة سياسية؟؟
ميين وميين وميين وميين
اكيد كل ده مش صدفة مع اني متفقة ان النفس البشرية ليها دور كبير في اللي بيحصل
بس من سنييييييييين طويلة والقصة هي هياها بتكرر بس بسيناريوهات مختلفة
صدفة؟؟؟ اكيد لا
طب ليه اساليب السياسين واحدة؟
ليه الناس المثقفة محاولتش تستغل ثقافتها في التطبيق وسط الناس في الشارع واستغلوه بس في المناظرات على القهاوي والندوات؟؟
ليه عمر ما حد ربط مناخ الشارع وتغيراته بالعمل الوطني؟
وليه اللي يجرب يعمل كده يتهموه باسوا اتهامات ومن ميين
مش من برة لا
ده لازم الاتهامات دي تتطلع من اقرب المقربين

طب ما تيجو نمسح كل ده باستيكة
ونبتدي من الاول
ليه كل واحد عايز يغير مصر بجد ينسى اسمه خالص ويقول انا مصري وعايز اغير وعشان اغير هبعد عن اسلوب الحمضانين وانزل اشوف اقدر اوصل الناس في الشارع ازاي يبقو ايجابين ويفكرو في عقلهم وفي مستقبلهم صح بدل ما بيفكروا ازاي يحافظو على الطريق المستقيم اللي جمب الحيطة؟

ليه منفكرش في اساليب مبتكرة مش اساليب التمنينات ونشوف نقدر نوصل للمصريين اللي من كل الفئات اللي في الدنيا ومن كل الاعمار ومن كل الوظايف ومن كل الثقافات
ليه بدل ما نبهدل بعض قدام الناس دي ونقولهم تعالو اتفرجو علينا اصل احنا اللي هنغير مصر
نحافظ على بعض وننصح بعض ونتكلم ونتفق على ان مصر  مش هيفدها تقطيع هدومها وهدومنا
ليه ما كل المعارضة تتفق على مبدا او فكرة
وكل معارض لو حبكت معاه يشتغل باسمه بس يخدم الفكرة او كل كتلة او حزب
تعالو ننزل الشارع نوعي الناس الشهر ده بكذا
كل مجموعة من كل تيار تنزل وتعمل ده باسلوبها
ويتناقشوا مع بعض كل اسبوع او كل شهر عملو ايه وايه تجربتهم ونجحت في ايه
ويبقى التنافس في ارض الملعب مش ارض الندوات اللي لا بتودي ولا تجيب

لو بصيتو على غلطات زمان متتحسروش عليها بالعكس تعالو نتعلم من كل اللي وقع المعارضة وتعالو نتفاداه ونجرب غيره لحد ما نوصل بجد
لو قريتو تجارب شعوب اسوا مننا حالا هتلاقوا ان في امل كبيير
لو اتعلمنا ازاي نخطط صح ونحسب خطواتنا في سبيل الهدف وقيمنا نفسنا كل فترة ونسينا اي حد يقول علينا ايه ولا الجرايد تشهر علينا وتقول ايه ولا مركز فلان السياسي اتهز ليه
تعالو نفكنا من كل ده ونفكر ازاي نوعي الناس على الاقل اول فترة يكونو ايجابين في المحيط الضيق الشغل مثلا
ونشجع الناس كلها انها متسكتش عن الباطل ونعلمهم ونعلم نفسنا معاهم ازاي نقول لا بطريقة سلمية وحضارية وازاي نغير المكان اللي حوالينا من فساد لمحيط فيه نسبة كبيرة من العدل والعمل الجاد والجيد
جوايا كلام كتيير اووي اتفجر بعد سنتين سياسة
بس لو قلنا مفيش امل نتعدل نبقى بندفن نفسنا بالحيا
في وقت لسة نعمل مارشيدير ونرجع وندور على الطريق اللي هيخلي بلدنا احسن بلد في الدنيا بجد

اسفة لو زهقتكوا مني ومش لازم اكون صح بس دي وجهة نظري